قوعام • 02 اقپان، 2023

استانادا تاس وڭدەۋ ونەركاسىبى ونىمدەرىنىڭ كورمەسى ءوتتى

اتالعان كورمەگە يندۋستريا جانە ينفراقۇرىلىمدىق دامۋ مينيسترلىگى مەن وقۋ-اعارتۋ مينيسترلىگىنىڭ، سونداي-اق باسەكەلەستىكتى قورعاۋ جانە دامىتۋ اگەنتتىگىنىڭ، Samruk-Kazyna Construction كومپانياسىنىڭ، ۇلتتىق جوبالاۋشىلار قاۋىمداستىعى مەن تاس وڭدەۋ ونەركاسىبى كاسىپورىندارىنىڭ وكىلدەرى قاتىسىپ، بىلتىر اتقارىلعان جۇمىس قورىتىندىلارى مەن الداعى كەزەڭگە ارنالعان جوسپارلار تالقىلاندى، دەپ حابارلايدى Egemen.kz قر يدم ءباسپاسوز قىزمەتىنە سىلتەمە جاساپ.

Egemen Qazaqstan

قر يدم يندۋستريالىق دامۋ كوميتەتى قۇرىلىس يندۋسترياسى جانە اعاش وڭدەۋ ونەركاسىبى باسقارماسىنىڭ باسشىسى مۇحامەد انداكوۆتىڭ ايتۋىنشا، قازىر وتاندىق نارىقتا تاس ونىمدەرىن شىعاراتىن 15-تەن استام كاسىپورىن جۇمىس ىستەپ كەلەدى.

«تاس ونىمدەرىنىڭ وندىرۋشىلەرىنە قولداۋ كورسەتۋ ماقساتىندا بىلتىر ۇكىمەت «ۇلتتىق رەجىمنەن الىپ تاستاۋدى بەلگىلەۋ تۋرالى» قاۋلى شىعارعان ەدى. بۇل قاۋلى تەك قازاقستان اۋماعىندا تاس ونىمدەرىن شىعارۋمەن اينالىساتىن كاسىپورىندارعا عانا مەملەكەتتىك ساتىپ الۋ پروتسەسىنە قاتىسۋعا مۇمكىندىك بەرەدى»، دەدى م.انداكوۆ.

بۇل ورايدا ىشكى نارىقتاعى قۇرىلىس ماتەريالدارىنا دەگەن سۇرانىستى تولىق قامتىپ، يمپورت تاۋەلدىلىگىن تومەندەتۋ مەن باعانىڭ قۇبىلمالىعىن الدىن الۋ ءۇشىن 2026 جىلعا دەيىن جالپى قۇنى 1 180 ملرد تەڭگەگە 161 ينۆەستيتسيالىق جوبانى جۇزەگە اسىرۋ جوسپارلانىپ وتىر. وسى ارقىلى 15 مىڭنان استام ادامدى جۇمىسپەن قامتاماسىز ەتۋگە جول اشىلادى.

جوعارىدا كەلتىرىلگەن جوبالاردى تابىستى ىسكە اسىرۋ ءۇشىن وڭىرلىك اكىمدىكتەر جانە دامۋ ينستيتۋتتارىمەن، سونداي-اق ۇلتتىق كاسىپكەرلەر پالاتاسىمەن ماقۇلدانعان 2025 جىلعا دەيىنگى قۇرىلىس ونەركاسىبىندەگى جوبالاردى ىسكە اسىرۋعا ارنالعان جول كارتاسى ازىرلەنىپ، بەكىتىلدى.

گۇلشاحرا سانسىزباي