اككى نوتاريۋستار اشكەرەلەندى

راس، ەلىمىزدە نوتاريۋستىڭ قىز­مەتىنە جۇگىنەتىندەر وتە كوپ. اسىرەسە باسپانا، كولىك ساتۋ، ساتىپ الۋ، قۇجات رەسىمدەۋ، مۇراگەرلىك، كەلىسىم-ءپاتۋا، سەنىمحات، شارت جاساسۋ سەكىلدى ازاماتتىق ىستەردىڭ بار­لىعى دا وسى نوتاريۋسقا بارىپ تىرە­لەدى. الايدا بۇل سالادا دا ءتۇرلى زاڭسىز­دىقتار بار. زاڭدىق تۇرعىدا كۇشى بار قۇجات­تى كۋالاندىراتىن نو­تا­ريۋستار زاڭسىز ارەكەتتەرگە جول بەرە­ت­ىنىن باس پروكۋراتۋرانىڭ تالداۋ جۇمىسىنان-اق اڭعارۋعا بولادى. جالپى، حالىقتا نوتاريۋس قىزمەتىنەن باستاپ ولاردى باقىلاۋ مەن ليتسەنزيا بەرۋ، الۋعا قاتىستى ساۋالدار جەتەرلىك…

ەستەرىڭىزگە سالساق، ەلىمىزدە اتقا­رۋ­شىلىق جازبا ينستيتۋتى 2016 جىلدان باستاپ ىسكە قوسىلعان بولاتىن. سودان بەرى جەڭىلدەتىلگەن تارتىپ­تە كوممۋنالدىق قىزمەتتەر ءۇشىن قارىزدار، جالاقى، شارتتار بويىن­­شا تۇسىنبەۋشىلىكتەر جانە تاعى باسقا داۋسىز تالاپتار وندىرىلە باستادى. ناتيجەسىندە، جازبا قارىزداردى ءوندىرىپ الۋ راسىمدەرى ەداۋىر جەڭىلدەپ، سوتتاردىڭ جۇكتەمەسى ازايعان ەدى. الايدا راسىمدەردىڭ قاراپايىمدىلىعىنا جانە نوتاريۋستاردىڭ تەرىس پايدالانۋىنا بايلانىستى ول بار­لىق «سۇر سىزبالاردىڭ» قۇرالىنا اين­العانى جاسىرىن ەمەس. جازبا قىلمىستىق جولمەن الىنعان اقشانى قولما-قول اقشاعا اينالدىرۋ ءۇشىن قولدانىلعان.

ماسەلەن، الماتى، استانا جانە قاراعاندى قالالارىندا مۇنداي زاڭ بۇزۋشىلىقتىڭ 13 فاكتىسى انىق­تالدى، وندا قارجى پيراميدالارىن قۇرۋعا قاتىسقان ۇيىمدار مەن ادام­داردان قارىزدار رەسمي تۇردە ءوندىرىلىپ الىنعان. الما­تىدا قارجى پيراميداسىنىڭ ۇيىمداس­تىرۋشى­لارى جالعان شارتتار بويىنشا سالىمشىلاردىڭ اقشاسىن الۋ جانە جىمقىرۋ ءۇشىن نوتاريۋستار ارقىلى 2 ملرد بورىشتى ءوندىرىپ الدى. پروكۋروردىڭ تالاپ قويۋى بويىنشا جازبالاردىڭ كۇشى جويىلدى.

سوت تارتىبىنەن تىس مەملەكەتتەن 63 جازبا بويىنشا مەملەكەتتىك ساتىپ الۋ شارتتارى بويىنشا 1،8 ملرد تەڭگە زاڭسىز ءوندىرىپ الىنعانىن اتاپ وتكەن ءجون. ونىڭ ىشىندە پروكۋرورلاردىڭ تالاپ قويۋلارى بويىنشا قۇنى 1،2 ملرد تەڭگەنى قۇرايتىن جازبالاردىڭ كۇشى جويىلدى. قارىزدار مەملەكەتتىك ساتىپ الۋ شارتىنىڭ مەرزىمى وتكەنىنە قاراماستان، ورىندالماعان جانە جسق مەن ساتىپ الۋ جوسپارلارىندا كوزدەلمەگەن جۇمىستار ءۇشىن، مەملەكەتتىك ساتىپ الۋ شارتتارىنا قوسىمشا كەلىسىمدەردى قازىناشىلىق ورگاندارىندا تىركەۋىنسىز، قابىلداۋ اكتىلەرى جانە باسقا دا راستايتىن قۇجاتتار بولماعان جاعدايدا ءوندىرىپ الىنعان.

ماسەلەن، الماتى وبلىسىندا ءبىر نوتاريۋس جەكە كومپانيانىڭ پايداسىنا تكش بولىمىنەن تىركەلمەگەن قوسىمشا كەلىسىم بويىنشا 410 ملن ءوندىرىپ العان (نەگىزگى شارتتا كوزدەلمەگەن جۇمىستارعا شارتتىڭ مەرزىمى اياقتالدى). سوتقا ونىڭ كۇشىن جويۋ تۋرالى تالاپ قويۋ ۇسىنىلدى.

م ۇلىك پەن اكتيۆتەردى باسقا مىندەتتەمەلەر بويىنشا ورىنداۋدان الىپ تاستاۋ ءۇشىن جالعان جالاقى قارىزدار ءوندىرىپ الىنعان (سەبەبى جالاقى ءبىرىنشى كەزەكتە ءوندىرىپ الىنادى). ەكى جىل ىشىندە پروكۋرورلار 5 ملرد تەڭگەگە 250 زاڭسىز جازبانىڭ كۇشىن جويۋعا قول جەتكىزدى.

ال قاراعاندى وبلىسىندا جشس-دان 333 ملن تەڭگەگە جالاقى بويىنشا جالعان قارىزداردى ءوندىرىپ الۋ تۋرالى 35 جازبا انىقتالىپ وتىر. بۇل رەتتە كاسىپورىننىڭ سالىقتار بويىنشا بورىشى 1،7 ملرد تەڭگەنى قۇرادى. بۇل ىسكە قاتىستى بارلىق جازبانىڭ كۇشى جويىلدى.

كەيبىر جاعدايلاردا جازبالاردى نوتاريۋستار ءوز وكىلەتتىكتەرىن ايقىن اسىرا پايدالانا وتىرىپ ىستەگەن. استانا، الماتى قالالارىندا، الماتى جانە جامبىل وبلىستارىندا نوتاريۋستار قارىزدى وتەۋ ەسەبىنەن كەپىل نىساناسى بولىپ تابىلمايتىن 40 كولىكتى زاڭسىز ءوندىرىپ العان. مۇنداي تالاپتار بويىن­شا جازبالار جازىپ بەرۋگە جول بەرىلمەيدى.

سونداي-اق پروكۋرورلار جالعان قۇجاتتار نەگىزىندە جازىلعان 1 ملرد تەڭگەگە 56 اتقارۋشىلىق جازبانى جانە پسيحياتريالىق ەسەپتە تۇرعان ازاماتتارعا قاتىستى 6 جازبانى انىقتادى. سوتتار پروكۋرورلاردىڭ 1 ملرد تەڭگەگە اتقارۋشىلىق جازبا­لاردىڭ كۇشىن جويۋ تۋرالى 17 تالاپ قويۋلارىن قاناعاتتاندىردى. قازىرگى تاڭدا 3 تالاپ قويۋ قارالۋ ساتىسىندا.