اتالعان اۋداننىڭ ءبىلىم ءبولىمى عانا وسى اقشانىڭ 4 ميلليارد تەڭگەسىن يگەرىپ وتىر. بۇل اۋداننىڭ سالىق ءتۇسىمى (0,9 ميلليارد تەڭگە) بالا وقىتۋعا دا جەتپەيدى دەگەن ءسوز. ال 6,6 ميلليارد تەڭگەنى مەملەكەت بەرەدى.
نۋلى-سۋلى شىعىستاعى جاعداي وسىنداي بولسا, شولەيتتى وڭىرلەردەگى جاعداي قانداي؟ «ونداي اۋدانداردىڭ ءبىرازىندا جەر استى بايلىعى, كەن ورىندارى بار» دەيىك. سولاي. كەم-كەتىگىمىزدى كەنىمىزبەن جاۋىپ وتىرمىز. قاشانعى قازعان جەرىمىزدەن قازىنا, تەسكەن جەرىمىزدەن تەڭگە شىعا بەرمەك؟ ال كەنى دە, سۋى دا, نۋى دا جوق, بىراق باي ەلدەر بار عوي؟
ماجىلىستەگى 98 ورىنعا وسىنداي وزەكتى ماسەلەنى ويلاي الاتىن, ەلىنىڭ اتىنان ەسەپ سۇراي الاتىن, مەملەكەت اقشاسىن مينيسترمەن بىرگە ساناي بىلەتىن ساناسى وسكەلەڭ, ءبىلىمى مەن بىلىگى بەكەم ادام كەرەك.
مەملەكەتىمىزدىڭ باتىسىندا توپتاسىپ تالاپ قويۋدىڭ مادەنيەتى قالىپتاسىپ كەلەدى. الايدا توپتاسىپ قويعان تالاپتىڭ ءبارى ورىندى بولا بەرمەيدى. سوندىقتان دا ول ءارتۇرلى دەڭگەيدە ورىندالىپ, كەيدە ورىندالماي جاتادى. دەپۋتات سونىڭ اق-قاراسىن تاني الاتىن, وڭ بولسا قولداپ, تەرىس بولسا تۇسىندىرەتىن, جيناي دا, تاراتا دا الاتىن بىلىكتى بولعانى كەرەك. سايلاۋشىلارعا ۋادەنى ءۇيىپ-توگەتىن, تولاعايدى توبەسىنە كوتەرىپ سويلەيتىن سوزشەڭدەردى سابىرلى, سالقىن تىڭداعان ءجون.
بۇل جولعى سايلاۋدىڭ داۋلى, شۋلى بولارى انىق. شىنى كەرەك, حالىقتا تاڭداۋ تارازىسى جوققا ءتان. سودان دا تاڭداۋلى كانديداتتان گورى تانىمال كانديدات داۋىس تارتادى.
ءبىز – مەملەكەت قۇرۋشى ۇلتپىز. بىزدە پارلامەنت بولۋى كەرەك. ونى ءوزىمىز سايلاۋىمىز, ءوزىمىز تاڭداۋىمىز كەرەك. سوعان قادام جاساۋىمىز قاجەت. بىزگە ۋادە بەرگىش سايراۋىق دەپۋتاتتار ەمەس, شىن سويلەيتىن, ءدال ايتاتىن, دالەلى, دايەگى بار ءبىلىمدى دەپۋتات كەرەك.
ءسوزىمىزدى باستاعاندا ايتقانىمىزداي, نۋلى-سۋلى, كەندى-قازىنالى كەڭ بايتاق دالامىزدى ەڭبەكپەن يگەرۋگە ەلدى جۇمىلدىرا الاتىن پارلامەنت كەرەك. ەلدى ەڭبەك قوعامىن جاساۋعا ۇيىمداستىراتىن زاڭ كەرەك. سونداي زاڭ شىعارا الاتىن زياتكەر دەپۋتاتتار قوسىنى قاجەت.
بۇل – ارمان ەمەس. بۇل الداعى سايلاۋلاردا جۇزەگە اسا باستايتىن ۇلتتىق ماقسات! سوندىقتان دا سايلاۋعا بارۋ – ازاماتتىق, ۇلتتىق پارىز.
الماس احمەتبەك ۇلى,
قوعام قايراتكەرى
