سومالي قارۋلى جاساقتارى كەنيانىڭ مپەكەتوني قالاسىنا شابۋىل جاسادى. شابۋىل سالدارىنان كەم دەگەندە 48 ادام قازا تاپقان. بۇل تۋرالى حالىقارالىق قىزىل كرەست كوميتەتىنە سىلتەمە جاساي وتىرىپ, «فرانس-پرەسس» اگەنتتىگى حابارلادى.
لاڭكەستەر, سونداي-اق, ءۇش قوناق ءۇي مەن ءبىر جانارماي قۇيۋ ستانساسىن ورتەپ جىبەرگەن. كەيبىر دەرەكتەرگە قاراعاندا, قارۋلى جاساق جەرگىلىكتى پوليتسيا ۋچاسكەسىنە دە شابۋىل جاساعان. جالپى, كەنيادا لاڭكەستىك ارەكەتتەر ءجيى بولا باستادى. بۇعان سەبەپ – 2011 جىلدىڭ اياعىندا وسى ەلدىڭ ارمياسى سوماليگە كىرگەن بولاتىن. ونداعى ماقسات «ءال-كايدانىڭ» سومالي بولىمشەسى بولىپ تابىلاتىن «اش-شاباب» توبىمەن كۇرەس ەدى.
اق ءۇي يرانمەن ىنتىماقتاسا ما؟
يراكتا جاعدايدىڭ ۋشىعىپ كەتۋىنە بايلانىستى ۆاشينگتون اتالعان ەلدەگى ءوز ەلشىلىگىن قورعاۋ ءۇشىن 275 اسكەري قىزمەتشى اتتاندىردى. باعدات قالاسىنداعى سوڭعى وقيعالار اق ءۇي باسشىلىعىن وسىنداي قادامعا بارۋعا ماجبۇرلەپ وتىر.
ۆاشينگتون, سونىمەن قاتار, يراكتاعى جاعدايدى تۇراقتاندىرۋ ءۇشىن تەھرانمەن ىنتىماقتاستىققا بارۋعا دا دايىن ەكەنىن ءبىلدىرىپ قويدى. بۇل تۋرالى اقش مەملەكەتتىك دەپارتامەنتىنىڭ وكىلى دجەننيفەر پساكي حابارلادى. ونىڭ سوزىنە قاراعاندا, ۆاشينگتون مەن تەھران يراك ۇكىمەتىنىڭ ساياساتىنا قاي جاعىنان ىقپال ەتۋ كەرەكتىگىن تالقىلاپ جاتقان كورىنەدى. قالاي دەگەندە دە اقش پەن يران, ساياسي كوزقاراستارى قاراما-قايشى ەكەنىنە قاراماستان, يراكتاعى قارۋلى جاساقتاردىڭ بەلسەندىلىگىن تەجەۋگە مۇددەلى بولىپ وتىر.
ەكى ۇمىتكەردىڭ دە دامەسى زور
سىرتقى ىستەر ەكس-ءمينيسترى ابدۋللا ابدۋللا مەن بۇرىنعى قارجى ءمينيسترى اشراف عاني قاتىسقان اۋعانستانداعى پرەزيدەنتتىك سايلاۋدىڭ ەكىنشى كەزەڭىنەن كەيىن باسەكەلەس ەكى جاق تا ناق وزدەرىنىڭ كانديداتۋرالارى جەڭىسكە جەتكەنىنە سەنىمدى ەكەندىكتەرىن ءبىلدىردى.
«رەيتەر» اگەنتتىگى اتاپ وتكەندەي, بايقاۋشىلار مەن باسقا دا رەسمي ادامدار ەكى ۇمىتكەردىڭ ءوز باسىمدىقتارىن باسكە قويىپ, سايلاۋ ادال وتپەدى دەپ سىلتەمە جاساۋى سايلاۋ قورىتىندىسىن تانىماۋعا الىپ كەلۋى ىقتيمال. سايلاۋ كوميسسياسىنا 274 شاعىم تۇسكەنى دە بەلگىلى بولىپ وتىر. بۇۇ باس حاتشىسى پان گي مۋن ەكى ۇمىتكەردى دە سايلاۋ ۇدەرىسىن قۇرمەتتەۋگە شاقىردى. ال سايلاۋدىڭ ناقتى قورىتىندىسى وسى ايدىڭ سوڭىندا جاريا ەتىلەتىن بولادى.
قىسقا قايىرىپ ايتقاندا:
ەۋرووداق ۋكراينا استاناسىنداعى رەسەي ەلشىلىگىنە شابۋىلدى جازعىرعان تۇرعىدا پىكىر ءبىلدىردى. ەو-نىڭ وكىلى مايا كوسيانچيچ كيەۆ باسشىلىعىن ديپلوماتيالىق وكىلدىكتەردىڭ قاۋىپسىزدىگىن قامتاماسىز ەتۋگە شاقىردى. «ءبىز كيەۆتەگى رەسەي ەلشىلىگىنە شابۋىلدى ايىپتايمىز», دەلىنگەن ونىڭ مالىمدەمەسىندە. كولۋمبياداعى پرەزيدەنتتىك سايلاۋدىڭ ەكىنشى كەزەڭىندە ءىس باسىنداعى پرەزيدەنت حۋان مانۋەل سانتوس جەڭىسكە جەتتى. سايلاۋ بيۋللەتەندەرىنىڭ 99 پايىزى تەكسەرىلگەننەن كەيىنگى مالىمەت بويىنشا ول ەل حالقىنىڭ 50,89 پايىز داۋىسىن العان. ونىڭ قارسىلاسى, «دەموكراتيالىق ورتالىق» پارتياسىنان ۇمىتكەر وسكار يۆان سۋلۋاگا 45,06 پايىز داۋىس جيناعان. پاكىستان اسكەري-اۋە كۇشتەرىنىڭ جويعىش ۇشاقتارى ەلدىڭ سولتۇستىك-باتىسىندا قارۋلى جاساقتاردىڭ شەپتەرىنە سوققى جاسادى. 150 لاڭكەس قازا تاپقان, دەپ حابارلادى «فرانس-پرەسس» اگەنتتىگى پاكىستان كۇش قۇرىلىمدارىنا سىلتەمە جاساي وتىرىپ. ۇشاقتاردىڭ نىساناسى «وزبەكستاننىڭ يسلام قوزعالىسى» توبىنىڭ قارۋلى جاساقتارى بولعان. يسلام ب ۇلىكشىلەرى يراكتىڭ سولتۇستىك-باتىسىنداعى تالل-افار قالاسىن باسىپ الدى. بۇل تۋرالى «رەيتەر» اگەنتتىگى حابارلادى. شابۋىلداعان «يراكتىڭ يسلام مەملەكەتى مەن لەۆانتا» ارابتىڭ ءسۇننيت توبىنىڭ قارۋلى جاساقتارى ەكەن. بۇل ەلدە وسى ايدىڭ باسىنان بەرى تىنىشتىق كەتىپ تۇر. قازىرگى تاڭدا يراك بيلىگى ەلدىڭ سولتۇستىك-باتىسىندا جاعدايدى باقىلاۋىنان شىعارىپ الىپ وتىر. 1700 سولداتتى اجال قۇشتىرعان «يراكتىڭ يسلام مەملەكەتى مەن لەۆانتا» ۇيىمىنىڭ قارۋلى جاساقتارى يراكتىڭ تۇتقىنعا تۇسكەن 1700 جاۋىنگەرىن اجال قۇشتىرعان. بۇل تۋرالى «اسسوشەيتەد پرەسس» اگەنتتىگى حابارلادى. ءوز ارەكەتتەرىن ايعاقتاۋ ءۇشىن يسلامشىلار ءوز سايتتارىنىڭ بىرىنە جازالاۋ ساتتەرىن ورنالاستىرىپتى. ولتىرىلگەندەر يراكتىڭ سولتۇستىك-باتىسىنداعى ۇرىس كەزىندە تۇتقىنعا تۇسكەن سولدات-شيتتەر ەكەن. تولىققاندى شابۋىلدار بارىسىندا ەكسترەميستەر موسۋل, تيكريت, سونداي-اق, سالاح-ەد-دين مەن كيركۋك پروۆينتسيالارىنداعى كەيبىر ەلدى مەكەندەردى باسىپ الۋعا قول جەتكىزگەن كورىنەدى. قازىرگى تاڭدا ولار باعداتقا قاراي باعىت الىپ بارا جاتسا كەرەك. ۇرىس قيمىلدارى ساماررا قالاسى ماڭىندا ءجۇرىپ جاتقانعا ۇقسايدى. يراك استاناسىن قورعاۋ ءۇشىن باعداتقا 2000 يران اسكەريى جەتكىزىلىپتى. بيلىك باسىندا جاڭا پرەمەر-مينيستر فينليانديانىڭ ەو ىستەرى جونىندەگى جانە سىرتقى ساۋدا ءمينيسترى الەكساندر ستۋبب ەل پرەمەر-ءمينيسترىنىڭ ورىنتاعىنا وتىراتىن بولدى. «رەيتەر» اگەنتتىگى حابارلاعانداي, ستۋبب, سونداي-اق, بيلەۋشى كواليتسياعا كىرەتىن فينليانديا ۇلتتىق كواليتسياسى پارتياسىنا دا جەتەكشىلىك ەتەدى.
مۇنداي شەشىم بيلەۋشى پارتيانىڭ سەزىندە داۋىس بەرۋدىڭ ەكىنشى كەزەڭىنىڭ قورىتىندىسى بويىنشا قابىلدانعان. 46 جاستاعى ستۋببقا دەلەگاتتاردىڭ شامامەن 60 پايىزى ءوز داۋىستارىن بەرگەن. ساياساتكەر ۇكىمەت باسشىسى لاۋازىمىنا ءبىر اي ىشىندە كەلەتىن بولادى. وعان دەيىن ءىس باسىنداعى پرەمەر يۋركي كاتاينەن ورىنتاعىن بوساتۋى ءتيىس. ستۋبب سوڭعى ءۇش جىل بويى جوعارىداعى قىزمەتتى اتقارسا, ونىڭ الدىنداعى ءۇش جىل بەدەرىندە فينليانديانىڭ سىرتقى ىستەر ءمينيسترى بولعان.
قىتايدا قىلمىسكەرگە جازا اۋىر
قىتاي استاناسى – بەيجىڭ قالاسىنداعى اتاقتى تيانانمەن الاڭىندا وتكەن جىلدىڭ قازان ايىندا لاڭكەستىك جاسالعانى ءالى دە ۇمىتىلا قويماسا كەرەك. سول كەزدەگى لاڭكەستىككە قاتىسقان ءۇش ادام ءولىم جازاسىنا كەسىلگەن. بۇل تۋرالى قىتاي تەلەۆيزياسىنا سىلتەمە جاساي وتىرىپ, «رەيتەر» اگەنتتىگى حابارلادى.
بۇدان بولەك, تاعى ءبىر ادام ءومىر باقي تۇرمەدە وتىرۋ جازاسىنا كەسىلسە, لاڭكەستىككە قاتىسى بار دەگەن كەلەسى 4 ادامعا 5 جىل مەن 20 جىلعا دەيىنگى ارالىقتا تۇرمەدە وتىرۋ تۋرالى ۇكىم شىعارىلعان. ەستەرىڭىزگە سالا كەتسەك, 2013 جىلدىڭ 28 قازانىندا اۆتوموبيل اتالعان الاڭدا ءبىر توپ ادامعا بارىپ سوعىلعان بولاتىن. ارتىنشا كولىك وتقا ورانعان ەدى. جول-كولىك وقيعاسى سالدارىنان 5 ادام وپات بولسا, 40 ادام ءتۇرلى دەنە جاراقاتىن العان ەدى. قىتاي بيلىگى وقيعانى جانكەشتى لاڭكەستەر جاسادى دەپ بەلگىلەگەن-ءتىن.
ينتەرنەت ماتەريالدارى نەگىزىندە ازىرلەندى.
