بۇيرەكتەگى تاستى الۋدىڭ جاڭا ءتاسىلى

ەندوۋرولوگيالىق وپەراتسيالاردى ون جىلدان بەرى جاساپ كەلە جاتقان دارىگەرلەر بۇعان دەيىن ۇگىتۋ ارقىلى قۋىق پەن نەسەپ­اعار­داعى تاستاردى عانا الىپ تاستاي الاتىن. قاجەتتى ەندوسكوپيالىق قۇرىلعى بول­ماعاندىقتان بۇيرەك استاۋىنداعى ۇلكەن تاستاردى الۋ مۇمكىن بولماي كەلگەن.

كۇردەلى وپەراتسيانى جاساپ شىققان حيرۋرگ-ۋرولوگ جاسۇلان ءامىرجانوۆتىڭ ايتۋىنشا، ەندى بۇيرەككە بايلانعان تاستى الۋ ءۇشىن ءبۇيىردى بۇرىنعىداي 20 سانتيمەتر كەسىپ وپەراتسيا جاساۋ قاجەت ەمەس. ونى كولەمى 8 مم بولاتىن شاعىن تەسىك ارقىلى دا الىپ شىعۋعا مۇمكىندىك بار.

– اشىق وپەراتسيا جاساعان ناۋقاس ءبىر ايدان كەيىن، كەيدە بىرنەشە ايدان كەيىن عانا وڭالا باستايدى. كەيدە كەسكەن جەرىنىڭ جاراسى اسقىنىپ كەتۋى دە مۇمكىن. ال جاڭا تاسىلمەن جاسالعان وپەراتسيادان كەيىن مۇنداي تاۋەكەل بولمايدى. ءبىز تەسىككە ارنايى ەندوسكوپيالىق قۇرال سۇعىپ، تاستى لازەرمەن ۇگىتەمىز. ودان كەيىن درەناجدىق تۇتىكشە ورناتىپ، 2-3 كۇن وتكەن سوڭ الىپ تاس­تايمىز. وپەراتسيانى باس-اياعى 40 مي­نۋت­تىڭ ىشىندە جاساپ شىعامىز. ناۋقاس ەسىن ءبىلىپ جاتادى. بىراق ج ۇلىنىنا اننەس­تەزيا سالامىز، سوندىقتان ءبىز وپەراتسيا جاساپ جاتقاندا ەشتەڭە سەزبەي قالادى، – دەيدى جاسۇلان ءامىرجانوۆ.

بۇرىن مۇنداي وپەراتسيا جاساتۋ ءۇشىن ناۋ­قاستار استاناعا نەمەسە رەسەيگە باراتىن. وبلىستىق اۋرۋحانا دارىگەرلەرى ديامەترى 5 مم بولاتىن تاعى ءبىر نەفرو­سكوپ­تىڭ كەلۋىن كۇتىپ وتىر. بۇل قۇرال ناۋقاستىڭ وپەراتسيا­دان كەيىنگى وڭالۋ كەزەڭىندە جارانىڭ اس­قىنىپ كەتۋ مۇمكىندىگىن ازايتا تۇسەدى.

ۋرولوگيا ءبولىمىنىڭ مەڭگەرۋشىسى سەرگەي بەلوۋسوۆتىڭ ايتۋىنشا، وڭىردە جىلىنا 700-دەن اسا ادام ۋرولوگيالىق پاتولوگيادان وتەدى ەكەن. ولاردىڭ 35-40 پايىزى – نەسەپ-تاس اۋرۋلارىمەن اۋىراتىن ناۋقاستار.

قوستاناي وبلىسى