جسدپ ۇمىتكەرلەرىن انىقتادى

بۇدان بولەك، ءبىر مانداتتى ايماق­تىق وكرۋگتەر بويىنشا 6 كانديدات ما­جوريتارلىق ادىسپەن ۇسىنىلماق. كاندي­دات­تاردىڭ ءتىزىمى فيليال كونفەرەنتسيالارىندا انىقتالادى. پارتيا توراعاسى اسحات راحىم­جانوۆ كانديداتتاردىڭ بارلىعى قازاق­ستان زاڭناماسىنداعى تالاپتارعا تولىق سايكەس كەلەتىنىن مالىمدەدى. «جۋىردا عانا قابىلدانعان ايەلدەر مەن جاستاردان، مۇگەدەكتىگى بار تۇلعالاردان تۇراتىن قوسىمشا ءتىزىم ۇسىنۋ تالابىن دا ساقتاپ وتىرمىز. سونداي-اق ماجوريتارلىق جۇيە بويىنشا 6 ادام ۇسىنىلادى. ول كانديداتتار ءوز وڭىرىندە ايتارلىقتاي تانىمال بولعاندىقتان جەڭىسكە ءۇمىت ارتا الادى دەپ ويلايمىز. قازاقستان اۋقىمدى ساياسي ترانسفورماتسيالاردى باستان وتكەرىپ جاتىر. حالىق ءۇشىن ماڭىزدى كەزەڭدە ەلدەگى جالعىز وپپوزيتسيالىق پارتيا رەتىندە بۇل ساياسي دودادان شەت قالا المايمىز»، دەدى اسحات راحىمجانوۆ.

قۇرىلتايدا پارتيانىڭ سايلاۋالدى باعدارلاماسىن ازىرلەۋ ماسەلەسى پىسىقتالدى. قۇجاتتا تۇرعىندار ءجيى كوتەرەتىن پروبلەمالار، قوعامداعى وزەكتى ماسەلەلەردى شەشۋ جولدارى قامتىلماق. ماسەلەن، پارتيا باسشىلىعى قازاقستانداعى باستى ماسەلە ادال بيزنەستى تۇنشىقتىراتىن، ەكونوميكانىڭ دامۋىنا جول بەرمەيتىن، حالىقتىڭ ءال-اۋقاتىنا كەرى اسەر ەتەتىن سىبايلاس جەمقورلىق ەكەنىن ءجيى العا تارتادى. «ەلدە بەنەفيتسيارلارى قايتا وڭدەۋ سالالارىن دامىتۋعا مۇددەلى ەمەس كورپوراتيۆتىك، وليگارحيالىق ەكونوميكا قالىپتاستى. سونىڭ سالدارىنان جەكەلەگەن ادامدار بايىپ، ميلليونداعان ادام كەدەيلىكتە ءومىر ءسۇرىپ جاتىر. بۇل رەتتە، جان-جاقتى تەرگەۋ جۇرگىزىپ، ۇرلانعان جانە وففشورلارعا شىعارىلعان قارجىنىڭ بارلىعىن قازاقستاندىقتارعا قايتارۋ قاجەت. تاۋەلسىزدىكتىڭ العاشقى كەزەڭىندە، 90-جىلدارى كوپتەگەن ءىرى كاسىپورىن كۇلكىلى سوماعا جەكەشەلەندىرىلدى. وسىنداي كومپانيالاردىڭ اكتسيالارىن حالىققا وتكىزۋ تۋرالى ماسەلە وتە وزەكتى. بۇعان IPO ارقىلى قول جەتكىزۋگە بولادى. اكتيۆتەردى ۇلتتىق ەكونوميكانىڭ جاڭا نەگىزىنە اينالۋعا ءتيىس ورتا بيزنەس وكىلدەرى اراسىندا ءبولۋ كەرەك»، دەپ ەسەپتەيدى پارتيا باسشىلىعى.

تۇرعىنداردى الاڭداتاتىن ماسەلەلەردىڭ ءبىرى – تىعىز قۇرىلىس «جىرى». بۇل – تەك استانا مەن الماتى قالاسىنا ەمەس، ەلىمىزدىڭ بارلىق دەرلىك قالالارىنا ورتاق ماسەلە. وپپوزيتسيالىق پارتيا مۇشەلەرىنىڭ پىكىرىنشە، تىعىز قۇرىلىس قالا قاسىرەتىنە اينالىپ وتىر. ودان بولەك تويىمسىز قۇرىلىس سالۋشىلارعا ەڭ جاقسى جەر تەلىمدەرىنىڭ بەرىلەتىنى تاعى بار. قالا بەردى، اكىمدىكتەر يگەرۋگە باس جوس­پار بويىنشا مەكتەپ، بالاباقشا مەن اۋرۋحانالار سالىنۋعا ءتيىس جەرلەردى ۇلەستىرىپ وتىر. سالدارىنان تۇرعىندار الەۋمەتتىك ينفراقۇرىلىمنىڭ جوقتىعىنان زارداپ شەگەدى. بۇل پروبلەما پارتيانىڭ سايلاۋالدى باعدارلاماسىندا قامتىلماق.

پارتيا باسشىلىعى سىرتقى ساياسات ماسە­لەلەرىنە كەلگەندە قازاقستان اسكەري بلوك­تارعا قاتىسپايتىن، قولدامايتىن مەملەكەت رەتىندە بەرىك پوزيتسياسىن ساقتاۋى كەرەك دەپ ەسەپتەيدى. بۇل – بۇگىندە ورىن الىپ وتىرعان گەوساياسي جاعدايدا وتە وزەكتى. ولار­دىڭ پىكىرىنشە، باسقا مەملەكەتتەر ءبىزدىڭ ەسەبىمىزدەن بايىپ، ادال باسەكەلەستىك شارتتارىن بۇزىپ، ءوز وندىرۋشىلەرىنىڭ قىزىعۋ­شىلىقتارىن قورعايتىن جاعدايلاردا قاتاڭ ويىن ەرەجەلەرىن ورناتۋ كەرەك. بۇل رەتتە ستراتەگيالىق سالالاردا قازاقستان پروتەكتسيونيزم پوزيتسياسىن ۇستانۋى ماڭىزدى. «الدىمەن ەكونوميكا، كەيىن ساياسات» ستراتەگيا­سى ءتيىمسىز بولىپ شىقتى. پارتيالىق-ساياسي ءورىستى تولىققاندى رەفورمالاۋ قاجەت»، دەپ ەسەپتەيدى پارتيا باسشىلىعى.