وتباسىندا – 36 بالا

رۋستام شۋكۋروۆ پەن مۋززاما مانسۋروۆانىڭ باس قوسىپ، شاڭىراق كوتەرگەنىنە 30 جىلدان اسىپتى. ەكەۋى دە ۇيەلمەلى-سۇيەلمەلى بالا-شاعاسى بار ۇلكەن وتباسىندا وسكەن. بۇگىندە تۋعان ۇلدارى يۋلداش پەن شەرزود ەرجەتىپ، جەكە وتاۋ قۇرىپ، ۇلكەن ازامات بولدى. ەكى اعاسىنا ەركەلەپ وسكەن شاكيراسى دا بويجەتىپ قالدى، بيىل 16-عا تولدى.

– قىزىم شاكيرا كىشكەنتاي كەزىندە مەنىمەن وينايتىن ەشكىم جوق، ءىشىم پىستى دەگەندى ءجيى ايتاتىن. ءوزىم التى قۇرساق كوتەردىم، ءۇش نارەستەم شەتىنەپ كەتتى. قى­زىم­­نىڭ الگى سوزدەرى كوپكە دەيىن كوڭىل­دەن كەتپەي تۇرىپ الدى. اقى­رى وتاعاسى ەكەۋمىز اقىل­داسا كەلە، بالالار ۇيىنەن بالا اسىراپ الۋدى ۇيعاردىق. ءاۋ باس­تا ءبىر-ەكى بالا اسىراپ الىپ، سونىمەن شەكتەلگىمىز كەلگەن. بىراق بالالار ۇيىنە كەلىپ، كىشكەنتاي بوبەكتەردى كورىپ، تىلدەسىپ كورگەن سوڭ، جەتى بالانى بىردەي اسىراپ ال­­دىق. كەيىن ولارعا تاعى قو­سىل­دى. اللاعا شۇكىرشىلىك، بالا­لارىم­­نىڭ بارلىعىنا ءتاۋبا دەي­مىن. ەش­قاشان جانىم قينالىپ، رەنجىگەن ەمەسپىن، – دەيدى مۋززاما.

كوپبالالى وتباسى بۇعان دەيىن شاعىن دۇكەن ۇستاپتى. ودان كەيىن كوتەرمە باعامەن جە­مىس-جيدەك ساتۋعا كوشتى. جەمىس-جيدەكتەردىڭ كوبى – شۋكۋروۆتار وتباسىنىڭ ءوز باقشاسىندا وسكەن تابيعي ونىم­­دەر. سوندىقتان بۇل ءۇيدىڭ توڭازىت­قىشى دا ۇنەمى ءتۇر­لى جەمىس-جي­دەككە تولىپ تۇرا­دى. بالا­لار­دىڭ جەگەنى الدىندا، جەمە­­گەنى ارتىندا.

– بالالارىمنىڭ ءبارىن ءوز بالامداي كورەم. ەشقايسىسىنىڭ قو­لىن قاقپاي، قاناتتىعا قاقتىر­ماي، تۇمسىقتىعا شوقىتپاي ماپەلەپ باعىپ-قاعىپ وتىرمىز. شىنىمدى ايتسام، ءبىزدىڭ تاعى بالا اسىراپ العىمىز كەلەدى. ءبىر عانا مىسال، جاقىندا سولتۇستىك قازاقستان وبلىسى ساۋمالكول بالالار ۇيىنەن سەگىز بالانى اسىراپ العىمىز كەلدى. ارنايى بارىپ، ءوز نيەتىمىزدى بىلدىردىك. ودان كەيىن دە ءجيى بارىپ تۇردىق. جەمە-جەمگە كەلگەندە، بالالار ءۇيىنىڭ باسشىلىعى مەن ءۇي قامقورشىلارى كەدەرگى كەلتىر­دى. مىنە، ەكى جىل ءوتتى. سول بالالار ءالى بالالار ۇيىندە تۇرىپ جاتىر، – دەيدى رۋستام شۋكۋروۆ.

كوپبالالى وتباسى كۇنىنە 30 بولكە نان ساتىپ الادى ەكەن. ەرلى-زايىپتىلاردىڭ ايتۋىن­شا، بالالاردىڭ كۇندەلىكتى اس-اۋقاتىن ازىرلەۋ قيىن ەمەس. مۋززاما قىزدارىن اس ازىرلەۋگە ارالاستىرماي، تاماقتى ءوزى دايىندايدى ەكەن. ۇلكەن بولعاندىقتان، بۇل ۇي­دەگى تاماق تا ارنايى قۇرىلعىلار­دىڭ كومەگىمەن پىسەدى. سوندىقتان كوپبالالى انا قىزدارىم اس ازىرلەپ ءجۇرىپ بىردەمەگە ارانداپ قالار دەپ قورقادى.

بۇگىندە بۇل ءۇيدىڭ ۇلكەنى كاتيا تاياۋدا 18 جاسقا تولدى. ءۇش جاسىنان باستاپ بالالار ۇيىندە تاربيەلەنگەن بويجەتكەننىڭ ءوز وتباسىن تاپقانىنا ءبىر جىل بولىپتى. قازىر ستۋدەنت. جوعارى وقۋ ورىندارىنىڭ بىرىندە ونەر فاكۋلتەتىندە ءبىلىم الىپ جات­قان كاتيا بولاشاقتا تەاتر ءارتىسى بولعىسى كەلەدى.

– مۇنداعى جاعدايىمىز بالالار ۇيىمەن سالىستىرعاندا، الدەقايدا جاقسى. اتا-انامىز – وتە مەيىرىمدى جاندار. قىسقى دەمالىسقا كەلدىم. باۋىرلارىمدى ساعىنىپ قالىپپىن. شاعىن سىي­لىقتار تارتۋ ەتىپ، ءبارىن قۋان­تىپ قويدىم، – دەيدى كاتيا.

قازىر رۋستام مەن مۋزامما تار­بيەلەگەن 8 بالا ءار قالاداعى جو­عارى وقۋ ورىندارىندا وقيدى. ءۇي­دىڭ كەنجەسى ءازيزا – 6 جاستا. كەلەسى جىلى ءبىرىنشى سىنىپقا بارادى.

ستاتيستيكا مالىمەتىنە سەنسەك، ەلىمىزدە ۇزىن سانى 107 بالالار ءۇيى بار ەكەن. بۇل مەكەمەلەردە 4 606 بالا تاربيەلەنىپ جاتىر. كەيىنگى بەس جىل ىشىندە 795 وتباسى 1 153 بالا اسىراپ العان.

قوستاناي وبلىسى