اسىرەسە, ارقالىق قالاسى مەن اۋليەكول, ناۋىرزىم, امانكەلدى, جانكەلدين, قاراسۋ اۋداندارىنا قاراستى ەلدى مەكەندەرگە تاسقىن سۋدان تونگەن قاۋىپتىڭ الدىن الۋعا قازىردەن باستاپ قامدانباسا بولمايدى. الايدا اۋدان اكىمدەرى مەن قۇتقارۋشىلاردىڭ بولجامى سايكەس كەلمەي وتىر. ماسەلەن, تجد-نىڭ مالىمەتى بويىنشا, 2021 جىلى توبىل قالاسىنىڭ لەسنايا كوشەسىندەگى 25 ءۇيدىڭ اۋلاسىنا دەيىن قار سۋى باسىپ قالعان. بىراق قوستاناي اۋدانىنىڭ اكىمى جانسۇلتان تاۋكەنوۆ بۇل ۇيلەردى سۋ باسقان جوق دەپ وتىر. اكىم بيىل بۇل كوشەلەر كوكتەمدە ارنايى موتوسورعىلارمەن قۇرعاتىلاتىنىن ايتتى.
ال كوكتەمدە ساي-سالادان كەلەتىن قىزىل سۋدى قارسى الۋعا قام جاساپ جاتقان فەدوروۆ اۋدانى ەلدى مەكەندەردىڭ ماڭايىنداعى سۋ وتكىزگىش قۇبىرلاردى اۋىستىراتىن قارجى سۇراپ وتىر. اۋدان باسشىلارى 749 ملن تەڭگەگە جوبا ازىرلەپ قويىپتى, بىراق تجد وكىلدەرى فەدوروۆ اۋدانىنا بيىل تاسقىننان كەلەر تىكەلەي قاۋىپ جوق ەكەنىن العا تارتادى.
وڭىردە بارلىعى 98 گيدروتەحنيكالىق نىسان بار. ونىڭ 12-ءسى توزىپ تۇر. ابدەن توزىپ بىتۋگە شاق تۇرعان 7 بوگەت سۋدىڭ ەكپىنىنە شىداس بەرمەۋى مۇمكىن. ناۋىرزىم اۋدانىنىڭ بۋرەۆەستنيك اۋىلى, سونداي-اق قاراسۋ اۋدانىنىڭ بىرقاتار ەلدى مەكەنىندە دە كوكتەمگى سۋ تاسقىنىنان مۇقيات دايىندالماسا بولمايدى.
قاراسۋ اۋدانىنىڭ اكىمى ۆيكتور رادچەنكونىڭ ايتۋىنشا, اۋدانداعى 13 بوگەتتىڭ تورتەۋى جوندەۋدى قاجەت ەتەدى. بۇل بوگەتتەردىڭ سۋ تاسقىنىنا بالەندەي اسەرى جوق. دەگەنمەن اۋدانداعى سۋ تاسقىنىنا توسقاۋىل بولاتىن نىسانداردى جوندەۋ ماسەلەسىن بۇگىننەن باستاپ شەشۋ قاجەت.
ال جانكەلدين اۋدانىنىڭ اكىمى شوتا وسپانوۆ كەيىنگى 15 جىلدا سۋ تاسقىنى كەزىندە ەلدى مەكەندەردى سۋ باسۋ وقيعاسى تىركەلمەگەنىن ايتتى. سوعان قاراماستان قازىرگى تاڭدا سۋ تاسقىنى كەزىندە قاۋىپ ءتونۋى مۇمكىن ەلدى مەكەندەردەگى تۇرعىنداردىڭ ءتىزىمى ازىرلەنگەن.
– سۋ تاسقىنى قاتەرىنىڭ الدىن الۋ ماقساتىندا جىل سايىن قونىراۋلى وزەنىندە مۇزداردىڭ كەپتەلىسىن جويۋ ءۇشىن ەكى جەردەن مۇز جارۋ جۇمىسى جۇرگىزىلەدى. سونىمەن قاتار قابىرعا وزەنىنىڭ بويىندا كۇيگەنكون قونىس ورنىندا ارنايى گيدروبەكەت ورنالاسقان. ياعني سۋ تاسقىنى كەزىندە سۋدىڭ جىلدامدىعى مەن سۋ ارناسىنىڭ كوتەرىلۋ دەڭگەيى بويىنشا مونيتورينگ جاسالادى. توتەنشە جاعداي قىزمەتكەرلەرى اۋىلدىق وكرۋگ اكىمدەرىمەن بىرلەسىپ سۋ تاسقىنى كەزىندە زارداپ شەگۋى ىقتيمال ەلدى مەكەندەردى, شارۋا قوجالىقتارى ورنالاسقان قونىس ورىندارىنداعى ۇيلەر مەن ادامداردىڭ سانىن تىزىمدەپ, ۋاقىتشا قاۋىپسىز اۋماققا كوشىرۋ ورىندارىن بەلگىلەپ قويدى, – دەدى ش.وسپانوۆ.
قوستاناي وبلىسى
