وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ازامات مامبەتوۆتىڭ ايتۋىنشا, بۇل جوبا ءبىراز تۇرعىننىڭ ۋاقىتىن ۇنەمدەۋگە سەپتىگىن تيگىزىپ جاتىر.
– مەملەكەت باسشىسىنىڭ تاپسىرماسىنا سايكەس پيلوتتىق رەجىمدە قولدانىسقا ەنگىزىلگەن جوبانىڭ قازىر تيىمدىلىگىنە كوز جەتكىزىپ وتىرمىز. ويتكەنى وتباسىنىڭ تسيفرلىق كارتاسى – ازاماتتارعا الەۋمەتتىك مارتەبەسىنە بايلانىستى كەپىلدەندىرىلگەن مەملەكەتتىك قولداۋ شارالارىن الۋ قۇقىعى تۋرالى اقپارات بەرەتىن ەلەكتروندىق جارشى. اتالعان جوبا ارقىلى بىلتىرعى قىركۇيەك ايىنان بەرى 1 540 ادامعا sms-حابارلاما جىبەرىلدى. سودان كەيىن 700-دەن استام اتىراۋلىققا جاردەماقىلار مەن الەۋمەتتىك تولەمدەر راسىمدەلدى, – دەيدى ا.مامبەتوۆ.
ونىڭ ايتۋىنشا, «وتباسىنىڭ تسيفرلىق كارتاسى» جوباسىنا وبلىستاعى بارلىق وتباسى مەن مۇشەلەرى تۋرالى دەرەكتەر ەنگىزىلگەن. بۇل دەرەكتەر وتباسى مەن مۇشەلەرى مارتەبەسىنىڭ وزگەرۋىنە بايلانىستى جاڭارتىلادى.
– مەملەكەتتىك قولداۋ شارالارىن الۋ قۇقىعى بەلگىلەنگەن ادامعا قىزمەت كورسەتۋگە كەلىسىم الۋ ءۇشىن sms-حابارلاما جىبەرىلەدى. ونى العان ازامات ء«يا» دەپ جاۋاپ جازعان سوڭ, جۇيەدە اقپارات تولىق تەكسەرىلەدى. كەلىسىم العاننان كەيىن قىزمەت الۋشىنىڭ ءوتىنىشى تىركەلەدى. سونىڭ ناتيجەسىندە جاردەماقى, الەۋمەتتىك تولەمدەر نەمەسە مەملەكەتتىك قولداۋدىڭ باسقا تۇرلەرى تاعايىندالىپ, كەيىن الۋشىنىڭ ەسەپشوتىنا اۋدارىلادى. ياعني ەشكىم قۇجات تاپسىرىپ جۇرمەيدى. سول سياقتى وزگە دە الەۋمەتتىك تولەمدەردى الۋعا قۇقىلى ازاماتتارعا دا وسىلاي sms-حابارلاما جولدانادى. ءتىپتى «وتباسىنىڭ تسيفرلىق كارتاسى» اتاۋلى الەۋمەتتىك كومەكتى الۋدى دا ۇسىنادى, – دەيدى ا.مامبەتوۆ.
جىل باسىنان بەرى بيىل اتاۋلى الەۋمەتتىك كومەك تاعايىندالۋى مۇمكىن 251 ازاماتقا sms-حابارلاما جولدانعان. ونىڭ ىشىندە 181 ازاماتتان sms-حابارلاما جاۋاپ كۇتىپ وتىر. ال 32 ادامعا اتاۋلى الەۋمەتتىك كومەك تاعايىندالعان.
اتىراۋ وبلىسى
