سەناتتا الەۋمەتتىك كودەكستىڭ جوباسى تانىستىرىلدى

سەناتتىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى نۇرتورە ءجۇسىپتىڭ ايتۋىنشا، الەۋمەتتىك كودەكس – بۇل ەلدەگى الەۋمەتتىك ساياساتتى جاقسارتۋ جولىنداعى تاعى ءبىر قادام بولىپ وتىر. سەناتور قۇجاتتا حالىقارالىق دەڭگەيدە مويىندالعان جانە بەلگىلەنگەن جاڭالىقتار قامتىلعانىن اتاپ ءوتتى.

«الەۋمەتتىك كودەكس جوباسىندا انا مەن بالانى ۇلتتىق دەموگرافيالىق ساياساتتىڭ فاكتورى رەتىندە قولداۋ تەتىكتەرى، ەڭبەك نارىعىن دامىتۋدى ۇيىمداستىرۋ جانە جۇمىسقا ورنالاسۋعا كومەك كورسەتۋ، از قامتىلعان وتباسىلاردىڭ ماتەريالدىق ءال-اۋقاتىن ارتتىرۋعا كومەكتەسۋ، ارناۋلى الەۋمەتتىك قىزمەتتەر جۇيەسىن جەتىلدىرۋ، مۇگەدەك ادامداردى الەۋمەتتىك قورعاۋ بويىنشا جاڭا شارالار كوزدەلگەن»، دەدى سەناتور.

ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا كودەكستەگى نەگىزگى جاڭالىقتار تۋرالى شاعىن اقپارات بەردى. ولاردىڭ قاتارىندا الەۋمەتتىك قىزمەت كورسەتۋ جۇيەسىن جەتىلدىرۋ، مەملەكەتتىك قولداۋدىڭ جاڭا تۇرلەرى، الەۋمەتتىك ساقتاندىرۋ مەن زەينەتاقىلاردىڭ جاقسارتىلعان جۇيەسى جانە باسقالارى بار.

تانىستىرۋ بارىسىندا كودەكستە قازىرگى ۋاقىتتا يكەمدى جۇمىسپەن قامتۋ، جاس جۇمىس كۇشىنىڭ كوبەيۋى، الەۋمەتتىك قامسىزداندىرۋ جۇيەسىنە ءوزىن-ءوزى جۇمىسپەن قامتىعانداردىڭ تولىق قاتىسپاۋ ماسەلەلەرى بار ەكەنىن اتاپ ءوتتى.

جالپى العاندا كودەكس جوباسىندا قازاقستاننىڭ الەۋمەتتىك سالاسىن نىعايتۋ مەن دامىتۋ ءۇشىن بازالىق جاعدايلار جاساۋعا باعىتتالعان 50-دەن استام زاڭعا وزگەرىستەر مەن تولىقتىرۋلار كوزدەلگەن.