تالدىقورعاندىق ەكوەرىكتى عازيز امانجول ۇلى وبلىس ورتالىعىنداعى عانا ەمەس, وڭىردەگى يگى ىستەردىڭ, قايىرىمدى قادامداردىڭ, مادەني شارالاردىڭ بەل ورتاسىنان كورىنىپ, ۇنەمى بەلسەندىلىگىمەن ەرەكشەلەنىپ جۇرەدى. جانە ونداي ىستەرىن جارنامالاۋعا دا قۇشتار ەمەس. سودان دا بولار عازيزدىڭ ءوز ۇيىنەن شىعاتىن تۇرمىستىق قالدىقتاردى سۇرىپتاپ, بولەكتەپ جيناپ, قاعاز, تسەللوفان, پلاستيك, مەتالل سىندى قايتا وڭدەۋگە كەلەتىندەرىن ارنايى مەكەمەلەرگە وتكىزىپ كەلە جاتقانىنا 2 جىل بولعانىن جۇرت ەندى ءبىلىپ جاتىر.
ەكوەرىكتىنىڭ ايتۋىنشا, سۇرىپتالعان قوقىستان سوڭعى ىرىكتەلگەن شيكىزاتتى قابىلداپ الۋشى كومپانيالارعا وتكىزىپ, تۇسكەن قارجىنى قايىرىمدىلىق قورلارىنا اۋدارادى. ولاردىڭ اراسىندا تالاي جانعا ءۇي تارتۋ ەتكەن «حارەكەت» قورى دا بار.
«مەنىڭ بۇل باستامام ءبىر وقپەن بىرنەشە قوياندى اتقانداي پايدالى. ۇيدەن شىققان قاعاز, مەتالل, پلاستيك, تسەللوفان سياقتى قايتا وڭدەۋگە جارايتىن قالدىقتاردى سۇرىپتاپ, بوشكەلەر تولعان كەزدە ارنايى مەكەمەلەردەن قابىلداۋشىلارعا حابارلاسامىن. ولار كەلىپ, جينالعان قالدىقتاردى ولشەپ, مەنەن ساتىپ الادى. ال تۇسكەن قارجىنى بىردەن قايىرىمدىلىق قورلارىنا جىبەرەمىن. ءار كەلگەندە ورتاشا ەسەپپەن 2000-3000 تەڭگەگە قالدىق وتكىزەمىن. اكەم جولاۋشى تاسىمالدايتىندىقتان, كۇندەلىكتى كولىگىندە جولاۋشىلاردان قالعان 5-6 پلاستيك بوتەلكەنى اكەلىپ بەرەدى. سوندىقتان پلاستيككە ارنالعان بوشكە تەز تولادى. سونىمەن قاتار دەنساۋلىققا قاۋىپتى سانالاتىن جارىق بەرگىش شامدار مەن باتارەيالاردى دا بولەك سۇرىپتاپ, ارنايى كونتەينەرلەرگە تاستايمىن. قاعازدار ءبىر بولەك, تسەللوفاندار ءبىر بولەك دەگەندەي. وسى ءىسىم ارقىلى ەكولوگياعا دا ءوز ۇلەسىمدى قوسامىن, قايىرىمدىلىقتى دا نازارىمدا ۇستايمىن», دەگەن عازيز بارشا ازاماتتاردى وسىنداي ساۋاپتى ءارى پايدالى ىسكە شاقىرادى.
جالپى, بارلىعىمىز بىلەتىندەي, تابيعاتتىڭ قوقىسپەن لاستانۋى ءبىزدىڭ ەلدەگى عانا ەمەس, بۇكىل الەمدەگى باستى پروبلەمانىڭ بىرىنە اينالىپ وتىر. دۇنيە جۇزىندەگى مەملەكەتتەردىڭ اۋماقتارىنا, ءتىپتى ايدىن-شالقار تەڭىزدەر مەن مۇحيتتارعا, اسقار تاۋلار مەن ورماندارعا ورنى تولماس زارداپ تيگىزۋدە. جانعان قوقىستاردان ۋلى حيميكاتتار ءبولىنىپ, اۋانى ءبۇلدىرىپ, جانى بارلاردىڭ تىرلىگىنە قاۋىپ توندىرە باستادى.
وكىنىشكە قاراي سونىڭ ءبارىن كۇندەلىكتى كورىپ, ەستىپ, وقىپ جۇرگەن ادامدار قوقىستى سۇرىپتاۋ مادەنيەتىن دامىتۋ ارقىلى تابيعاتتى قورعاپ, قورشاعان ورتانى ساقتاپ قالاتىنىمىزدى ەستەن ءجيى شىعارىپ الادى. سوندىقتان تالدىقورعاندىق ەكوەرىكتىنىڭ قايىرىمدى ءارى قايىرلى قادامىن بۇكىل ەل بولىپ قۇپتاعان ءجون. «تازا بولسا تابيعات – امان بولسا ادامزات» دەگەندى جادىدا ۇستاپ, قورشاعان ورتانى قورعايىق!
جەتىسۋ وبلىسى
