اپتا بويى ەلىمىزدىڭ ءار وڭىرىنەن كەلگەن ينجەنەرلىك-ساپەرلىك روتالاردىڭ كومانديرلەرى ءبىلىم دەڭگەيىن تولىقتىرىپ, جەرگىلىكتى جەرلەر مەن نىسانداردى ميناسىزداندىرۋ جۇمىسىن ۇيىمداستىرۋداعى داعدىلارى مەن ماشىقتارىن جەتىلدىرۋدە. ميناسىزداندىرۋ ورتالىعىنىڭ تاجىريبەلى ماماندارى وقۋ سىنىپتارىندا جانە «جاعالاۋ» پوليگونىندا ساباقتار وتكىزدى.
– ساپەرلەر ءاردايىم ءىس جۇزىندە جانە اشىق جەرلەردە, ەلدى مەكەندەردە ارەكەت ەتۋگە دايىن. ءبىز مينادان تازارتۋ سالاسىنداعى, ونىڭ ىشىندە وق-ءدارى قويمالارىنداعى وقيعالاردىڭ سالدارىن جويۋ جونىندەگى جۇمىستى ۇدايى تاجىريبەمىزدە جالعاستىرىپ كەلەمىز. شەتەلدىك ارىپتەستەرىمىزدىڭ تاجىريبەسىن دە ارقاشان زەردەلەيمىز. ناتيجەسىندە, جيىنداردا ءبىز وفيتسەرلەردى وق-دارىلەر مەن جارىلعىش زاتتاردى ىزدەستىرۋدى, زالالسىزداندىرۋدى, تاسىمالداۋدى جانە كادەگە جاراتۋدى بارىنشا ءتيىمدى جانە قاۋىپسىز ۇيىمداستىرۋعا ۇيرەتۋگە تىرىستىق, – دەدى ميناسىزداندىرۋ ورتالىعىنىڭ باستىعى پودپولكوۆنيك مۇحامەد-ءالي بايعۇلوۆ.
زاماناۋي ارنايى ينجەنەرلىك جابدىقتار مەن قوسالقى قۇرالداردى, ونىڭ ىشىندە tEODor روبوتتەحنيكالىق كەشەنىن, جيناقى مينا ىزدەگىشتەردى, ءپورتاتيۆتى رەنتگەن جۇيەسىن, سۋپەرۆيزوردى, بارلاۋشى دروندى, راديو كەدەرگى گەنەراتورىن, كەرەك-جاراقتار مەن جابدىقتاردى دۇرىس پايدالانۋعا ەرەكشە نازار اۋدارىلىپ وتىر.
مينادان تازارتۋ ينجەنەرلىك اسكەرلەر قىزمەتىنىڭ ماڭىزدى باعىتى ەكەنىن اتاپ وتكەن ءجون. ونىڭ وزەكتىلىگى ساپەرلەردىڭ پوليگونداردى قارۋلى كۇشتەردىڭ جاۋىنگەرلىك وقۋىنا دايىنداۋىنان, ءتۇرلى ءىس-شارالاردىڭ قاۋىپسىزدىگىن قامتاماسىز ەتۋدەن, سونداي-اق بۇۇ بىتىمگەرلىك ميسسيالارىندا سۇرانىسقا بارىنشا يە بولۋىنان كورۋگە بولادى.
