ولاردىڭ اراسىندا:
«قويان كەلىپ شاي قويدى,
ايۋ باپپەن قوي سويدى.
ازىرلەگەن تاماعىن,
تورعاي تارتىپ
جەپ قويدى»,
دەگەن وتىرىك ولەڭ جولداپ, كۇلكىگە قارق قىلعان ايناز جانەس تە بار.
بالعىن قالامگەرلەردى رەداكتسيادا اقىن, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى, «وتان», «قۇرمەت» وردەندەرىنىڭ يەگەرى اقۇشتاپ باقتىگەرەەۆا باستاعان اعا-اپالارى قارسى الىپ, ولاردىڭ شىعارماشىلىق ساپارىنا اق جول تىلەدى. ء«بىز دە كوكورىم كەزىمىزدە گازەتكە حات جولدايتىنبىز. سوسىن «قاشان شىعادى ەكەن؟» دەپ تاعاتسىزدانا كۇتىپ جۇرەتىنبىز. قالام ۇستاۋ – كەز كەلگەنگە بەرىلمەيتىن قاسيەت. سۋرەت سالۋ, ولەڭ جازۋ ونەرگە, ومىرگە قۇشتارلىقتان باستالادى. مەن «ورال ءوڭىرىنىڭ» بالاۋسا تىلشىلەرىنىڭ جىلدان-جىلعا قاتارى كوبەيىپ كەلە جاتقانىنا قۋانىشتىمىن. بۇگىن سەندەرگە انا, اجە رەتىندە اق باتامدى بەرۋگە كەلدىم. «جولدارىڭ اق بولسىن, عۇمىرلارىڭ ۇزاق بولسىن! جىرلايتىن تاقىرىپتارىڭ تۋعان جەر بولسىن, تۋعان ەلدىڭ اسپانىن بۇلت تورلاماسىن! اقجايىقتىڭ اتىرابى سەندەردى ارماننىڭ اسقارىنا اتتاندىرار تۇعىر بولسىن!», دەدى اقىن.
سونىمەن تەرەكتى اۋدانى شاعاتاي اۋىلىندا تۇراتىن كاۋسار ناۋرىزعالي – «تۋعان ەل», تەرەكتى اۋدانى ءجاڭاومىر اۋىلىندا تۇراتىن سابينا جىلقىشى – «باقىتتى بالالىق شاق», وسى اۋىلدىڭ تاعى ءبىر ورەنى ايناز جانەس «ۇشقىر قيال» اتالىمدارى بويىنشا ماراپاتتالدى. تەرەكتى اۋدانى اقسوعىم اۋىلىندا تۇراتىن نۇرقانات سىرىم «ازامات» اتالىمىنىڭ جۇلدەسىن يەلەندى. بايتەرەك اۋدانى وركەن اۋىلىنان اسىل سالىمجانقىزى مەن ىڭكار عازيز «مەيىرىم» جانە «بالعىن بوياۋ» اتالىمدارى بويىنشا ماراپاتتالدى. جاڭاقالالىق ءازيز اڭسابەكوۆ « ۇلى مارتەبەلى تاۋەلسىزدىك» اتالىمىن ەنشىلەدى. ورال قالاسىنداعى №45 مەكتەپ وقۋشىلارى ارسەن ماحامبەت «تابيعات جاناشىرى», ال ءامىر ساپاراليەۆ «تانىم تەرەزەسى» اتالىمى بويىنشا ۇزدىك دەپ تانىلدى.
«اينالايىن» بالالار شىعارماشىلىعى بايقاۋىنىڭ جەڭىمپازدارىنا ارداگەر ۇستاز م.بەرگەن جانە ق.ەسەندياروۆ, ع.جانبوزوۆ, ە.ەسەنعاليەۆ, س.توقمامبەتوۆ سىندى ازاماتتار دەمەۋشى بولعان.
باتىس قازاقستان وبلىسى
