مەجدۋرەچەنسك كەنتىنىڭ ماڭىنداعى كۇدىكتى قۇرىلىس پوليتسەيلەردىڭ نازارىن اۋدارعان. باقىلاۋ بارىسىندا بەلگىسىز ادامداردىڭ ءبىر گەكتار جەردى تاس قورشاۋمەن قورشاپ, اۋىل شارۋاشىلىق قاجەتتىلىكتەرى ءۇشىن قاجەت ەمەس جابدىقتار اكەلىپ, ترانسفورماتوردى ەلەكتر جەلىسىنە قوسقانى انىقتالعان.
كەيىن, پرەكۋرسورلار قۇيىلعان 20 كانيستردى تاسىمالداۋ كەزىندە پوليتسەيلەر ەكى جەرگىلىكتى تۇرعىندى ۇستادى. ۇستالعانداردىڭ ايعاقتارى بويىنشا بۇرىنعى فەرمانىڭ ءبىر گەكتار جەر ۋچاسكەسىن ولاردىڭ سەرىگى 18 ميلليون تەڭگەگە ساتىپ العان.
«ۋچاسكە بيىك قورشاۋمەن بوتەن كوزدەردەن تولىعىمەن جاسىرىلعان, تۇرۋعا ارنالعان ۋاقىتشا ءۇي-جاي, مونشا, گاراج سالىنعان. ۇستالعاندار بۇركەمە رەتىندە قولدانباق بولعان مالعا ارنالعان قورا جابدىقتالعان. زەرتحاناعا ارنالعان بولەك ءۇي-جاي سالىنعان. تەمىر ەسىكتىڭ ار جاعىندا بىرنەشە تاراپقا بولىنگەن بولمەلەر بار, ولاردىڭ ارقايسىسى جاساندى جەلدەتۋمەن جانە قۋاتتى سۇزگىلەرمەن جابدىقتالعان», دەلىنگەن حابارلامادا.
قر قك-ءنىڭ 296-بابى بويىنشا ەسىرتكىنى وتكىزۋ ماقساتىنسىز اسا ءىرى مولشەردە زاڭسىز دايىنداعانى, وڭدەگەنى جانە تاسىمالداعانى ءۇشىن قىلمىستىق ءىس قوزعالدى. ول ءۇشىن جەتى جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان.
