ونىڭ ايتۋىنشا, كوررەكتسيالىق مەكتەپتەردى تامامداعان مۇمكىندىگى شەكتەۋلى جاندار ءۇشىن بۇل باعىتتاعى ارنايى باعدارلامالار قاراستىرىلماعان. سالدارىنان ولاردى كاسىبي تۇرعىدا جەتىلدىرۋدە, مادەنيەت مەكەمەلەرىنە جۇمىسقا ورنالاسۋدا قيىندىقتار تۋىنداپ جاتىر.
– قازىر ەلىمىزدەگى ەرەكشە بالالاردىڭ تەاتر مامانى بولۋى ءۇشىن مەملەكەتتەن ارنايى باعدارلامالار ازىرلەنبەگەن. ماسەلەن, ۆوكال بولىمىندە «ىم-يشارات» تىلىندە ءان ايتۋ ماماندىعى جوق. سونىڭ سالدارىنان كوررەكتسيالىق مەكتەپتەردى بىتىرگەن, جانى شىعارماشىلىقتى قالايتىن مۇمكىندىگى شەكتەۋلى ازاماتتار جۇمىسقا ورنالاسا المايدى. ويتكەنى مادەنيەت مەكەمەلەرىنە ارنايى ديپلوم قاجەت. سوندىقتان بالالار كوبىنەسە تىگىنشى نەمەسە ەتىكشى بولادى. بۇل ءبىز ءۇشىن دە, قوعام ءۇشىن دە وتكىر ماسەلە. بىراق تەاتر – ەرەكشە بالالار ءۇشىن ونەر جولىندا ءوزىن شىڭداۋعا, الەۋمەتپەن ەتەنە بايلانىسۋعا تاماشا مۇمكىندىك, – دەدى سپيكەر.
ۇلتتىق دەلفي كوميتەتى وكىلدەرى مۇمكىندىگى شەكتەۋلى بالالارعا ونىڭ ىشىندە ەستۋ قابىلەتى ناشار جاستارمەن جۇمىس ىستەۋ جونىندەگى ادىستەمەلەرىن جەتەكشىلىك ەتەتىن مينيسترلىكتەرگە بىرنەشە رەت ۇسىنعان. ەگەر حالىقتىڭ بۇل توبىنا ارنالعان ىلكىمدى باعدارلاما قولعا الىنسا, ازىرلەۋ ۇدەرىسىنە قاتىسۋعا دايىن ەكەنىن دە جەتكىزدى.
– الايدا جوعارى وقۋ ورىندارىندا ءبىلىم ساپاسىن ارتتىرۋ باعدارلامالارىنىڭ مازمۇنىن ءوز بەتىنشە انىقتايتىن اكادەميالىق ەركىندىك دەگەن بار. بۇل دا شىعارماشىل ەرەكشە ازاماتتاردىڭ مۇمكىندىگىن كەڭىنەن ناسيحاتتاۋعا كەدەرگى. كوميتەتتىڭ نەگىزگى مىندەتتەرىنىڭ ءبىرى – مۇمكىندىگى شەكتەۋلى بالالاردىڭ بولاشاق كاسىبىن, ونەردى تاڭداۋى ءۇشىن ءار وڭىردە الاڭدار مەن تەاترلاردى دامىتۋ. بۇگىندە تەك پەتروپاۆل قالاسىندا وقۋ ورىندارىمەن ۋاعدالاستىققا قول جەتكىزىلدى. سونىڭ ناتيجەسىندە ەرەكشە ستۋدەنتتەر شىعارماشىلىق ماماندىقتار بويىنشا وقۋعا مۇمكىندىك الدى. قازىر بىزدە حورەوگرافيانى بىتىرگەن 2 تۇلەك بار. بۇعان قوسا تەاتر اكتەرلەرىمىز وبلىستىق قازاق دراما تەاترىندا جۇمىس ىستەپ جاتىر, – دەدى ق.تۇسپەكوۆا.
سونداي-اق ءباسپاسوز ءماسليحاتىندا «ىم-يشارات تىلىندە ءان ايتۋ» نوميناتسياسى بويىنشا ۇلتتىق دەلفي ويىندارىنىڭ قازىلار القاسىنىڭ توراعاسى حاسان يسرايل ىم ءتىلىن ۇيرەنۋدەگى پروبلەمالاردىڭ بارىن جاسىرمادى.
– كورۋ قابىلەتى ناشار ادام زاتتان, ال ەستۋ قابىلەتى ناشار ادام قوعامنان الشاقتايدى. قازىرگى ۋاقىتتا باستى ماسەلەمىز دە – وسىندا. ءبىزدىڭ ەرەكشە جاندارىمىز قوعامنان ءبولىنىپ كەتپەۋى كەرەك. ولار الەۋمەتپەن بىتە قايناسا ءومىر سۇرۋگە ءتيىس. جالپى, دەلفي ويىندارى شىعارماشىل جاستاردىڭ اشىلۋىنا كوپ ىقپالداسىپ ءجۇر. ءبىزدىڭ بالالار ۇلكەن ساحنالاردا ونەر كورسەتىپ, ءوز تالانتىن جۇرتشىلىققا دالەلدەپ كەلەدى, – دەدى ح. يسرايل.
ايتا كەتەيىك, جۋىردا ەلوردادا ەرەكشە تەاتر ارتىستەرىنىڭ گاسترولدىك ساپارى وتەدى. 5 اقپاندا كورەرمەندەر ەكى مارتە دەلفي ويىندارىنىڭ چەمپيونى اتانعان ۇجىمنىڭ «سكۆوز تيشينۋ» اتتى كونتسەرتىن تاماشالاي الادى. وندا ەستۋ قابىلەتى ناشار بيشىلەر دە ونەر كورسەتەدى. ال 6 اقپان كۇنى تەاتر سۇيەر قاۋىمعا «مى س توبوي ودنوي كروۆي» اتتى الەۋمەتتىك دراماسىن ۇسىنادى. بۇل – ورتالىق ازياداعى ىم-يشارات تىلىندەگى جالعىز سپەكتاكل. تەاتر پروديۋسەرى قۇرالاي تۇسپەكوۆانىڭ ايتۋىنشا, مۇنداعى باستى ماقسات – حالىقتىڭ نازارىن ەرەكشە بالالارعا اۋدارۋ ارقىلى قازاقستاندا مەتسەناتتىق جانە قايىرىمدىلىق ينستيتۋتتى دامىتۋ.
– ءبىزدىڭ اكتەرلار ساحنادا وينامايدى, ولار ساحنادا ءومىر سۇرەدى. تالانتتى بالا سۇيگەن ىسىمەن اينالىسسا, وعان ەشقانداي شەكتەۋ جوق ەكەنىن قازاقستاندىقتار تۇسىنسە دەيمىز. تەاتر ارقىلى ءبىز بالالاردى قوعامعا بەيىمدەپ قانا قويماي, دەنساۋلىق جاعدايىنىڭ دا بەلگىلى ءبىر دەڭگەيدە جاقسارعانىن كورىپ وتىرمىز. ەلىمىزدىڭ ءار وڭىرىندە ەرەكشە تەاتر ترۋپپالارىن قۇرۋدى جوسپارلاپ وتىرمىز, – دەدى ق.تۇسپەكوۆا.
جالپى, 2019 جىلى ەرەكشە تەاتر ەلىمىزدىڭ 20 قالاسىندا جانە حالىقارالىق فەستيۆالدەردە ونەر كورسەتكەن. ءتىپتى 2020 جىلى قىرعىزستاننىڭ بىشكەك قالاسىنا ارنايى شاقىرىلعان. دەلفي كوميتەتىنىڭ ايتۋىنشا, قازىردىڭ وزىندە تمد ەلدەرىنەن ۇسىنىس ءجيى تۇسەدى. بۇل قارجىلىق قولداۋدىڭ بولماۋىنا بايلانىستى ازىرگە مۇمكىن بولماي تۇر. سوندىقتان ولار مۇمكىندىگى شەكتەۋلى جاستاردىڭ شىعارماشىلىق جەتىستىكتەرىن ناسيحاتتاۋ جانە ەلىمىزدە مەتسەناتتىق جانە قايىرىمدىلىق ينستيتۋتىن دامىتۋ باعىتىندا بىرقاتار مادەني ءىس-شارا وتكىزۋدى جوسپارلاپ وتىر.
