ءبىلىم سالاسىندا دا, قازاق رۋحانياتىندا دا اكادەميكتىڭ ءدارىسىن تىڭداعان, ونەگەلى ءتالىمىن كوڭىلگە تۇيگەن شاكىرتى كوپ. سولاردىڭ ءبارى اينالاسىنا كۇن شۋاعىنداي جىلىلىق پەن ىزگىلىكتىڭ ساۋلەسىن شاشقان دارا ۇستازدى ءالى كۇنگە ۇمىتپايدى. سونىڭ دالەلىندەي, مۇنايلى وڭىردە «زەينوللا قابدولوۆ: الەم جانە ادەبيەتتانۋ ماسەلەلەرى» اتتى حالىقارالىق عىلىمي-تاجىريبەلىك كونفەرەنتسيا ءوتتى. وعان ەلىمىزدەگى جوعارى وقۋ ورىندارى مەن زيالى قاۋىم وكىلدەرى, قوعام قايراتكەرلەرى, قىرعىزستان مەن تۇركيادان كەلگەن عالىمدار, اكادەميكتىڭ ۇلى باقىت قابدولوۆ پەن شاكىرتتەرى قاتىستى. جيىنعا كەلگەن اكادەميكتىڭ شاكىرتتەرىنىڭ اراسىندا پرەزيدەنت كەڭەسشىسى, ۇلتتىق عىلىم اكادەمياسىنىڭ اكادەميگى باۋىرجان وماروۆ, اقىن, قازاقستان جازۋشىلار وداعى توراعاسىنىڭ ورىنباسارى باۋىرجان جاقىپ, ادەبيەتتانۋشى, ۇلتتىق عىلىم اكادەمياسىنىڭ كوررەسپوندەنت-مۇشەسى امانتاي ءشارىپ جانە باسقالارى بار.
اتىراۋدا ءتورتىنشى رەت وتكىزىلگەن كونفەرەنتسيا قوناقتارى الدىمەن زەينوللا قابدولوۆتىڭ مۇسىنىنە گۇل شوعىن قويدى. بۇل ءمۇسىن ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ الدىنداعى بەلگىلى تۇلعالار الاڭىنا قويىلعان. سونىمەن قاتار ءبىلىم ورداسىندا عالىمنىڭ ادەبي تانىمدىق مۇراسىن جاس ۇرپاققا ناسيحاتتاۋ ماقساتىندا اتاۋلى ءدارىسحانا اشىلدى.
جاڭا ءدارىسحانانىڭ لەنتاسىن قىرعىز رەسپۋبليكاسى ش.ايتماتوۆ اتىنداعى ءتىل جانە ادەبيەت ينستيتۋتىنىڭ ديرەكتورى ابدىلداجان اكماتاليەۆ, ءال-فارابي اتىنداعى قازۇۋ-دىڭ پروفەسسورى جانعارا دادەباەۆ, م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ قيدى.
بۇل كونفەرەنتسياعا مەملەكەت باسشىسى قاسىم-جومارت توقاەۆ قۇتتىقتاۋ حاتىن جولدادى. ونى پرەزيدەنتتىڭ كەڭەسشىسى باۋىرجان وماروۆ وقىپ بەردى. «زەينوللا قابدولوۆ – ۇلاعاتتى ۇستاز, عيبراتتى عالىم ءارى كورنەكتى قالامگەر. سۇلۋ ءسوزدىڭ سۇلەيى اتانعان جازۋشى كوركەم تۋىندىلارى ارقىلى حالقىنىڭ ەرەكشە ىقىلاسىنا بولەندى. ونىڭ شوقتىعى بيىك شىعارمالارى قالىڭ وقىرماننىڭ جۇرەگىنە جول تاۋىپ, قازاق رۋحانياتىنىڭ التىن قورىنا ەندى. اكادەميك-جازۋشىنىڭ «ادەبيەت – اردىڭ ءىسى» دەگەن ءسوزى قالامگەر قاۋىمنىڭ ومىرلىك ۇستانىمىنا اينالدى. «قازاقتىڭ قابدولوۆى» اتانعان ءبىرتۋار تۇلعانىڭ ازاماتتىق بولمىسى مەن ادامگەرشىلىك قاسيەتتەرى ءاردايىم جاستارعا ۇلگى-ونەگە. كورنەكتى عالىمنىڭ تاعىلىمدى ءومىر جولى, ادەبي جانە عىلىمي مۇراسى ءالى تالاي ۇرپاققا رۋحاني ازىق بولارى ءسوزسىز. بۇگىنگى القالى جيىندا زەينوللا قابدولوۆ باستاعان ۇلت زيالىلارىنىڭ ەل مۇددەسىن قورعاۋ جولىنداعى ەڭبەكتەرى تۋرالى سالماقتى ويلار مەن ساليقالى تۇجىرىمدار ايتىلادى دەپ سەنەمىن», دەلىنگەن قۇتتىقتاۋ حاتتا.
وبلىس اكىمى سەرىك شاپكەنوۆتىڭ پىكىرىنشە, زەينوللا قابدولوۆ – كەستەلى كوركەمسوزدىڭ شەبەرى. ونىڭ شىعارمالارى ءالى دە وقىلادى. ويتكەنى «جاقسىنىڭ اتى, عالىمنىڭ حاتى ولمەيدى». «قازاق دالاسىنىڭ ءبىر قيىرى – اتىراۋدان تۇلەپ ۇشقان تانىمال تۇلعانىڭ تۇلا بويىنان بەكزاتتىق پەن تەكتىلىكتىڭ ايقىن كورىنىپ تۇراتىنى تامىرىنىڭ تەرەڭدىگىنەن شىعار. زەينوللا قابدولوۆتىڭ جان سۇلۋلۋىعى, كوركەمسوزدى كەستەلەپ توگەتىنى ءالى كۇنگە ەلدىڭ جادىندا ساقتالىپ كەلەدى. ول ادەبيەتكە ءوز قولتاڭباسىمەن, ءوز ىزدەنىسىمەن, ءوز پىكىرىمەن كەلگەن ەدى. سوڭعى دەمى تاۋسىلعانشا ادامدار اراسىنداعى قارىم-قاتىناستىڭ سىپايىلىعى مەن سىرشىلدىعىن, ادالدىعى مەن رۋحاني بايلىعىن شىعارماشىلىعىنا ارقاۋ ەتتى. قالامىنا قاسيەت قونعان قالامگەردىڭ ۇلتتىق قازىنامىزدىڭ ءىنجۋ-مارجانىن تەرىپ, قازاقتىڭ ءسوز ونەرىنىڭ قادىرىن جۇرەگىمەن سەزىنگەنىن ۋاقىتتىڭ ءوزى دالەلدەپ بەردى», دەدى ول.
كونفەرەنتسيادا بايانداما جاساعان عالىمدار زەينوللا قابدولوۆ فەنومەنىنە ءار قىرىنان باعا بەردى. ماسەلەن, قىرعىز عىلىم اكادەمياسىنىڭ ۆيتسە-پرەزيدەنتى, اكادەميك ابدىلداجان اكماتاليەۆ «اكادەميك زەينوللا قابدولوۆ جانە قىرعىز ادەبيەتى», ءال-فارابي اتىنداعى قازۇۋ-دىڭ اباي اتىنداعى عىلىمي-زەرتتەۋ ينستيتۋتىنىڭ ديرەكتورى, فيلولوگيا عىلىمدارىنىڭ دوكتورى جانعارا دادەباەۆ «زەينوللا قابدولوۆتىڭ لەكتسياسى», فيلولوگيا عىلىمدارىنىڭ دوكتورى زينول-عابدەن بيسەنعالي «ادەبيەت پەن ونەردەگى رۋح جانە زەينوللا قابدولوۆ تولعامدارى», م.اۋەزوۆ اتىنداعى ادەبيەت جانە ونەر ينستيتۋتىنىڭ حالىقارالىق بايلانىستار جانە الەم ادەبيەتى ءبولىمىنىڭ مەڭگەرۋشىسى سۆەتلانا انانەۆا «ۆسەلەننايا اكادەميكا كابدولوۆا: سلوۆو ي وبراز», ۇعا كوررەسپوندەنت-مۇشەسى, قازاقستان جازۋشىلار وداعى باسقارما توراعاسىنىڭ ورىنباسارى باۋىرجان جاقىپ «اكادەميك-جازۋشى زەينوللا قابدولوۆ – ۇلتىمىزدىڭ ۇلى ۇستازى», تۇركياداعى Erciyes Universitesi PhD دوكتورى ليۋتفيە گيۋۆەنش «ز.قابدولوۆتىڭ اقىن نازىم حيكمەتتەن اۋدارمالارى» تاقىرىبىندا بايانداما جاسادى.
– زەينوللا قابدولوۆ – سان قىرلى تالانت يەسى. مىڭداعان شاكىرت تاربيەلەدى. ادەبيەتتى تەرەڭ زەرتتەدى. قازاق عىلىمىنىڭ دامۋىنا ولشەۋسىز ۇلەس قوستى. جاس عالىمداردىڭ عىلىمي جۇمىسىنا جەتەكشىلىك ەتتى. سيرەك كەزدەسەتىن قالامگەردىڭ شىعارماشىلىعىن ءالى دە زەرتتەي تۇسكەن ءجون, – دەيدى زينول-عابدەن بيسەنعالي.
كونفەرەنتسيادا ءسوز ونەرىنىڭ سۋرەتكەرى زەينوللا قابدولوۆتىڭ جازۋشىلىق, عالىمدىق, ۇستازدىق كەلبەتى جان-جاقتى اشىلدى دەۋگە بولادى. اكادەميكتىڭ پروزا جانرىندا, ادەبيەتتانۋ عىلىمىندا قالدىرعان مول مۇراسى ءالى تالاي زەرتتەۋشىنىڭ عىلىمي جۇمىسىنا ارقاۋ بولارى انىق.
اتىراۋ وبلىسى
