اسىلدىڭ سىنىعى

وتكەن جىلى مۋزەيگە 55 جىل تولدى. جارتى عاسىردان استام ۋاقىت ساقتالعان جادىگەرلەر تاۋ-تۇلعانىڭ ءومىر جولى مەن ەلدىك جولىنداعى ەڭبەكتەرىنەن سىر شەرتەدى. مۋزەيدەگى مۇرالار جىل سايىن تولىعىپ وتىرادى. وسىنداي قۇندى جادىگەرلەرمەن تولىعۋ ءساتى 2014 جىلى اكادەميك الكەي مارعۇلاننىڭ پەر­زەنتى دانەل الكەيقىزىنىڭ باياناۋىل اۋدانىنا كەلۋ ساپارىندا بول­عان ەدى. ول كوپ جىل بويى كو­زىنىڭ قاراشىعىنداي ساقتاعان، قۇربىسى، الماتى كون­سەر­ۆاتوريا­سىندا وقىپ ءجۇرىپ، 1964 جىلى كەنەتتەن قايتىس بول­عان ءماريام قانىشقىزى سات­باەۆانىڭ جەكە زاتتارىن مۋزەيگە اكەلىپ تاپسىردى.

سوناۋ ءبىر زاماننان سىر شەر­­تەتىن جادىگەرلەر بۇگىندە مۇرا­جاي سورەسىندە تۇر. اتاپ ايتساق، ءماريام قانىشقىزىنىڭ جوعارعى وقۋ ورنىنداعى سىناق كىتاپشاسى، ستۋ­دەنتتىك بيلەتى، دارىستەردى جاز­­عان داپتەرلەرى، كۇن­­دەلىگى، بەت ورامالى، ما­نيكيۋر زاتتارى، ساناتوريالىق كىتاپ­شاسى، قول ساعاتى، ءاميانى، پورت­فەلى، بىلعارى قولعابى، ت.ب. جەكە زاتتارى بار.

«دوسسىز ءومىر – تۇزسىز اس» دەمەكشى، قاراپ تۇرساق، سول كەزدەگى ادامداردىڭ شىنايى دوس­تىعى، مەيىرىمى ءبىر بولەك دۇنيە، وسكەلەڭ ۇرپاققا ونەگە دەۋگە بولادى. ەلۋ جىلدان اسا ۋا­قىت وتسە دە، قۇر­بىسىنىڭ وسى­ناۋ زاتتارىن بۇگىنگى كۇنگە دەيىن ساقتاپ، اكەسىنىڭ مۋزەيىنە جەتكىزگەن دانەل ال­كەيقىزىنا جەرلەستەرىنىڭ اتىنان ۇلكەن العىس ايتامىز.

ەسكە سالساق، دانەل ال­كەي­قىزى بۇگىندە اكادەميك ءا.مار­­­عۇلان اتىنداعى حالىق­ارا­لىق قوردىڭ ۆيتسە-پرەزيدەنتى، «ول­جاباي باتىر» قوعامدىق قو­رىنىڭ مۇشەسى، الماتى قا­لا­سىندا تۇرادى. اكادەميك ق.سات­باەۆ مۋزەيىمەن تىعىز باي­لانىستا. وتكەن جىلى الما­تى قالاسىنداعى اكادەميك ق.ي.سات­باەۆ اتىنداعى ۋنيۆەرسيتەتىنە ءۇش كۇندىك كوشپەلى كورمەمەن بارعانىمىزدا ارنايى كەلىپ، اق تىلەگىن ايتىپ ەدى.

جۋىردا تۋعان ەلى دانەل ال­كەيقىزىن قوشەمەتتەپ، «بايان­اۋىل اۋدانىنىڭ قۇرمەتتى ازاماتى» اتاعىن بەردى. اسىل­دىڭ سى­نىعى ىسپەتتەس عالىم ۇرپاعى كە­رەكۋلىكتەردىڭ مەرەيىن ءوسىردى.

سانسىزباي ساپارعاليەۆ،

اكادەميك ق.ي.ساتباەۆتىڭ باياناۋىل مەموريالدىق مۋزەيىنىڭ قىزمەتكەرى

پاۆلودار وبلىسى،

باياناۋىل اۋدانى