تەگىن ءبىلىم الادى

قورعانىس مينيسترلىگى ازاماتتاردىڭ مەرزىمدى اسكەري قىزمەتىن وتەۋگە ىنتاسىن ارتتىرۋ ماقساتىندا جاڭا جوبانى قولعا الىپ وتىر. ول مەرزىمدى اسكەري قىزمەتىن وتكەرگەن بارلىق ازاماتتارعا ۇلتتىق بىرىڭعاي تەستىلەۋدى ەسەپكە الماي، اسكەري بورىشىن وتەگەن سوڭ كۇنتىزبەلىك جىل ىشىندە جوعارى وقۋ ورىندارىنا تۇسۋگە مۇمكىندىك بەرەدى.

ورتالىق كوممۋنيكاتسيالار قىزمەتىندە وتكەن بريفينگتە قورعانىس ءمينيسترىنىڭ كەڭەسشىسى ايگۇل تولەمباەۆا بىلتىردان باستاپ ءتيىستى ەرەجەلەرگە وزگەرىستەر ەنگىزۋ جۇمىستارى باستالعانىن مالىمدەدى.

«بىرىنشىدەن، اسكەري بورىشىن وتەگەن جىگىتتەر كۇنتىزبەلىك جىل ىشىندە ۇبت-نى ەسەپكە الماي، ەلىمىزدىڭ بارلىق جوعارى وقۋ ورىنىنا تۇسە الادى. سونداي-اق اقىلى تۇردە ءبىلىم الۋعا ءوتىنىش بەرۋگە بولادى. عىلىم جانە جوعارى ءبىلىم ءمينيسترىنىڭ بۇيرىعىمەن بەكىتىلگەن قابىلداۋدىڭ ۇلگىلىك قاعيدالارىنا ءتيىستى وزگەرىستەر ەنگىزىلدى. بۇل ەرەجەنى ادىلەت مينيسترلىگى بەكىتتى جانە قازىر تىركەۋ ساتىسىندا»، دەيدى ا.تولەمباەۆا.

بۇل باستامانى ەلىمىزدەگى 40 جوعارى وقۋ ورنى قولداپ، جىلىنا بارلىعى 3 مىڭ گرانت بولىنەدى دەپ كۇتىلىپ وتىر. وسىلايشا، اسكەرگە شاقىرىلعان ءاربىر ونىنشى سارباز وقۋعا تەگىن تۇسۋگە مۇمكىندىك الادى. بۇل تەك قارۋلى كۇشتەردىڭ قۇرامالارى مەن بولىمدەرىندە عانا ەمەس، باسقا دا اسكەري قۇرىلىمدا – شەكارا قىزمەتى، ۇلتتىق ۇلاندا قىزمەت ەتكەن جاۋىن­گەرلەرگە دە قاتىستى.

بەلگىلى بولعانداي، جاۋىنگەرلىك دايارلىق سالاسىندا ەڭ جوعارى ناتيجە كورسەتكەن اسكەر قاتارىنا شاقىرىلعان ساربازدار ۋنيۆەرسيتەت تاراپىنان 100 پايىز جەڭىلدىكپەن وقۋعا تۇسۋگە مۇمكىندىك الادى. جوعارى وقۋ ورىندارىمەن ءتيىستى كەلىسىمدەر جاسالعان. ولاردىڭ تىزىمىمەن دەپارتامەنتتىڭ رەسمي سايتىندا تانىسۋعا بولادى.

جاۋىنگەرلىك دايارلىقتىڭ نەگىزگى پاندەرى: مەملەكەتتىك-قۇقىقتىق، تاكتيكالىق، بارلاۋ، اتىس، تەحنيكالىق، ينجەنەرلىك، دەنە شىنىقتىرۋ، اسكەري-مەديتسينالىق، دەنە شىنىقتىرۋ دايارلىعى، كولىك جۇرگىزۋ، راديو جانە حيميا-بيولوگيالىق قورعاۋ سالاسىندا، بايلانىس بويىنشا دايارلىق، جالپى اسكەري جارعىلار. دايىندىقتىڭ وسى تۇرلەرى فيزيكالىق كۇشتى عانا ەمەس، ينتەللەكتۋالدى كۇشتى دە قاجەت ەتەدى. «سوندىقتان دا اسكەري قىزمەتشىلەر جوعارى ناتيجە كورسەتسە، بۇل ولاردىڭ جوعارى دەڭگەيى مەن جوعارى وقۋ ورىندارىندا ودان ءارى ءبىلىم الۋعا دايىن ەكەنىن كورسەتەدى»، دەيدى سپيكەر.

اي سايىن جاۋىنگەرلىك دايارلىقتىڭ بارلىق ءپانى بويىنشا اسكەري قىزمەتشىنىڭ اعىمداعى باعالارى­نىڭ رەيتينگى شىعارىلادى. اسكەري بولىمدەر مەن مەكەمەلەردىڭ كومانديرلەرى مەرزىمدى قىزمەتتىڭ اسكەري قىزمەتشىسىنە اي سايىن جەكە رەيتينگ جاسايدى. رەيتينگ جالپىعا قولجەتىمدى بولىمشە ورنالاسقان جەردە جيناقتاۋ جۇيەسى بويىنشا ىلىنەدى. ء«ار سارباز ماماندىقتى جانە وقۋعا تۇسكىسى كەلەتىن ءۇش ۋنيۆەرسيتەتتى تاڭدايدى. ىرىكتەۋدىڭ ىڭعايلىلىعى مەن اشىقتىعى ءۇشىن جوو ەسەبىنەن ءبىلىم الۋ ءۇشىن مەرزىمدى قىزمەتتىڭ اسكەري قىزمەتشىلەرى اراسىندا كونكۋرستىق ىرىكتەۋ وتكىزۋ بويىنشا «سروچنيكي 2.0» تسيفرلىق پلاتفورماسى ىسكە قوسىلدى. بۇل جۇيەدە مەرزىمدى اسكەري قىزمەتشىلەردىڭ باعالارى كورسەتىلەدى. ونى وزگەرتۋگە نەمەسە جويۋعا مۇمكىندىك جوق. جۇيە اۆتوماتتى تۇردە جوعارى وقۋ ورىندارىنا تاراتىلادى. ورىنداردى ءبولۋ ءۇشىن كوميسسيا قۇرىلادى. ونىڭ وتىرىسى جىلىنا ەكى رەت وتكىزىلەدى. رەيتينگ ناتيجەلەرىمەن كەلىسپەگەندەر اپەللياتسياعا بەرە الادى»، دەدى ايگۇل تولەمباەۆا.

سونىمەن قاتار قورعانىس مينيسترلىگى ەكىنشى دەڭگەيلى بانكتەرمەن اسكەري بورىشىن وتەپ جۇرگەن­دەرگە «نەسيەلىك دەمالىس» بەرۋ ماسەلەسىن پىسىقتاپ جاتىر. سونداي-اق مينيسترلىك ساربازداردىڭ قاۋىپ­سىزدىگى ماسەلەسىن دە قولعا الماقشى. ماسەلەن، اعا وفيتسەرلەردىڭ جاۋاپكەرشىلىگىن ارتتىرىپ، اتا-انالار كوميتەتىمەن تىعىز بايلانىس ورناتۋ جوسپاردا بار. پسيحولوگتەر دە جاۋىنگەرلەرمەن جيىرەك كەزدەسىپ، مورالدىق قولداۋ كورسەتپەك.