ەكسپوزيتسياعا قويىلعان الۋان ءتۇرلى قورجىننىڭ ءبىرى كيىزدەن, كەيبىرى تۇكتى كىلەمنەن جاسالعان. ءپىشىنى ءارتۇرلى قورجىندار شارۋاشىلىق, تۇرمىستىق ماقساتتا قولدانىلعان. ماسەلەن, مەملەكەت قايراتكەرى, ۇلتتىق ونەردىڭ جاناشىرى يمانعالي تاسماعامبەتوۆ 1999 جىلى سىيعا تاپسىرعان قورجىن جۇننەن تۇكسىز ەتىپ توقىلعان. ءتورتبۇرىشتى, قىزىل-قوڭىر ءتۇستى بۇل قورجىننىڭ بەتىندە ورنەگى, ەتەگىندە شاشاعى بار.
تاعى ءبىر قورجىندى 1978 جىلى جىلىوي اۋدانىنداعى قوسشاعىل اۋىلىنىڭ تۇرعىنى جاڭىلسىن تاعانوۆا مۋزەي قورىنا تاپسىرعان. جەرگىلىكتى قولونەر شەبەرى يىرىلگەن جۇننەن توقىلعان قىزىل ءتۇستى قورجىنعا رومبيك ءتارىزدى بىرنەشە ورنەك سالعان.
حالقىمىز كونەدەن جەتكەن ەتنوگرافيالىق قۇندىلىق ساناتىنداعى قورجىندى قۇدايىنداي سىيلايتىن قۇداسىنا ارناعان. سونداي ەرەكشە قورجىننىڭ ءبىرىن قولونەر شەبەرى ءازيما جامامباەۆا 1990 جىلى توقىعان ەكەن. قۇدا قورجىنى بەتىنە قىزىل, جاسىل, كوك, سارى جىپتەردەن ءجۇز تەرۋ ورنەگىمەن توقىلعان. ەكى قالتالى, ورتاسىنان بايلايتىن ءجىبى بار. بۇل تۋىندى 2007 جىلدان بەرى مۋزەيدىڭ جادىگەرىنە اينالعان.
ال 1931 جىلعى اشارشىلىق كەزىندە قاراقالپاقستانعا كوشىپ كەتكەن قانداسىمىز, قولونەر شەبەرى بالكۇنشە قۇرمانقىزىنىڭ تۋىندىسىن نەمەرەسى كوزدىڭ قاراشىعىنداي ساقتاپ كەلگەن. ءساندىباي قۇلمىشەۆ ون ساۋساعىنان ونەر تامعان اجەسىنىڭ بۇيىمىن جوعالتپاي, 2017 جىلى مۋزەي قورىنا تاپسىرىپتى.
اتىراۋ وبلىسى
