ميۋنحەندە قازاقستان-باۆاريا ينۆەستيتسيالىق دوڭگەلەك ۇستەلى ءوتتى

گەرمانيا قازاقستاننىڭ ەو-داعى ماڭىزدى سەرىكتەستەرىنىڭ ءبىرى. ەلدەر اراسىندا ساۋدا-ەكونوميكالىق ىنتىماقتاستىقتى تەرەڭدەتۋگە، ينۆەستيتسيالاردى ىنتالاندىرۋعا جانە ءوزارا قورعاۋعا باعىتتالعان بىرقاتار ۇكىمەتارالىق كەلىسىمدەر بار. 

2022 جىلدىڭ 11 ايىندا قازاقستان مەن گەرمانيا اراسىنداعى تاۋار اينالىمى 2،36 ملرد دوللارعا جەتتى. بۇل وتكەن جىلمەن سالىستىرعاندا (2،2 ملرد دوللار) 7%-عا جوعارى. 2005 جىلدان بەرى گەرمانيانىڭ قازاقستان ەكونوميكاسىنا سالعان تىكەلەي شەتەلدىك ينۆەستيتسياسى شامامەن $5،3 ملرد-تى قۇراعان، ونىڭ باسىم بولىگى وڭدەۋ ونەركاسىبىنە باعىتتالدى. قازاقستان-گەرمانيا ينۆەستيتسيالىق جوبالارىنىڭ ءتىزىمى جالپى سوماسى $4 ملرد دوللاردان اساتىن 52 جوبادان تۇرادى.

ءىس-شارانى قازاقستان رەسپۋبليكاسىنىڭ گەرمانياداعى توتەنشە جانە وكىلەتتى ەلشىسى نۇرلان ونجانوۆ، باۆاريانىڭ ەكونوميكالىق كونسۋلتاتيۆتىك كەڭەسىنىڭ قۇرمەتتى پرەزيدەنتى وتتو ۆيسحوي جانە گەرمانيا ەكونوميكاسىنىڭ شىعىس كوميتەتىنىڭ اتقارۋشى ديرەكتورى ميحاەل حارمس اشتى.

نەگىزگى باياندامانى قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى الماس ايداروۆ جۇرگىزىپ، وندا ەكىجاقتى قارىم-قاتىناستاردىڭ دامۋىنداعى وڭ ديناميكاعا توقتالدى. گەرمانيانىڭ ىسكەر توپتارىن ەنەرگەتيكا، شيكىزات ماتەريالدار، ونەركاسىپ جانە ماشينا جاساۋ سەكتورلارى، كولىك-لوگيستيكا سەكتورى، اگروونەركاسىپتىك كەشەن، ءبىلىم جانە عىلىم، IT سالالارىنداعى جوبالارعا ينۆەستيتسيا سالۋعا شاقىردى. 

«KAZAKH INVEST» ۇك» اق باسقارما توراعاسى مەيىرجان يۋسۋپوۆ كومپانيانىڭ قىزمەتى، قازاقستان رەسپۋبليكاسى ۇكىمەتى بەرگەن پرەفەرەنتسيالار تۋرالى ايتىپ، نەمىس كاسىپكەرلەرىنىڭ سۇراقتارىنا دا جاۋاپ بەردى. گەرمانيا بيزنەس وكىلدەرى قازاقستاننىڭ كولىك-لوگيستيكالىق الەۋەتى، ينۆەستيتسيالىق جوبالاردى جۇزەگە اسىرۋ جانە قونىس اۋدارۋ ءۇشىن قازاقستان ەكونوميكاسىنىڭ پەرسپەكتيۆالىق باعىتتارىنا ەرەكشە قىزىعۋشىلىق تۋدىردى. 

قازاقستاندىق دەلەگاتسيانىڭ باۆارياعا ساپارى بارىسىندا سىرتقى ىستەر ءمينيسترىنىڭ ورىنباسارى الماس ايداروۆ پەن باسقارما توراعاسى «KAZAKH INVEST» ۇك» اق باسقارما توراعاسى مەيىرجان يۋسۋپوۆ نەمىس كومپانيالارىمەن بىرقاتار ەكىجاقتى كەزدەسۋلەر وتكىزدى.

EOS GmbH كومپانياسىنىڭ اعا ۆيتسە-پرەزيدەنتى ماركۋس گلاسسەرمەن كەزدەسۋدە تاراپتار ماتەريالدارمەن (پولياميد، مەتالل ۇنتاقتارى) جۇمىس ىستەۋ بويىنشا عىلىمي-يننوۆاتسيالىق قۇزىرەت ورتالىعىن قۇرۋ جوباسىن جۇزەگە اسىرۋ مۇمكىندىگىن تالقىلادى. ايتا كەتۋ كەرەك، «EOS GmbH» مەتالل جانە پلاستماسسا بۇيىمدارىن ونەركاسىپتىك 3D باسىپ شىعارۋ سالاسىنداعى الەمدىك كوشباسشى. كەزدەسۋ بارىسىندا EOS GmbH كومپانياسى مەن ق.ي.ساتباەۆ اتىنداعى قازاق ۇلتتىق زەرتتەۋ تەحنيكالىق ۋنيۆەرسيتەتى اراسىندا سەرىكتەستىك تۋرالى كەلىسىمگە قول قويىلدى.

كەزدەسۋ بارىسىندا GS-Bavaria GmbH باسقارۋشى ديرەكتورى سەرگەي شميتكە دە قازاقستاندا جوبالاردى جۇزەگە اسىرۋعا دايىن ەكەندىگى تۋرالى ايتتى. اتاپ ايتقاندا، كومپانيا بىرەگەي تەحنولوگيا بويىنشا پوليەتيلەن بالاۋىز ونىمدەرى مەن نانوبولشەكتەردەن جاسالعان بۇيىمداردى شىعارۋدى جوسپارلاپ وتىر. GS Bavaria GmbH ونىمدىلىگى جوعارى نانو-ماتەريالدار مەن فۋنكتسيونالدىق قوسپالاردى وندىرۋگە ماماندانعان جانە ونەركاسىپتىك قولدانۋ ءۇشىن جاڭا بۋىن ۆولفرام نەگىزىندەگى كومپوزيتتىك ماتەريالداردى ازىرلەيدى. 

شارانى قازاقستان رەسپۋبليكاسىنىڭ گەرمانياداعى ەلشىلىگى «KAZAKH INVEST» ۇك» اق-مەن بىرلەسىپ باۆاريانىڭ ساۋدا-ونەركاسىپ پالاتاسى مەن گەرمانيا ەكونوميكاسىنىڭ شىعىس كوميتەتىنىڭ قولداۋىمەن ۇيىمداستىردى.