جاساندى ينتەللەكت R&D-زەرتحاناسى

زەرتحانانى اشۋداعى ماقسات – روبوتوتەحنيكا سالاسىنداعى عىلىمي-زەرتتەۋ ينستيتۋتتارىنىڭ زاماناۋي جەتىستىكتەرىن ۋنيۆەرسيتەتتەردىڭ وقۋ ۇدەرىسىمەن ىقپالداستىرۋ جانە دامىتۋعا ىقپال ەتۋ. جاساندى ينتەللەكت تەحنولوگيالارى ونەركاسىپتى اۆتوماتتاندىرۋ، زاماناۋي قۇرال-جابدىقتار ءتىلىن يگەرۋ، سونداي-اق بىرلەسكەن عىلىمي-ادىستەمەلىك زەرتتەۋلەر جۇرگىزىپ، ازىرلەمەلەردىڭ ناتيجەلەرىن كوممەرتسيالاندىرۋعا نەگىزدەلگەن.

ءو.جولداسبەكوۆ اتىنداعى مەحانيكا جانە ماشيناتانۋ ينستيتۋتىنىڭ ديرەكتورى اماندىق تولەشوۆتىڭ ايتۋىنشا، وقۋ-زەرتتەۋ زەرتحاناسى سوڭعى ەكى-ءۇش جىلدا عىلىمي جۇمىستار ناتيجەسىندە جاسالعان روبوتتار­دان قۇرىلىمدانعان. زەرتحانا جاستاردى عىلىمعا ­باۋلي وتىرىپ، روبوتتاردى وقۋ ۇردىسىنە ەنگىزۋدى ماقسات ەتەدى. پلاتفورماداعى بارلىق روبوتتى ستۋدەنتتەر ءبىلىم الۋ كەڭىستىگىندە ەركىن پايدالانا الادى.

وسى ينستيتۋتتىڭ عىلىمي قىزمەتكەرلەرى يگور گريتسەنكو جانە نۇرجان تولەباەۆ مەديتسينا سالاسىندا قولدانىلاتىن روبوتتار جۇمىسىمەن تانىس­تىردى. روبوتتار كەشەنى ءدارى تاسىمالداۋمەن قاتار ينتەرفەيس ارقىلى ناۋقاستىڭ اعىمداعى جاع­دايىن مەملەكەتتىك تىلدە حابارلاۋ مۇمكىندىگىنە يە. دارى­گەرلەر ناۋقاستان تۇسكەن اقپاراتقا بايلانىستى ەمدەۋ جاعىن قاراستىراتىن بولادى. روبوتتاردىڭ كومەگىمەن ناۋقاستىڭ اۋىز قۋىسىنان پروبا الۋعا، سونىمەن قاتار بولمەنى زالالسىزداندىرۋعا دا مۇمكىندىك بار.

زاماناۋي پلاتفورمادا روبوتتى كەشەندى تانىس­تىرعان ماماندار باسقارۋ جۇيەلەرىن باعدارلامالاۋعا جانە جاساندى ينتەللەكت الگوريتمدەرىن قۇرۋعا ارنالعان تۇپنۇسقالىق مانيپۋلياتورلاردىڭ مۇمكىن­دىكتەرىن اتاپ ءوتتى. مەحانيكا جانە روبوت تەحنيكا سالا­سىنداعى ەلەكتروندى مۋلتيمەديالىق وقۋلىقتار كەشەنى ستۋدەنتتەرگە تىڭ اقپاراتتاردى زەرتتەۋگە، قۇرىلىمداۋعا كومەكتەسەدى.

الماتى