«وڭتۇستىك وڭىردەگى شارۋالار كوكتەمگى ەگىس ناۋقانىنا دايىندىق جۇمىسىن باستاپ كەتتى. جاقىن ارادا وزگە ايماقتار دا ىسكە كىرىسەدى. بۇل رەتتە, ولاردىڭ تۇقىم, جانار-جاعارماي, تەحنيكانى جوندەۋگە قاجەت قوسالقى بولشەكتەر ساتىپ الۋى ءۇشىن ءتيىستى قاراجاتى بولعانى ماڭىزدى. سوندىقتان پايدا بولعان ماسەلەلەردى ۋاقتىلى تالقىلاپ, ولاردى ۇكىمەت دەڭگەيىندە كوتەرۋ قاجەت», دەدى كوميتەت توراعاسى قاينار اباسوۆ.
شارۋالاردىڭ ايتۋىنشا, اۋىل شارۋاشىلىعى سالاسىندا ۇيىمداستىرۋشىلىق جانە زاڭنامالىق دەڭگەيدەگى ماسەلەلەر جەتىپ-ارتىلادى. ماسەلەن, باتىس قازاقستان وبلىسىنداعى شارۋا قوجالىعىنىڭ باسشىسى سەرجان يدياتوۆ مايلى داقىلدار ەكسپورتىنا كۆوتا جانە ليتسەنزيا ەنگىزۋ جوسپارلانىپ وتىرعانىنا قىنجىلدى.
«بۇل شەشىم مۇلدەم دۇرىس ەمەس. ەگىنشىلىكتىڭ بۇل ءتۇرى ءوڭىر شارۋالارى ءۇشىن نەگىزگى تابىس كوزى سانالادى. ءبىز ءتيىستى ورگاندارعا باتىس قازاقستان وبلىسىنداعى شارۋالاردىڭ اتىنان ۇجىمدىق حات جولدادىق. وسى ماسەلەنى ۇكىمەت دەڭگەيىندە كوتەرۋدى سۇرايمىز», دەدى ول.
ال قوستاناي وبلىسىنداعى اندرەي دۆۋرەچەنسكي ەسىمدى كاسىپكەر نەسيەلەۋگە ارنالعان كەپىلدىك بازاسى ماسەلەسىن كوتەردى. «بارىندە بىردەي كەپىلگە قويۋعا بولاتىن م ۇلىك جوق. مىسالى, 150 ميلليون تەڭگە نەسيە الۋ ءۇشىن 360 ميلليون تەڭگەنىڭ كەپىلى قاجەت. بۇل ايتارلىقتاي قيىندىق تۋعىزادى. سونىمەن قاتار قازىر ءبارى قىمباتتاپ جاتىر. شارۋالاردىڭ شىعىنى ارتىپ بارادى. سوندىقتان بيىل قاجەتتى قارجىلاندىرۋ كولەمىنە قول جەتكىزە الماۋ قاۋپى بار. ەگەر مۇنىڭ شەشىمى قازىر تابىلماسا, ءوڭىردىڭ اۋىل شارۋاشىلىعىندا قارجى تاپشىلىعى تۋىنداۋى مۇمكىن», دەدى ول.
ال ماڭعىستاۋ وبلىسىنىڭ كوميتەت مۇشەسى وڭايبەك ءابدىلوۆ سۋ تاپشىلىعى بار وڭىردە قۇدىق قازۋعا بەرىلەتىن سۋبسيديانى الىپ تاستاۋ كوزدەلىپ وتىرعانىن اتاپ ءوتتى. ونىڭ ايتۋىنشا, بۇل ارەكەت بىلتىر قيىن كەزەڭدى باستان وتكەرگەن ايماقتىڭ اگروسەكتورىنا ودان ءارى زيان كەلتىرۋى مۇمكىن. سونداي-اق ول ماڭعىستاۋلىق شارۋالاردى كۇن پانەلدەرىمەن قامتاماسىز ەتۋ جۇمىسىن قايتا جاڭعىرتۋ قاجەت ەكەنىن اتاپ ءوتتى.
«ماسەلەنىڭ كوبىسى قازىرگى ەكونوميكالىق جاعدايعا بايلانىستى تۋىنداپ جاتقانىن ءتۇسىنىپ وتىرمىز. ينفلياتسيا مەن قىمباتشىلىقتان ەڭ الدىمەن شارۋالار زارداپ شەگەدى. سوندىقتان كوتەرىلگەن ماسەلەلەردىڭ ەشقايسىسى نازاردان تىس قالمايدى. كەلەسى وتىرىسقا جاۋاپتى ۆەدومستۆولاردىڭ وكىلدەرىن شاقىرۋ قاجەت. ماسەلەن, «قازاقستان تەمىر جولى» كومپانياسىنىڭ وكىلىن جانە تاعى باسقالاردى شاقىرعان ءجون», دەپ قورىتىندىلادى قاينار اباسوۆ.
