ءبىر ايتا كەتەرلىگى, زاڭ شىعارۋشى ورگان مۇشەلەرىن سايلاۋدىڭ وسىنداي جۇيەسى الەمنىڭ باسقا ەلدەرىندە دە كەزدەسەدى. مىسالى, جاڭا زەلانديا, گەرمانيا, جاپونيا, وڭتۇستىك كورەيا, ليتۆا, مەكسيكا, ۇلىبريتانيا. ارينە, ەلدەردىڭ ارقايسىسىنىڭ وزىندىك ايىرماشىلىقتارى, ەرەكشە بەلگىلەرى بار. بىراق جالپى العاندا ارالاس سايلاۋ جۇيەسى پروپورتسيونالدى جۇيەنىڭ دە, ماجوريتارلىق جۇيەنىڭ دە ءتيىمدى تۇستارىن پايدالانۋعا مۇمكىندىك بەرەدى.
ارالاس سايلاۋ جۇيەسىنىڭ تاعى ءبىر ارتىقشىلىعى, سايلاۋشى ەندى پارتيالارعا, سونداي-اق ءوز ايماعىنان بەلگىلى ءبىر كانديداتقا داۋىس بەرۋ ارقىلى بەلگىلى ءبىر ساياسي باعدارلامانى تاڭدايدى. وسىلايشا, ساياسي مۇددەلەردىڭ وكىلدىگى ساقتالادى جانە سايلاۋشى مەن بەلگىلى ءبىر ايماقتان سايلانعان دەپۋتات اراسىنداعى بايلانىس نىعايادى. ونىڭ ۇستىنە سايلاۋشىلار ەندى ءبىر مانداتتى وكرۋگ بويىنشا سايلانعان دەپۋتاتتى كەرى شاقىرىپ الۋ مۇمكىندىگىنە يە. بۇل دەپۋتاتتار جۇمىسىنىڭ تيىمدىلىگىنە, ولاردىڭ اشىقتىعى مەن ازاماتتارعا قولجەتىمدىلىگىنە وڭ اسەر ەتۋگە ءتيىس.
ساياسي ءومىردى جانداندىرۋ يدەياسىن جالعاستىرا وتىرىپ, جاڭا جۇيە ەلدەگى پارتيالىق جۇيە مەن كوپپارتيالىقتىڭ دامۋىنا دا سەرپىن بەرمەك. مىسالى, جاڭا زەلانديادا ارالاس جۇيە ەنگىزىلگەننەن كەيىن ەتنوستىق جانە تىلدىك ازشىلىقتار مۇددەسىن قورعايتىن ۇساق ساياسي پارتيالار پارلامەنتتە وكىلدىك الدى.
ونىڭ ۇستىنە ساياسي پارتيالار ايماقتىق دەڭگەيدە دە بەلسەندى تۇردە ارەكەت ەتەدى. ويتكەنى ءبىر مانداتتى وكرۋگتەردەگى سايلاۋ ەلدىڭ زاڭ شىعارۋشى ورگانىندا دەپۋتاتتىق ورىن الۋعا قوسىمشا مۇمكىندىك بەرەدى. وسىلايشا, 2023 جىلعى پارلامەنت سايلاۋى ساياسي پارتيالار, ساياسي بەلسەندى ازاماتتار مەن قازاقستاندىق سايلاۋشىلار اراسىنداعى قارىم-قاتىناستى نىعايتادى.
ءامينا ۇرپەكوۆا,
ساراپشى
