الەۋمەتتىك جوبالاردىڭ الەۋەتى

ا.كولگىنوۆ اقكول اۋدانىندا بالالاردى قولداۋ ورتالىعىندا بولدى. وندا ەلدە العاش رەت «فوستەرلىك وتباسىلار» كاسىبي بالا اسىراپ الۋ وتباسىلارىن قۇرۋ جونىندەگى قاناتقاقتى جوبا ىسكە قوسىلدى.  

– بۇل – وتە ماڭىزدى جوبا جانە ونى ساپالى ىسكە اسىرۋ ءۇشىن بارلىق كۇش-جىگەرىمىزدى جۇم­ساۋىمىز قاجەت. ءبىزدىڭ مىندەتىمىز – بالالاردى الەۋمەتتەندىرۋ. اتا-اناسىنىڭ قامقورلىعىنسىز قالعان بالالار وتباسىندا تۇرىپ تاربيەلەنۋگە ءتيىس. وقۋ-اعار­تۋ مينيسترلىگى تاراپىنان دا، نورماتيۆتىك بازالار بويىنشا دا قولداۋ كورسەتىلەدى، – دەدى ۆيتسە-پرەمەر.

سونداي-اق ا.كولگىنوۆ «اۋىل­دىق دەنساۋلىق ساقتاۋدى جاڭ­عىرتۋ» جوباسى اياسىندا اقكول اۋداندىق اۋرۋحاناسىنىڭ قىز­مەتىمەن تانىستى. عيمارات كۇردەلى جوندەۋ مەن جاڭعىرتۋدى قاجەت ەتەدى. اقمولا وبلىسىندا ۇلتتىق جوبا اياسىندا مەدي­تسي­نالىق-سانيتارلىق العاشقى كومەك كورسەتۋدىڭ 38 وبەكتىسى سالىنادى، بىرقاتار اۋدانارالىق اۋرۋحانادا كۇردەلى جوندەۋ مەن جاڭعىرتۋ جۇمىستارى جۇرگىزىلەدى. سونىمەن قاتار مەديتسينالىق كومەككە قولجەتىمدىلىكتى ارتتىرۋ ماقساتىندا كوكشەتاۋ قالاسىندا 630 ورىنعا ارنالعان كوپبەيىندى وبلىستىق اۋرۋحانا سالىنادى.

جالپى 2023-2025 جىلدارى ەل وڭىرلەرىندە جانە شالعاي اۋىلداردا 650 مەديتسينالىق-سانيتارلىق العاشقى كو­مەك كورسەتۋ وبەكتىسى سالىنادى. بيىل مەديتسينالىق-ساني­تا­ر­لىق العاشقى كومەك كور­سەتۋدىڭ 300-دەن استام نىسا­نىنىڭ قۇرىلىسى باستالادى، سونداي-اق 30-دان استام ورتالىق اۋداندىق اۋرۋحانادا كۇردەلى جوندەۋ جانە رەكونسترۋكتسيالاۋ جۇمىستارى جۇرگىزىلەدى. بۇل شارالار «التىن ساعات» قاعيداتى بو­يىنشا جەرگىلىكتى جەرلەردە مە­ديتسينالىق كومەك الۋعا مۇم­كىندىك بەرەدى.

كوكشەتاۋ قالاسىندا التاي كولگىنوۆ «Eurasia Group Kazakhstan» جشس بازاسىندا دۋالدى وقىتۋ باعدارلاماسىن جۇزەگە اسىرۋ بارىسىمەن تانىس­تى. اگروتەحنيكالىق كوللەدج ستۋدەنتتەرى ءوزارا ىنتىماقتاستىق جونىندەگى مەموراندۋم اياسىندا كاسىپورىندا كاسىبي تاجىريبەدەن ءوتىپ، ودان ءارى جۇمىسقا ورنالاسادى. اقمولا وبلىسى اكىمدىگىنىڭ اقپاراتى بويىنشا دۋالدى وقىتۋ نىسانى 28 كوللەدجدە قولدانىلادى، اتالعان تەحنولوگيا بويىنشا 4 مىڭنان استام ستۋدەنت ءبىلىم الادى. 

«اۋىل اماناتى» باعدار­لا­ما­سىن جۇزەگە اسىرۋ اياسىندا ا.كولگىنوۆ ءسۇت ونىمدەرىن شىعا­­راتىن «گورمولزاۆود» جشس-دا بولىپ، جوبانىڭ ال­عاشقى قاتىسۋشىلارىمەن كەزدەستى. باعدارلاما اياسىندا كاسىپ­ورىن شيكىزاتتى جوباعا قاتىسۋشىلاردان ساتىپ الادى. اقمولا وبلىسىنىڭ اكىمى ەرمەك مارجىقپاەۆتىڭ ايتۋىنشا، بيىل باعدارلاماعا قاتىسۋشىلاردى نەسيەلەۋ ءۇشىن مەملەكەت تاراپىنان اقمولا وبلىسىنا 1،2 ملرد تەڭگە ءبولىندى. وسى قاراجات اياسىندا اۋىلدىق ەلدى مەكەندەردە جانە شاعىن قالالاردا جاڭا بيزنەس-جوبالاردى اشۋعا جانە قولدانىستاعى جوبالاردى كەڭەيتۋگە شامامەن 250 نەسيە بەرۋ جوسپارلانىپ وتىر.

ا.كولگىنوۆ مەملەكەت باس­شىسىنىڭ تاپسىرماسى بويىنشا اۋىل تۇرعىندارىنىڭ تابىسىن ارتتىرۋ جونىندەگى جوبا 2023 جىلدان باستاپ وڭىرلەردىڭ ەرەكشەلىكتەرى مەن الەۋمەتتىك-ەكونوميكالىق دامۋىن ەسكەرە وتىرىپ، بارشا ەل توڭىرەگىندە كەڭەيتىلەتىنىن اتاپ ءوتتى. وسى ماقساتتا رەسپۋبليكالىق بيۋدجەتتەن 50 ملرد تەڭگەدەن استام قارجى ءبولىندى.  

سونداي-اق وبلىستا «جايلى مەكتەپ» ۇلتتىق جوباسىن جۇزە­گە اسىرۋ بويىنشا جۇمىس جۇرگى­­زى­لۋدە. اقمولا وبلىسىندا 2023-2025 جىلدارى 26 500 وقۋشىعا ارنالعان 20 مەكتەپ سالۋ كوزدەلگەن.

جۇمىس ساپارىنىڭ سوڭىندا سولتۇستىك قازاقستان، پاۆلودار، قوستاناي وبلىستارى اكىمدەرى ورىنباسارلارىنىڭ، دەنساۋلىق ساقتاۋ، ەڭبەك جانە الەۋمەتتىك قورعاۋ، وقۋ-اعارتۋ، اۋىل شا­رۋا­­شىلىعى، مادەنيەت جانە سپورت، ۇلتتىق ەكونوميكا ۆيتسە-مي­نيستر­­لەرىنىڭ قاتىسۋىمەن كەڭەس ءوتتى. وندا الەۋمەتتىك مەملە­كەت­­تىك باعدارلامالاردى ساپالى جۇزەگە اسىرۋ بويىنشا بىرقا­تار تاپ­سىرما بەرىلدى.