ەلدە 16 مىڭ ادام اليمەنت تولەمەي ءجۇر

بالانى اسىراۋ ماسەلەسىن بەيبىت جولمەن شەشۋ كەز كەلگەن ەرلى-زايىپتىلاردىڭ قولىنان كەلمەيدى. بۇل جاعدايدا داۋ سوتتا شەشىلەدى. ادىلەت مينيسترلىگىنىڭ مالىمەتىنشە، قازىر قازاقستاندا بالالارىنا 14 ميلليارد تەڭگەگە جۋىق قارىزى بار 80 مىڭنان استام ادام بار. سوت ورىنداۋشىلارىندا 305 مىڭعا جۋىق اتقارۋشىلىق قۇجات وندىرىستە جاتىر. وڭىرلەر تۇرعىسىنان العاندا بورىشكەرلەردىڭ ەڭ كوپ سانى استانا مەن الماتى قالالارىندا تىركەلگەن.

زاڭگەرلەردىڭ ايتۋىنشا، تولەم كولەمىن ازايتۋ ءۇشىن ناقتى تابىسىن ادەيى تومەندەتەتىن جاعدايلار دا كوپ.

«كوبىنەسە ماسەلە سوت ورىنداۋشىلارىنىڭ اليمەنتپەن اينالىسقىسى كەلمەيتىندىگىندە، ويتكەنى اليمەنت تۋرالى اتقارۋشىلىق ءىس جۇرگىزۋ مەملەكەتتەن تولەنەدى، بۇل وتە از سوما»، دەيدى ادۆوكات يليا لۋنەۆ.

زاڭ ءتىپتى جۇمىسسىزداردى اليمەنت تولەۋگە مىندەتتەيدى. سونىمەن قاتار، بورىشكەردىڭ ۇستىنەن قىلمىستىق ءىس قوزعاۋ ءۇشىن 3 اي عانا اقشا اۋدارماۋ جەتكىلىكتى. ەڭ جاقسى جاعدايدا قوعامدىق جۇمىستارعا تارتىلۋى مۇمكىن، ەڭ جامانى - 2 جىلعا دەيىن باس بوستاندىعىنان ايىرۋ. 2022 جىلى سوتتار جۇزدەن اسا قازاقستاندىقتى قىلمىستىق جاۋاپكەرشىلىككە تارتقان.

«ماسەلەن، ەگەر بورىشكەر ءبىر جىل بۇرىن ايىنا 500 مىڭ تەڭگە تابىس تاپسا، ال كىرىستەر تۋرالى انىقتامادا ول 70 مىڭ تەڭگە الاتىنىن كورسەتسە، وندا سوت ورىنداۋشىسى بۇل فاكتىنى تەكسەرۋگە باستاماشى بولا الادى. ءبىز شوتتاردى تەكسەرەمىز، شىعىنداردى قاراستىرامىز. ەگەر اليمەنت تولەۋشى تۇرعىن ءۇيدى جالداۋ اقىسىن تولەسە، نەسيەسىن وتەسە، كۇنىنە 10-20 مىڭ تەڭگە جۇمساسا، وندا ول ءوزىنىڭ ناقتى تابىسىن جاسىرادى دەگەن كۇدىككە ىلىنەدى. مۇنداي جاعدايلاردا ءبىز اقپارات جيناپ، ىشكى ىستەر ورگاندارىنا ۇسىنىس جىبەرەمىز. جەتكىلىكتى اقپارات بولعان جاعدايدا وعان قىلمىستىق ءىس قوزعالۋى مۇمكىن»، دەپ ءتۇسىندىردى استانا قالاسى بويىنشا جەكە سوت ورىنداۋشىلارىنىڭ وڭىرلىك پالاتاسى باسشىسىنىڭ ورىنباسارى سالامات ادىلبەك ۇلى.

گۇلشاحرا سانسىزباي