قىسقى سپورت • 29 قاڭتار، 2023

تاۋ شاڭعىسىن قالايتىندار كوپ

ەلىمىزدىڭ تاۋ شاڭعىسى كۋرورتتارىنا كەلگەن تۋريستەر سانى 1،5 ملن دەيىن وسكەن. جىل سايىنعى ءوسىم 20 پايىزدى قۇراپ وتىر. مادەنيەت جانە سپورت مينيسترلىگى جۇمىس ىستەپ تۇرعان نىساندارعا تۇسكەن شامادان تىس جۇكتەمەنى ازايتۋ ءۇشىن جاڭا نىسانداردى اشۋعا باستاماشى بولماق.

فارحات قايرات ۇلى

ايتا كەتەيىك، بۇگىندە ەلىمىزدەگى تاۋ شاڭعىسى تۋريستەرىنىڭ سانى جاعاجاي تۋريستەرىنىڭ سانىمەن بىردەي. سونداي-اق اتالعان تۋريزم ءتۇرىن ۇلكەن ەكونوميكالىق تيىمدىلىك پەن ايرىقشا كىرىس كوزى رەتىندە قاراۋعا بولادى. تاۋ شاڭعىسى ءتۋريستى ورتاشا ەسەپپەن كۇنىنە 250 دوللار، ياعني جاعاجاي تۋريستىنە قاراعاندا 5 ەسە كوپ قارجى جۇمسايدى.

– الايدا قازىرگى تاڭدا جۇمىس ىستەپ تۇرعان كۋرورتتاردا ارتىق جۇكتەمە بايقالىپ وتىر. مىسالى، «شىمبۇلاق» كۋرورتىندا مەرەكە جانە دەمالىس كەزىندە وتە كوپ جۇكتەمە كۇنىنە 12،5 مىڭ ادامدى، ال وڭتايلى جۇكتەمە كۇنىنە 6 مىڭ ادامدى قۇرايدى. وسىعان بايلانىستى قازاقستاندا تاۋ شاڭعىسى ءتۋريزمىنىڭ جاڭا نىساندارىن اشۋىمىز كەرەك، – دەدى مادەنيەت جانە سپورت مينيسترلىگىنىڭ تۋريزم سالاسىنا ارنالعان القا وتىرىسىندا ۆەدومستۆو باسشىسى اسحات ورالوۆ.

مەملەكەت باسشىسى الماتى قالاسىنىڭ جۇرتشىلىعىمەن كەزدەسۋدە تاۋ-كەن كلاستەرىن كەشەندى دامىتۋ قاجەتتىگىن اتاپ وتكەن بولاتىن. سوندىقتان كۋرورتتاردى اسپالى جولدارمەن ءبىر ەكوجۇيەگە قوسۋ، سونداي-اق جۇمىس ىستەپ تۇرعان وبەكتىلەردى كەڭەيتۋ قاجەتتىلىگى تۋىندايدى.

– ءبىز ينۆەستورلارعا ءتۇرلى جەڭىلدىك ۇسىنىپ، اسپالى جولداردى، راتراكتار مەن قار اتاتىن زەڭبىرەكتەرگە كەتكەن شىعىننىڭ 25 پايىزعا دەيىنگى كولەمىن وتەۋگە نيەتتىمىز. سونىمەن قاتار تاۋ شاڭعىسى كۋرورتتارىنا قاجەتتى قارمەن جابدىقتاۋدىڭ تۇتاس جۇيەسىنە دە وسىنداي وتەۋ تەتىگىن قاراستىرۋ جوسپارلانىپ وتىر، – دەدى مينيستر.