پايدالى نۇسقاۋلىق

اۆتورلاردىڭ ايتۋىنشا، پراكتيكالىق نۇسقاۋ­لىقتى دايىنداۋ قاجەتتىلىگى كوپتەگەن قىلمىس قۇرباندارىنىڭ ءتيىستى قورعانىسقا يە بولماۋىمەن بايلانىستى، سەبەبى جاپا شەگۋشىلەردى ادام ساۋداسىنىڭ قۇرباندارى رەتىندە انىقتاۋ ءاردايىم مۇمكىن ەمەس. پراكتيكالىق نۇسقاۋلىق مەملەكەتتىك قۇرىلىمدار مەن ۇكىمەتتىك ەمەس ۇيىمداردىڭ وكىلدەرىنە، جاتتىقتىرۋشىلار مەن وقۋ ۇدەرىسىن ۇيىمداستىرۋشىلارعا ارنالعان.

پرەزيدەنت جانىنداعى ادام قۇقىقتارى جونىندەگى كوميسسيانىڭ حاتشىسى تاستەمىر ابىشەۆتىڭ ايتۋىنشا، نۇسقاۋلىقتا ماسەلەنىڭ ءوزى جانە ونىڭ سەبەپتەرى تۋرالى كەڭ تۇسىنىك بەرىلگەن. «اتالعان سالاداعى قىلمىستار قاراستىرىلادى، ادام ساۋداسى مەن ەڭبەك كوشى-قونىنىڭ سەبەپ-سالدارلىق بايلانىستارى كورسەتىلەدى، ادام قۇقىقتارىن قورعاۋ جانە وسى جاعىمسىز قۇبىلىسپەن كۇرەسۋ سالاسىنداعى ۇلتتىق جانە حالىقارالىق نورماتيۆتىك-قۇقىقتىق بازا تالدانادى»، دەيدى ول.

ادام ساۋداسىنا قارسى ءىس-قيمىل جونىندەگى شارالاردى قابىلداۋ شەڭبەرىندە ەڭبەكتى قورعاۋ، دەنساۋلىق ساقتاۋ، ءبىلىم بەرۋ، زارداپ شەككەندەردى قورعاۋ جانە ولارعا كومەك كورسەتۋ جونىندەگى ديپلوماتيالىق ميسسيالار قىزمەتكەرلەرى ءۇشىن ناقتى نۇسقاۋلىقتار ازىرلەنگەن. اسىرەسە بالالار ساۋداسى مەن بالالار ەڭبەگىن پايدالانۋ فاكتىلەرىنىڭ الدىن الۋ بويىنشا ەڭبەك ينسپەكتورلارى مەن ءبىلىم بەرۋ جۇيەسىنىڭ ءرولى ەرەكشە اتاپ ءوتىلدى.

جالپى، ەلىمىزدە ادام ساۋداسىنىڭ ەڭ كوپ تارالعان ءتۇرى – ايەلدەردى جىنىستىق قاناۋ، سونداي-اق پريتوندار ۇيىمداستىرۋ مەن جەڭگەتايلىق جاساۋ. ەر ادامدار ادەتتە، ەڭبەك نارىعىندا جاپا شەگەدى. سونىمەن قاتار جاڭا تۋعان نارەستەلەر مەن جاس بالالاردى ساتۋ فاكتىلەرى دە ازايماي تۇر. تاستەمىر ابىشەۆتىڭ ايتۋىنشا، بۇگىندە ەلىمىزدە العاش رەت ادام ساۋداسىنا قارسى كۇرەس تۋرالى زاڭ جوباسى ازىرلەنىپ جاتىر. زاڭ جوباسىندا شەتەلدىك ميگرانتتاردىڭ ەڭبەك قاتىناستارىن رەتتەۋ ماسەلەسى قاراستىرىلىپ، وزگە دە ماڭىزدى باعىتتار قامتىلعان. زاڭ قولدانىسقا ەنگىزىلسە، ادام قۇقىعى تۋرالى ەرەجەلەر حالىقارالىق ستاندارتتارعا ساي بولماق. ادام ساۋداسىنىڭ الدىن الۋ جانە اتالعان قىلمىسقا قارسى ىمىراسىز كۇرەستە الەمدىك تاجىريبەنىڭ ماڭىزى زور.

ەلىمىزدە 2016 جىلدان بەرى ادام ساۋداسىنىڭ قۇرباندارىنا اتاۋلى الەۋمەتتىك كومەك كورسەتىلەدى. الايدا بۇل كومەكتى تەك قازاقستان ازاماتتارى، ەلىمىزدە تۇرعىلىقتى تۇرىپ جاتقان شەتەلدىك ازاماتتار مەن قانداستار الا الادى. ال ءتۇرلى سەبەپتەرمەن قازاقستانعا ۋاقىتشا كەلگەن ەڭبەك ميگرانتتارى ادام ساۋداسىنىڭ قۇربانى بولعاندا بۇل كومەكتەن قاعىلادى. حالىقارالىق ساراپشىلار بۇل ماسەلەنى ءجيى كوتەرىپ ءجۇر. جالپى، بۇل باعىتتاعى زاڭنامالىق قۇجاتتاردىڭ بولماۋى قازاقستاننىڭ كەيبىر حالىقارالىق رەيتينگتەردە تومەنگى ساتىدان كورىنۋىنە تۇرتكى بولعانى راس. بىلىكتى مامانداردىڭ قاتىسۋىمەن ازىرلەنىپ جاتقان زاڭ جوباسى وسى سياقتى تۇيتكىلدەردىڭ ءتۇيىنىن تارقاتادى دەگەن سەنىم مول.