سيرەك كەزدەسەتىن اۋرۋلاردى انىقتاۋ مەن ەمدەۋدىڭ تاسىلدەرى تالقىلاندى

پەدياتريا جانە بالالار حيرۋرگياسى عىلىمي ورتالىعى مەن قر پەدياترلار وداعىنىڭ ۇيىمداستىرۋىمەن وتكەن شاراعا ەلىمىزدىڭ ءار وڭىرىنەن 80-نەن اسا مامان: پۋلمونولوگتار، پەدياترلار، ديەتولوگتار، گاستروەنتەرولوگتار، فيزيوتەراپەۆت-دارىگەرلەر، رەزيدەنتتەر، مەديتسينالىق جوو ستۋدەنتتەرىمەن قاتار، قازاقستان رەسپۋبليكاسىنىڭ بارلىق ايماقتارىنان سيرەك (ورفاندىق) اۋرۋلار بويىنشا وڭىرلىك ۇيلەستىرۋشىلەرى مەن ءار وبلىستىڭ دەنساۋلىق ساقتاۋ باسقارمالارىنىڭ وكىلدەرى قاتىستى.

شەبەرلىك دارىستەرىن رەسەيدىڭ جەتەكشى دارىگەرلەرى – پروفەسسور، «ن.پ.بوچكوۆ اتىنداعى مگعو» فمبعم-ءنىڭ گەنەتيكالىق ەپيدەميولوگيا زەرتحاناسىنىڭ باس عىلىمي قىزمەتكەرى ناتاليا كاشيرسكايا، رف دەنساۋلىق ساقتاۋ مينيسترلىگىنىڭ «ۇلتتىق مەديتسينالىق بالالار دەنساۋلىعىن زەرتتەۋ ورتالىعى» فمام-نىڭ بىلىكتى ماماندارى – ميكروبيولوگ اننا لازارەۆا، پروفەسسور، جوعارى  ساناتتى پۋلمونولوگ دارىگەر،  پۋلمونولوگيا ءبولىمىنىڭ مەڭگەرۋشىسى ولگا سيمونوۆا، پەدياتر، نۋتريتسيولوگ يننا سوكولوۆ، ەندوسكوپيالىق زەرتتەۋلەر ءبولىمىنىڭ مەڭگەرۋشىسى  ماكسيم لوحماتوۆ وتكىزدى. بۇل ادامداردىڭ بارلىعىنىڭ تاجىريبەسى، عىلىمي اتاق-دارەجەلەرى بار.

«وسىناۋ شارا ورتالىقتىڭ پۋلمونولوگيا ءبولىمىنىڭ 60 جىلدىق مەرەيتويىنا ارنالۋىمەن ماڭىزدى. ءبولىمنىڭ قۇرىلۋى مەن دامۋىنا اكادەميك كامال ورمانتاەۆ، پروفەسسور كۇلان وماروۆا، مۋنيرا بايجانوۆا سىندى باسقا دا ماماندار ۇلكەن ۇلەس  قوستى. پۋلمونولوگيا ءبولىمىنىڭ العاشقى مەڭگەرۋشىسى تەن ولگا دەنيسوۆنا بولدى. ءبولىم قۇرىلعالى بەرى  مۋكوۆيستسيدوزبەن اۋىراتىن بالالارعا ەرەكشە كوڭىل ءبولىنىپ، گەندىك اۋرۋلاردى انىقتاۋ جاقسارىپ كەلەدى. جاڭا ەمدەۋ تەحنولوگيالارىن ەنگىزۋدىڭ ارقاسىندا ناۋقاستاردىڭ جاعدايى جاقسارىپ، ءومىرى ۇزاردى. ەگەر بۇرىن مۋكوۆيستسيدوزدى بالالىق شاق كەزدەگى اۋرۋ دەپ سانالسا، قازىرگى تاڭدا بۇل دەرتكە شالدىققان بالالار ەسەيىپ، عۇمىرلارى  ۇزارىپ جاتىر»، دەيدى پەدياتريا جانە بالالار حيرۋرگياسى عىلىمي ورتالىعىنىڭ ديرەكتورلار كەڭەسىنىڭ ءتورايىمى ماريام وماروۆا.

«پەدياتريا جانە بالالار حيرۋرگياسى عىلىمي ورتالىعى» اق باسقارما توراعاسىنىڭ عىلىمي-يننوۆاتسيالىق قىزمەتتەر جونىندەگى ورىنباسارى ليازات مانجۋوۆا: «جىل سايىن اۋرۋحانادا ءارتۇرلى برونح-وكپە پاتولوگياسى بار 600-دەن استام بالاعا كومەك كورسەتىلەدى، 200-دەن استام تەلەمەديتسينالىق كەڭەستەر جۇرگىزىلەدى. ءبىزدىڭ ماماندار ەلىمىزدىڭ بارلىق ايماعىندا شەبەرلىك ساباقتار، مەديتسينالىق، كونسۋلتاتيۆتىك، ادىستەمەلىك كومەك كورسەتىپ كەلەدى. ەمدەۋ-دياگنوستيكالىق جۇمىستار حالىقارالىق ستاندارتتارعا ساي جوعارى دەڭگەيدە جۇرگىزىلەدى. پۋلمونولوگيا ءبولىمى بۇگىندە جاس مامانداردى دايىندايتىن جاقسى مەكتەپ بولسا، ءبىزدىڭ ورتالىق رەسپۋبليكا بويىنشا بالالار پۋلمونولوگتارىن دايىندايتىن بازاعا اينالدى. بۇگىنگى شارا وسى سالانى دامىتۋعا، كوركەيتۋگە ءوز ۇلەسىن قوسادى دەپ سەنەمىن»، دەيدى.

ەكى كۇندىك  شارادا  رەسەيلىك ماماندار مۋكوۆيستسيدوزدى ەمدەۋ مەن دياگنوستيكالاۋ، وكپە اسقىنۋلارى، فيزيوتەراپيا مەن تارگەتتى تەراپيا، دۇرىس تاماقتانۋ جانە مۋكوۆيستسيدوزعا شالدىققان بالالارعا دۇرىس كۇتىم جاساۋ بويىنشا كەڭەستەرىن بەردى. ەكىنشى كۇنى ماماندار ورتالىقتاعى جانە ايماقتاردان كەلگەن مۋكوۆيستسيدوزبەن اۋىراتىن 6 بالانى قاراپ، ەمدەۋ ءىس-شارالارىن بىرگە تالقىلادى.

قازىر قازاقستاندا رەسمي تۇردە مۋكوۆيستسيدوزعا شالدىققان 173 ناۋقاس تىركەلگەن. سيرەك كەزدەسەتىن ورفاندىق اۋرۋلار مۇگەدەكتىككە، ءومىردىڭ قىسقارۋىنا الىپ كەلۋى مۇمكىن. بۇگىنگى كۇنى سيرەك كەزدەسەتىن اۋرۋلاردىڭ 7 مىڭنان استام ءتۇرى بەلگىلى. كوپ جاعدايدا بۇل گەنەتيكالىق اۋرۋ، الايدا سيرەك كەزدەسەتىن اۋرۋلار اراسىندا ينفەكتسيالىق، اۋتويممۋندىق نەمەسە ۋىتتى سيپاتتاعى اۋرۋدىڭ تۇرلەرى دە بار. وكىنىشكە قاراي، سيرەك اۋرۋلاردىڭ  پايدا بولۋ سەبەپتەرى ءالى دە قۇپياسىن تولىق اشپاي كەلەدى. اۋرۋ بەلگىلەرى تۋا سالا، ياكي جۇرە كەلە ءبىلىنۋى مۇمكىن. ويتكەنى، سيرەك اۋرۋلاردىڭ كوپشىلىگىنىڭ باستى بەلگىلەرى باسقا اۋرۋلارعا دا ۇقسايدى.