كوللاجدى جاساعان امانگەلدى قياس, «EQ»
كونفەرەنتسيا جۇمىسىن اشقان ۋنيۆەرسيتەت رەكتورى جانار تەمىربەكوۆا ءباسپاسوز بەن كىتاپ باسۋ يندۋسترياسىنىڭ پايدا بولۋى حالىقتىڭ ساياسي ۇلتقا اينالۋىنا اسەر ەتكەنىن اتاپ ءوتتى. «ورتاق تاريح, ورتاق ساياسي سانا, ورتاق وتان ۇعىمدارى «قازاق» گازەتىنىڭ ىقپالىمەن قالىپتاستى. ءارى قازاق دەگەن ساياسي ۇلتتىڭ قالىپتاسۋىنا, سانالىق تۇرعىدان وركەندەۋىندە وراسان ءرول وينادى», دەدى رەكتور. ال ۋنيۆەرسيتەتتىڭ الەۋمەتتىك-مادەني دامۋ ۆيتسە-رەكتورى اسقار تۇرعانباەۆ كونفەرەنتسيانىڭ ماقساتى مەن ماڭىزدى تۇستارىنا توقتالدى. «قازاق» گازەتىنىڭ تاريحى مەن قيىندىقتارى, ەل مۇددەسى ءۇشىن اتقارعان ەڭبەكتەرى جايلى ايتىپ ءوتتى. عىلىمي-تاجىريبەلىك كونفەرەنتسياعا ونلاين قاتىسقان فيلولوگيا عىلىمدارىنىڭ دوكتورى, اكادەميك, «قازاق گازەتتەرى» جشس باس ديرەكتورى ديحان قامزابەك ۇلى «قازاق» گازەتىنىڭ باسىنان وتكەرگەن سىن ساعاتتارى مەن بۇگىنگى ۇرپاققا قالدىرعان مول مۇراسىن تىلگە تيەك ەتتى. «قازاق» گازەتى حالقىمىزدىڭ رۋحاني ساناسىنا رەفورما جاساپ, جالپىۇلتتىق دەڭگەيگە كوتەرىلگەنىن, ۇلتتىڭ مەملەكەتتىلىگى جوق كەزەڭدە ەلشىلدىك ويدىڭ, پاراساتتىڭ, ۇستانىمنىڭ ارقاۋىن جالعاعانىن دايەكتەدى.
ءوز زەرتتەۋلەرىمەن بولىسكەن ۋنيۆەرسيتەت پروفەسسورى, تاريح عىلىمدارىنىڭ دوكتورى تۇرسىن حازرەتالىنىڭ پايىمداۋىنشا, «قازاق» گازەتىندە عاسىر بۇرىن ايتىلعان ماسەلەلەر بۇگىن دە ءوز كۇشىن جويعان جوق. ءتىل مەن ۇلت تاقىرىپتارىنان باسقا, بۇگىنگى ايەل تەڭسىزدىگى سياقتى تاقىرىپتاردى الاش زيالىلارى دا قوزعاعان. «قازاق» گازەتىنىڭ اقپارات تاراتۋداعى ساۋاتتىلىعى, وزەكتى تاقىرىپتارى مەن ۇلت جاناشىرلىعىنا توقتالعان عالىم گازەتتىڭ شىعۋ تاريحىنا تۇركىستان قالاسىنىڭ قوسقان ۇلەسى تۋرالى تاريحي دەرەكتەر كەلتىردى. ءبىرىنشى سانىنىڭ قالاي شىققانىن, قارجى ماسەلەلەرىنىڭ شەشىمى تۋرالى ماڭىزدى اقپاراتتارمەن ءبولىستى. سونداي-اق كونفەرەنتسيا بارىسىندا پروفەسسور, فيلولوگيا عىلىمدارىنىڭ دوكتورى سەيدۋللا سادىقوۆ, م.ح.دۋلاتي اتىنداعى تاراز وڭىرلىك ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى سامەن قۇلباراقوۆ, س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ دوتسەنتى, فيلولوگيا عىلىمدارىنىڭ كانديداتى سەرىك ەلىكپاەۆ ءوز ويلارىمەن ءبولىستى. زەرتتەۋ كەزەڭدەرىمەن بولىسكەن بارلىق سپيكەرلەر «قازاق» گازەتىنىڭ قازاق باسپاسوزىنە سىڭىرگەن ەڭبەگىن اتاپ كورسەتتى.
كونفەرەنتسيا اياسىندا «قازاق» گازەتى مەن الاش زيالىلارىنا قاتىستى قۇندى ەڭبەكتەر قويىلعان كورمە ارقىلى ستۋدەنتتەرگە كىتاپ, گازەت-جۋرنالدارمەن كەڭىنەن تانىسۋعا مۇمكىندىك جاسالدى. جيىن سوڭىندا ونلاين جانە وففلاين قاتىسۋشىلار «قازاق» گازەتىنىڭ ماڭىزدىلىعىن, قازاق ءباسپاسوزى ءتول تاريحىن دارىپتەپ, جيىن وتكىزگەن جۋرناليستيكا كافەدراسى مەن ۋنيۆەرسيتەت ۇجىمىنا ريزاشىلىقتارىن ءبىلدىردى.
تۇركىستان
