جۋىردا ىشكى ىستەر مينيسترلىگىنىڭ القا وتىرىسىندا ۆەدومستۆو باسشىسى مارات احمەتجانوۆ ىشكى ىستەر ورگاندارىنىڭ قىزمەتكەرلەرىن پاراساتتىلىققا تەكسەرۋدىڭ قاناتقاقتى جوباسىنىڭ ىسكە قوسىلعانىن حابارلادى. ۆەدومستۆودا پوليتسەيلەردىڭ كۇندەلىكتى جۇمىسىنا بارىنشا جاقىن سيتۋاتسيالىق كەيستەر, ولارعا دەن قويۋ نۇسقالارى جانە تەكسەرىلەتىن ادامداردىڭ ءىس-ارەكەتتەرىن باعالاۋ كريتەريلەرى ازىرلەنگەن.
ەڭ الدىمەن كۇندەلىكتى حالىقپەن بايلانىستا بولاتىن بولىنىستەردىڭ قىزمەتكەرلەرى تەكسەرۋدەن ءوتتى. بۇل – پاترۋلدىك پوليتسيا, يۋۆەنالدى پوليتسيا, كوشى-قون قىزمەتى, ۋچاسكەلىك پوليتسيا پۋنكتتەرىنىڭ, مودۋلدىك جانە ستاتسيونارلىق بەكەتتەردىڭ, فرونت-وفيستەر مەن كەزەكشى بولىمدەردىڭ قىزمەتكەرلەرى. باستاپقى كەزەڭدە ازاماتتارمەن قارىم-قاتىناس قۇرۋ, قىزمەتكەرلەردىڭ ولاردىڭ وتىنىشتەرىنە جەدەل ارەكەت ەتۋ قابىلەتىن تەكسەرۋگە باسا نازار اۋدارىلدى. سونداي-اق قىزمەتكەردىڭ سىرتقى ءتۇرى, ياعني نىساندىق كيىمى, ماتەريالدىق-تەحنيكالىق جاراقتاندىرىلۋى, قىزمەتتىك پلانشەتتەردى, بەينەتىركەگىشتەردى, جەتونداردى, اۆتوكولىكتەردى ماقساتتى پايدالانۋى باعالاندى. قاڭتار ايىندا استانا, الماتى قالالارىنىڭ, الماتى, قاراعاندى, پاۆلودار جانە جەتىسۋ وبلىستارىنىڭ پوليتسيا دەپارتامەنتتەرىندە تەكسەرۋلەر جۇرگىزىلدى. جوبا ىسكە قوسىلعان قىسقا مەرزىمگە قاراماستان تەكسەرۋ ناتيجەلەرى تيىمدىلىگىن كورسەتىپ وتىر. اتاپ ايتساق, وتىنىشتەرگە جەدەل قىزمەت كورسەتىلە باستادى, قىزمەتكەرلەردىڭ ءوز جۇمىسىنا جاۋاپكەرشىلىكپەن قاراۋعا, دۇرىس جانە سىپايى جاۋاپ بەرۋگە ۇمتىلىسى بايقالادى. بۇل قىزمەت كورسەتۋ مودەلىنىڭ پرينتسيپتەرىنە سايكەس كەلەدى. سونىمەن قاتار تەكسەرۋ پروفيلاكتيكالىق تۇرعىدان دا اسەر ەتىپ وتىر. وتكەن ايدا انىقتالعان اكىمشىلىك قۇقىق بۇزۋشىلىقتاردىڭ سانى ەداۋىر وسكەن. مىسالى, تەك استانا قالاسىندا جول قوزعالىسى ەرەجەلەرىن بۇزۋدىڭ جالپى سانى 23 800-گە دەيىن جەتتى. قاناتقاقتى جوبانىڭ باستالۋىمەن پوليتسيا قىزمەتكەرلەرىنىڭ ولارعا پارا بەرۋ ارەكەتتەرى تۋرالى حابارلاۋى دا ارتقان. بيىل قاڭتار ايىندا وتكەن جىلدىڭ سايكەس كەزەڭىمەن سالىستىرعاندا مۇنداي فاكتىلەردىڭ سانى 3 ەسەگە جۋىق ءوستى. قازىرگى ۋاقىتتا پوليتسيا قىزمەتكەرلەرى, سونداي-اق ولاردىڭ قىزمەتتىك اۆتوكولىكتەرى مەن ءۇي-جايلارى اقپاراتتى اۆتوماتتى تۇردە جەدەل باسقارۋ ورتالىقتارىنا جىبەرەتىن زاماناۋي فيكساتورلارمەن جابدىقتالعان.
«لاۋازىمدى ادامعا پارا بەرگەنى ءۇشىن ايىپپۇل سالۋدى نەمەسە بەس جىلعا دەيىنگى مەرزىمگە باس بوستاندىعىنان ايىرۋدى, بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءومىر بويىنا ايىرۋدى كوزدەيتىن قىلمىستىق جاۋاپكەرشىلىك قاراستىرىلاتىنىن ەسكە سالامىز. پوليتسيا قىزمەتكەرلەرىنە قىزمەتتىك مىندەتتەرىن اتقارۋ كەزىندە باعىنباۋ مەن قارسىلىق كورسەتۋگە جول بەرىلمەيتىنى تۋرالى حابارلايمىز. جىل باسىنان بەرى وسىنداي 19 فاكت, سونداي-اق بيلىك وكىلىن قورلاۋدىڭ 44 فاكتىسى تىركەلدى. ازاماتتاردى زاڭعا باعىنۋعا جانە زاڭسىز ارەكەتتەردى جاساماۋعا شاقىرامىز. بوپسالاۋ جاعدايىندا ءىىم-ءنىڭ وزىندىك قاۋىپسىزدىك قىزمەتىنە نەمەسە 1402 سەنىم تەلەفونىنا دەرەۋ حابارلاۋ قاجەت», دەلىنگەن ۆەدومستۆونىڭ رەسمي حابارلاماسىندا.
