ساياسي ناۋقانعا – تياناقتى ازىرلىك

ونىڭ ايتۋىنشا، بىلتىر قوعامدىق قابىلداۋعا 134 مىڭ ادام ءوز مۇڭ-مۇقتاجىن، ارىز-شاعىمىن جەتكىزسە، سوڭعى جەتى-سەگىز كۇننىڭ وزىندە 500-گە تارتا ۇسىنىس-تىلەك كەلىپ تۇسكەن. قازىر قۇجاتتا باسىمدىق بەرە­تىن سالالار انىقتالىپ جاتىر. بۇعان قوسا ساي­لاۋالدى باعدارلامادا ەكونوميكا، ەكولوگيا جانە ەنەرگەتيكاداعى وزەكتى ماسەلەلەر قامتىلادى.

– بۇل جۇمىسقا ءماجىلىستىڭ ەكس-دەپۋ­تات­تارى، پارتيا جانىنان قۇرىلعان كەڭەستەردىڭ مۇشەلەرى، بىلىكتى ساياساتتانۋشىلار جانە ەكو­نوميستەر تارتىلدى. سايلاۋالدى باعدار­لاماعا ۇسىنىستار حالىقتان تىكەلەي جينالادى. پارتيانىڭ جارعىسىنا سايكەس، باعدار­لامالىق قۇجاتتاردى قابىلداۋ سەزدىڭ قۇزىرىندا. جەر-جەردەگى پارتيالاستاردىڭ تالقىلاۋىنان جانە ساراپشىلاردىڭ تالداۋىنان وتكەن سايلاۋالدى باعدارلامانىڭ تۇپكىلىكتى نۇسقاسى الداعى سەزدە قابىل­دانادى. ال جول كارتاسىندا الداعى 5 جىلعا ارنالعان ناقتى ءىس-شارالار ءتىزىمى بەكىتىلەدى. قۇجات «قاشان، قانداي جەردە مەكتەپ سالىنادى؟»، «ماسەلەنى قالاي شەشەمىز؟» دەگەن ساۋالداردىڭ نەگىزىندە جاساقتالعان كون­تسەپتۋالدى تاسىلدەردەن تۇرادى، – دەدى ە.بەيسەنباەۆ.

اتقارۋشى حاتشى پارتيانىڭ رەس­پۋب­ليكالىق قوعامدىق قابىلداۋ بولمەسىنىڭ جۇ­مىسىمەن دە تانىستى. ورتالىق مەڭ­گە­رۋشىسى ءاليا سادىرباەۆا سايلاۋ تۋرالى زاڭعا سايكەس، پارتيانىڭ قوعامدىق قابىل­داۋلارى حالىققا كومەك جانە كەڭەس بەرۋ جۇ­مىسىنىڭ توقتاتىلعانىن ايتتى. بۇعان دەيىن ازاماتتاردىڭ تالاپ-تىلەكتەرى قوعام­دىق قابىلداۋلاردان بولەك Call-ورتالىقتار، پارتيانىڭ سايتى مەن ەلەكتروندى پوشتاسى، ەgov.kz ەلەكتروندى ۇكىمەت پورتالى، WhatsApp مەسسەنجەرى ارقىلى قابىل­دانىپتى.

«Amanat»-تىڭ اتىنان سايلاۋعا تۇسەتىن دەپۋتاتتاردىڭ ەسىمى دە پارتيا سەزىندە بەلگىلى بولادى. ۇمىتكەرلەردى تاڭداۋدا «اشىق­تىق، ادىلدىك جانە جاڭارۋ» ءپرينتسيپى نەگىزگە الىنباق.

– كانديداتتاردى تاڭداۋدىڭ وزىندىك الگوريتمى بار. ءار باستاۋىش پارتيا ۇيىمى ءوزىنىڭ ەڭ بەلسەندى دەگەن ۇمىتكەرىن ۇسىنادى. دە­لەگاتتاردىڭ اراسىندا دا كانديداتتار بولۋى مۇمكىن. ودان كەيىن اۋداندىق جانە وبلىس­تىق كونفەرەنتسيالاردا داۋىس بەرۋ ناتيجەسىندە كىمنىڭ ۇلەسى كوبىرەك بولسا، ءبىز سول ازاماتتى سايلاۋعا كانديدات رەتىندە تىركەيمىز. بۇكىل پروتسەسس اشىق ءارى ءادىل وتەدى. ەڭ بەلسەندى، ءبىلىمدى، بىلىكتى ازاماتتار وسى تىزىمگە ەنۋى كەرەك. بۇعان قوسا ءار ءتۇرلى جاس وكىلدەرى، جاستار، ايەلدەر، ءتۇرلى ماماندىق يەلەرى بولۋى ءتيىس. جالپى، وتكەن شاقىرىلىممەن سالىستىرعاندا تىزىمدە جاڭا ەسىمدەر كوپ بولادى، – دەدى پارتيا وكىلى.

ەلنۇر بەيسەنباەۆتىڭ ايتۋىنشا، «اma­nat» بارلىق دەپۋتاتتىق مانداتقا ءوز كان­ديداتتارىن ۇسىنۋدى جوسپارلاپ وتىر. جالپى، ماجىلىستەگى 98 مانداتتىڭ 69-ى پارتيالىق ءتىزىم بويىنشا، 29-ى ءبىر مانداتتى وكرۋگتەر بويىنشا بولىنەدى. سونىمەن قاتار رەسپۋبليكا بويىنشا 223 ءماسليحاتتا سايلاۋ ءوتىپ، وندا 3415 دەپۋتات سايلانادى.

پارتيا ۇجىمى ساياسي ناۋقانعا 20 مىڭ بايقاۋشى مەن 10 مىڭ سەنىمدى وكىلىن دا­يىنداپ قويعان. ءارى الداعى ۇگىت جۇمىسىنا جەر-جەردە سايلاۋ شتابتارىن قۇرىپ، قىزۋ دايىندىقتى باستاپ كەتكەن.

– ءبىز اشىق تا تارتىستى باسەكەگە دا­يىنبىز. باعىتىمىز – ادىلەتتى قازاقستان، ماقساتىمىز – مەملەكەتتىڭ تۇتاستىعى، تاۋەل­سىزدىكتىڭ باياندى بولۋى، – دەپ تۇيىندەدى ە.بەي­سەنباەۆ.

ايتا كەتەيىك، ەلىمىزدىڭ بارلىق وڭىرىندە پارتيانىڭ 243 قوعامدىق قابىلداۋ ورتا­لىعى بار. بىلتىر تۇرعىنداردىڭ 90 پايى­زىنىڭ تالاپ-تىلەگى وڭ شەشىلسە، قالعان 10 پايىزىنىڭ ارىز-شاعىمى قارالىپ جاتىر. وتىنىشتەردىڭ باسىم بولىگى الەۋمەتتىك سالا، تۇرعىن ءۇي-كوممۋنالدىق شارۋاشىلىق، ەڭ­بەك قاتىناستارى، مەديتسينالىق قىز­مەت­تەر­دىڭ ساپاسى جانە تاعى باسقا تۇيىتكىلدى ماسە­لەلەرگە قاتىستى.