قازاندىق ينۆەستوردىڭ قامقورلىعىنا ءوتتى

ەستەرىڭىزدە بولسا، وبلىس اكىمى دانيال احمەتوۆ جوندەۋ جۇ­مىستارى ءۇش كۇن ىشىندە اياق­تالادى دەگەن. دەمەك 23 قاڭتار قايتا قالپىنا كەلتىرىلىپ، كومىر قازاندىققا ءوز جولىمەن ءتۇسۋى كەرەك ەدى. الايدا جۇمىس جوس­پارداعىداي ەمەس، كەشىكتى.

– كومىر بەرۋ تراكتىسىندە جۇمىس توقتاۋسىز جۇرگىزىلىپ جاتىر. جۇمىسشىلار كۇن-تۇنگە، سۋىققا قاراماي جۇمىس ىستەپ ءجۇر. مەحانيكالىق جانە ەلەكتر جاعى از ۋاقىت ىشىندە جوندەلدى. ايتا كەتەيىن دەگەنىم، كومپانيا 19 قاڭتار كۇنى 600 مەتر لەنتا تاپسىرىس بەردى. بىراق جەتكىزۋشىنىڭ جاۋاپسىزدىعىنان لايىقتى لەنتا كەلمەدى. سودان ءبىز باسقا لەنتا ىزدەۋگە كىرىستىك. ونىڭ ءبارى ۋاقىت. ءيا، 22 قاڭتار كۇنى جۇمىستى اياقتاپ قويۋىمىز كەرەك ەدى، – دەپ ءتۇسىندىردى وبلىس اكىمىنىڭ ورىنباسارى ەرجان نۇرباەۆ.

جوندەۋ جۇمىستارىن جەدەلدەتۋ ءۇشىن 22 ادامنان تۇرا­تىن بريگادالار ءبىر-ءبىرىن الماستىرىپ، ناقتى كەستەگە ساي اركىم ءوز ۋچاسكەسى مەن جۇمى­سى­نا جاۋاپ بەرەدى. جۇمىسقا جى­لۋ ستانسالارىنىڭ، قۇرى­لىس فيرمالارىنىڭ جانە «كازتسينك» كومپانياسىنىڭ ەڭ­بەك­كەرلەرى تارتىلعان.

ايتا كەتسەك، ءورت بولعان كۇنى قازاندىق مازۋتقا كوشىرىلگەن. كەيىن جۇيەدەگى تەمپەراتۋرانى كوتەرۋ ءۇشىن شەشىمىن تاۋىپ، قازاندىقتارعا كومىردى كرانمەن كوتەرىپ سالىپ وتىر.

بىلىكتى ماماندار جۇمىلىپ ءجۇرىپ، كومىر بەرۋ تراكتىسىن قالپىنا كەلتىرەدى. بۇل ۋاقىت ىشىندە تۇرعىن ۇيلەردەگى، مەكە­مەلەردەگى قالىپتى تەمپەراتۋرا ماسەلە ەتىپ كوتەرەتىندەي تومەندەگەن جوق. الايدا بۇگىن لەكەرلەپ قويعان قازاندىقتىڭ تەمىرى ەرتەڭ قايتا ىستەن شىقپاي ما؟ وبلىس باسشىسى دانيال احمەتوۆ قازاندىقتى ءبىرجولا قالىپتى جۇمىسقا كەلتىرۋ ءۇشىن كوممۋنالدىق مەنشىككە ءوتۋى كەرەك ەكەنىن ايتقان. رەسمي اقپا­راتقا سەنسەك، قاۋساپ تۇرعان قا­زاندىقتى جاڭا ينۆەستور قام­قورلىعىنا الماقشى ەكەن. جاڭا ينۆەستور ريددەر جىلۋ ەنەرگيا ورتالىعىن جاڭعىرتۋدىڭ ناقتى جوسپارى بار ەكەنىن ايتىپتى. دەمەك قازاندىقتىڭ جاعدايىمەن ءجىتى تانىسقان. كوماندانى جەو جۇ­مىسىمەن جاقسى تانىس، تا­جىريبەلى مامان قۇرالبەك ءاب­دىراحمانوۆ باسقارادى ەكەن. ال قازاندىقتى قاشان، قانشاعا ساتىپ الادى، بىزگە بەلگىسىز. بىراق جاڭا ينۆەستور جۇمىسقا كىرىسىپ كەتكەن.

وبلىس اكىمىنىڭ ورىنباسارى ەرجان نۇرباەۆ اتاپ وتكەندەي، ينۆەستور ريددەردە قورتقى كومىر وندىرەتىن زاۋىت سالۋدى دا جوس­پارلاپ وتىر. ونى ءوندىرۋ كەزىندە قازاندىق اگرەگاتتارىن جاعۋ ءۇشىن قولدانىلاتىن گاز دا بولىنەدى. سونداي-اق كومىر وندىرىسىندە سۋدى 95 گرادۋسقا دەيىن قىز­دىرادى. ونى جىلۋ جەلىسىندە قولدانۋعا بولادى. جاڭا مەنشىك يەلەرى «كازتسينك» كاسىپورنىمەن دە ىسكەرلىك، ارىپتەستىك قارىم-قاتىناس ورناتۋعا نيەتتى. ولار مەتاللۋرگيالىق جشس ءۇشىن قورتقى كومىر وندىرۋگە دايىن. ارتىلعانى قحر-عا ەكسپورت­تالماق. قورتقى كومىر شىعاراتىن زاۋىت قۇرىلىسىنىڭ تاعى ءبىر ارتىقشىلىعى ەكولوگيالىق جا­عىنان ءتيىمدى. ويتكەنى قورتقى كومىر وندىرىسىندە كۇل شىقپايدى ەكەن.

ايتا كەتەيىك، ينۆەستورلىق كومپانيا بارلىق قاجەتتى تو­لەمدەردى جۇرگىزىپ، كەرەكتى جاب­دىقتاردى ساتىپ الىپ، ىستەلگەن جۇمىستاردىڭ اقىسىن تولەي باس­تادى. الداعى جىلىتۋ ماۋسىمىن شتاتتىق رەجىمدە وتكىزۋدى جوسپارلاپ قويعان. ال جازدا ريددەر جەو-عا تولىق جاڭعىرتۋ جۇرگىزىلىپ، زاۋىت قۇرىلىسى باس­تالادى.

ينۆەستور جاڭارتىلعان كوم­مۋنالدىق كاسىپورىنعا جۇ­مىسشى تاپشىلىعى تۋىنداماۋى ءۇشىن تۇرعىن ءۇي ساتىپ الۋعا دايىن ەكەنىن دە اتاپ وتكەن. ەستەرىڭىزگە سالا كەتەيىك، قازاندىقتىڭ الدىڭعى يەلەرى جۇمىس كۇشىنەن ايىرىلىپ قالعان. 2022 جىلدىڭ قاراشاسىنداعى اپات كەزىندە قاجەتتى 270 قىزمەتكەردىڭ ورنىنا جەو-دا نەبارى 100 شاقتى ادام جۇمىس ىستەگەن.

بۇگىنگى تاڭدا كومىر بەرۋ تراك­تىن جوندەۋ جۇمىستارى جال­عاسىپ جاتىر. كومىر بەرۋ جولىن جەلىمدەۋ جۇمىستارى اياق­تالدى. ەندىگى كەزەكتە ىسكە قوسۋ، رەتتەۋ ۇدەرىسى باستالادى.

شىعىس قازاقستان وبلىسى،

ريددەر قالاسى