استانا. 14 ماۋسىم. كەشە تاڭ الدىندا برازيليا – حورۆاتيا قۇرامالارى اراسىندا اياقتالعان ويىنمەن بىرگە الەمنىڭ مەرەكەلىك XX چەمپيوناتى ءوزىنىڭ باستالىپ كەتتى. برازيليانىڭ سان-پاۋلۋ قالاسىندا وتكەن ماۋسىماشار ماتچتى جاھاننىڭ ميللياردقا جۋىق تۇرعىنى كوگىلدىر ەكران ارقىلى تاماشالادى. وسىلايشا 31 كۇنگە ۇلاسىپ, 64 ويىننان قۇرالاتىن اياقدوپ الامانىنىڭ جارىس جولىنا تۇسكەنى دە تاريحي شىندىققا اينالدى. بۇل تۋرالى egemen.kz حابارلادى.
ال كەشەگى ءتۇن مەن بۇگىنگى تاڭ الدىندا دۇنيەلىك دوپ دوداسىنىڭ كەلەسى كەزدەسۋلەرى كەلەگە كەلدى. بۇل ۋاقىت ارالىعىندا برازيليانىڭ ءۇش قالاسىندا مەكسيكا – كامەرۋن, يسپانيا – گوللانديا جانە چيلي – اۆستراليا جۇپتارى جاسىل الاڭعا شىقتى. توپتىق تۋرنيردەگى ىرىكتەۋ كەزەڭى ءۇشىن بۇلاردىڭ قاي-قايسىسى دا اسا ماڭىزدى بولىپ تابىلادى.
ەندى ءسوز باسىندا بايراقتى باسەكەنىڭ تۇساۋكەسەر تۇرلاۋى بولعان برازيليا مەن حورۆاتيا قۇرامالارى اراسىنداعى كەزدەسۋگە از-كەم توقتالماي وتە المايمىز. شىنى كەرەك, ول ماماندار ءۇشىن دە, جانكۇيەرلەر ءۇشىن دە ەشقانداي تاڭدانىس پەن سەنساتسيا اكەلە قويمادى. سەبەبى, فۋتبولدان تيتتەي حابارى بار جۇرتتىڭ كەم دەگەندە 90 پايىزى بۇل كۇنى «سەلەساونىڭ» باسىم تۇسەتىنىنە ەشبىر كۇمان كەلتىرە العان جوق. ال ماتچتىڭ باسى برازيليالىق فۋتبولشىلار عانا ەمەس, سونىمەن قاتار فاناتتار ءۇشىن دە ەستەن تاندىرارلىق وقيعادان ءوربىدى. كەزدەسۋدى ۇلكەن ۇمىتتەرگە ەركىن ارقا سۇيەي الاتىنداي شابىتتى دا شىمىر شابۋىلدارمەن اياقتاندىرعان الاڭ يەلەرىنىڭ كەنەت كۇتپەگەن جەردەن ءوز قاقپالارىنا گول سوعىپ الۋلارى ءبىراز جۇرتتى ابىرجىتىپ تاستادى.
بىراق مۇنداي-مۇندايعا ەڭسەلەرى ءتۇسىپ, جۇيكەلەرى ءجۇنجىپ كەتىپ جاتسا, ولار برازيليالىقتار بولا ما, سالدەن كەيىن-اق تەز جيناقتالىپ ۇلگەرگەن «سەلەساو» سەركەلەرى قايتادان بۇرىنعى ىرعاقتى ارنالارىنا ءتۇسىپ, قارسى قاقپادان «باقىت كىلتىن» ىزدەستىرۋلەرىن جالعاستىردى. مۇنى ولار جيىرما مينۋتتىڭ ىشىندە قارىمتا گولعا اينالدىرا ءبىلدى. حورۆاتتاردىڭ تىرەكتى ايماقتا تىعىز ويناي الماۋلارى نەيماردىڭ كەڭ كەڭىستىك الىپ, العا قاراي دەمبىل-دەمبىل ۇمتىلىپ تۇرۋىنا جول اشتى. برازيليالىقتار ەكىنشى تايمدى ءتىپتى قاۋىرت وتكىزدى. ولار ءبىرىنشى مينۋتتان باستاپ-اق قارسى كوماندانى تاپتاپ كەتە جازدادى. ال حورۆاتتار قولدارىنان كەلگەندەرىنشە جويقىن جورىقتاردى قايتارىپ باعىپ, ءبىر كەزدەرى الاڭ ۇستىندەگى ويىندى تەڭەستىرۋگە قول جەتكىزدى. الايدا, تايمنىڭ ورتا شەنىندە جاپون تورەشىسى يۋيتي نيسيمۋرا ءوزىنىڭ مۇندا تەككە جۇرمەگەنىن انىق بايقاتىپ قويدى. بۇلاي دەيتىنىمىز, ونىڭ 71-مينۋتتا بەلگىلەگەن پەنالتيىنىڭ ادىلدىگىنە كۇمان كوپ. وسىنىنىڭ اسەرى بولدى ما, بۇدان كەيىن حورۆاتتاردىڭ ويىنى ءبىراز سەتىنەپ سالا بەرگەندەي كورىندى. سول كەزدەرى الاڭ يەلەرى ەسەپتى وسىرە تۇسۋگە مۇمكىندىك تە العان. الايدا, ودان ناتيجە شىعارا الماعاسىن ولار سوڭعى ون مينۋتتا ەسەپتى ساقتاپ قالۋعا ۇمتىلىپ, قارقىندى ايتارلىقتاي باسەڭسىتىپ جىبەردى. مىنە, سول كەزدە «شارشىلى» شاندوزدار ويىن تىزگىنىن قولعا ۇستاپ, برازيليالىقتاردى ەداۋىر تىقسىرىپ تاستادى. وسى تۇستاعى بەيقامدىق پەن تىرەك ايماقتىڭ وسالدىعى حورۆاتتاردىڭ ءۇشىنشى گولدى وتكىزىپ قويۋلارىنا سەبەپ بولدى. ءبىر مەزەت زىمىراپ قارسى شابۋىلعا شىققان وسكار ايىپ الاڭىنىڭ ىشىنە جەتپەي تۇرىپ-اق قاقپانى نىساناعا الدى. ونىڭ جۇگىرىپ كەلە جاتىپ تەپكەن سول دوبى باعاننىڭ ءبىر بۇرىشىنا ءتيىپ بارىپ, توردىڭ اياسىنا توپ ەتە ءتۇستى – 3:1. وسىلايشا برازيليا قۇراماسى تۋرنيردەگى ءبىرىنشى جەڭىستى تويلادى.
دامير قوجامقۇل.
