نۇرلان ءابدىروۆتىڭ توراعالىعىمەن وتكەن جيىنعا وبلىستار, استانا, الماتى, شىمكەنت قالالارىنىڭ اۋماقتىق سايلاۋ كوميسسيالارىنىڭ توراعالارى مەن مۇشەلەرى (بەينەكونفەرەنتسبايلانىس رەجىمىندە), بۇقارالىق اقپارات قۇرالدارىنىڭ وكىلدەرى, سونداي-اق پارلامەنت سەناتىنىڭ جاڭادان سايلانعان جانە تاعايىندالعان دەپۋتاتتارى قاتىستى.
ەستەرىڭىزگە سالساق, 2022 جىلعى ماۋسىمدا وتكەن رەفەرەندۋم ناتيجەلەرى بويىنشا كونستيتۋتسياعا ەنگىزىلگەن وزگەرىستەرگە سايكەس پارلامەنت سەناتىنىڭ ون دەپۋتاتىن, ونىڭ ىشىندە بەسەۋىن قازاقستان حالقى اسسامبلەياسىنىڭ ۇسىنىسى بويىنشا رەسپۋبليكا پرەزيدەنتى تاعايىندادى.
بۇل كونستيتۋتسيالىق نورما تاجىريبەدە العاش رەت ىسكە اسىرىلدى. «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭنىڭ 24-بابىنىڭ 1-تارماعىنا سايكەس جانە پرەزيدەنتتىڭ 2023 جىلعى 24 قاڭتارداعى №112, 113 جارلىقتارى نەگىزىندە ورتالىق سايلاۋ كوميسسياسى كەلەسى دەپۋتاتتاردى تىركەدى: جاقىپ قاجمان ۇلى اسانوۆ, ماۋلەن ساعاتحان ۇلى اشىمباەۆ, نۇرتورە بايتىلەس ۇلى ءجۇسىپ, ءلاززات مولدابەكقىزى قالتاەۆا, اسقار ورازالى ۇلى شاكىروۆ, ەۆگەني اندرەەۆيچ بولگەرت, زاكيرجان پيرمۋحامەدوۆيچ كۋزيەۆ, نۋريا يسماگيلوۆنا نيازوۆا, اليشەر گاپيرجانوۆيچ ساتۆالديەۆ, گەننادي گەنناديەۆيچ شيپوۆسكيح.
ورتالىق سايلاۋ كوميسسياسىنىڭ توراعاسى نۇرلان ءابدىروۆ «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭنىڭ 24-بابىنا سايكەس, پارلامەنت دەپۋتاتىنىڭ وكىلەتتىگى ورتالىق سايلاۋ كوميسسياسى ونى تىركەگەن كەزدەن باستالاتىنىن اتاپ ءوتتى. ءتيىستى قاۋلىلارعا قول قويىلعاننان كەيىن تىركەلگەن دەپۋتاتتارعا كۋالىكتەر مەن توسبەلگىلەر تابىستالدى.
