سويتكەن «سەرگەك» تاراز قالاسىندا 16 قاڭتار كۇنى رەسمي تۇردە ىسكە قوسىلدى. اپپاراتتىق باعدارلامالىق كەشەن ىسكە قوسىلعان العاشقى كۇننىڭ وزىندە قازىناعا 2 ملن تەڭگە تۇسىرگەن.
ەلىمىزدەگى ايلىق تابىسى از قالانىڭ تۇرعىندارى قالتاعا قول سالعان, قول سالعاندا مول سالعان بەينەباقىلاۋ جۇيەسى جۇيكەمىزدى جۇقارتتى دەگەندى العا تارتىپ وتىر. ال پوليتسيا دەپارتامەنتىندەگى جاۋاپتى مامانداردىڭ جۇرت نازىنا قاتىستى ءوز ايتارى بار.
«وبلىستىق پوليتسيا دەپارتامەنتى تەستتiك رەجىمنiڭ اياقتالۋىنا بايلانىستى 2023 جىلدىڭ 16 قاڭتارىنان باستاپ وبلىس ورتالىعىندا «سەرگەك» قوعامدىق جانە جول قاۋىپسىزدىگى جۇيەسى ىسكە قوسىلعانىن حابارلايدى. بۇگىندە 48 اپپاراتتىق باعدارلامالىق كەشەن (35-ءى – جەلىلىك ۋچاسكەدە جانە 13-ءى – قيىلىستاردا) قالانىڭ جول قاۋىپسىزدىگىن قامتاماسىز ەتەدى.
جۇيە جىلدامدىقتى اسىرۋ, باعدارشامنىڭ تىيىم سالعان بەلگىسىنە ءوتىپ كەتۋ, جول بەلگىلەرiن ساقتاماۋ (توقتاۋ سىزىعىن باسۋ, قيىلىستىڭ الدىندا دۇرىس ورىن اۋىستىرماۋ, تىيىم سالىنعان جەردە توقتاۋ جانە تۇراقتاۋ) سەكىلدى جول ەرەجەلەرىنىڭ بۇزىلۋىن تىركەيدى. تاجىريبە كورسەتكەندەي, جول-كولىك اپاتتارى كوبىنەسە جۇرگىزۋشىلەردىڭ جىلدامدىقتى شامادان تىس اسىرۋ, باعدارشامعا توقتاماۋ, جول قيىلىسىنان دۇرىس وتپەۋ سالدارىنان بولادى. وسى ورايدا «سەرگەك» ينتەللەكتۋالدى قوعامدىق جانە جول قاۋىپسىزدىگى جۇيەسى اۆتوكولىك اپاتى سالدارىنان جاراقات الۋ جانە ءولىم كورسەتكىشتەرىن ازايتۋعا, اپاتتاردى الدىن الاتىن نەگىزگى جول ەرەجەلەرىن ساقتاۋعا كوزدەلگەن جۇيە ەكەنىن اتاپ وتكەن ءجون», دەيدى وبلىستىق پوليتسيا دەپارتامەنتى اكىمشىلىك پوليتسيا باسقارماسىنىڭ وكىلى نۇرسۇلتان الىشەۆ.
استانادا جوبا ىسكە قوسىلعان ءبىرىنشى جىلدىڭ وزىندە جول-كولىك وقيعاسىنان قازا بولعاندار سانى 43%-عا دەيىن ازايعان ەكەن. الماتىدا 2019-2022 جىلدارى قايتىس بولعاندار سانى ەكى ەسەگە تومەندەگەن. شىمكەنتتە دە جاعداي وزگەرگەن.
«جۇيەنى ورناتۋداعى باستى ماقسات – تاراز قالاسىنداعى قاۋىپسىزدىكتى كۇشەيتۋ. بۇل اۆتوكولىك جۇرگىزۋشىلەردىڭ ساناسىن وزگەرتىپ, كولىك جۇرگىزۋ مادەنيەتىن قالىپتاستىرۋعا ىقپال ەتەدى», دەيدى نۇرسۇلتان الىشەۆ.
اكىمشىلىك پوليتسيا ءبولىم باسشىسى ن.الىشەۆتىڭ ايتۋىنشا, جول قوزعالىسى ەرەجەلەرىن بۇزۋ دەرەكتەرىن تىركەۋ اۆتوماتتىق رەجىمدە جۇرگىزىلىپ, بۇل مالىمەتتەر پوليتسيا قىزمەتكەرى تەكسەرگەننەن كەيىن قۇقىق بۇزۋشىعا جىبەرىلەدى. «بارلىق ەرەجە بۇزۋ جاعدايلارى باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ كوميتەتىنىڭ اكىمشىلىك وندىرىستەردىڭ بىرىڭعاي تىزىلىمىندە اۆتوماتتى تۇردە تىركەلەدى. حاتتامالاردى ەتسق كومەگىمەن erap-public.kgp.kz جانە egov.kz سايتتارىنان, سونداي-اق كاسپي بانكتىڭ ءموبيلدى قوسىمشاسىنداعى مەملەكەتتىك قىزمەتتەر بولىمىندە جۇكتەۋگە بولادى. ال ەگەر قالا تۇرعىنى اپپاراتتىق-باعدارلامالىق كەشەندە تىركەلگەن قۇقىق بۇزۋشىلىقتارمەن كەلىسپەسە, نۇسقامادا كورسەتىلگەن تەلەفون نومىرىنە قوڭىراۋ شالادى», دەيدى ن.الىشەۆ.
ايتكەنمەن, اپپاراتتىق باعدارلامالىق كەشەننىڭ قوسىلعانىنا نارازىلار دا از ەمەس. ولار جەرگىلىكتى حالىقتىڭ تابىسىنىڭ ازدىعىن العا تارتىپ, ايىپپۇل تولەۋدىڭ قيىندىعىن ايتىپ وتىر. ايتۋلارىنشا, الەۋمەتتىك تەڭسىزدىك ونسىز دا قوس بۇيىردەن قىسقان شاقتا «سەرگەكتەن» كەلگەن ايىپپۇلدى تولەۋ وڭايعا سوقپايدى.
«قالادا «سەرگەك» اپپاراتتىق كەشەنىن ءار جەرگە ءبىر ورنالاستىرىپ جاتىر. جامبىل حالقىنىڭ باسىم بولىگى 60-80 مىڭ تەڭگە كولەمىندە عانا جالاقى الادى. سوعان قاراماستان تابىسىمىز استاناداعىداي دەپ ويلاپ, اتالعان باقىلاۋ جۇيەسىن قوسىپ جاتىر. كەشەن ارقىلى ءبىر تاۋلىكتە 2 ملن تەڭگە ايىپپۇل جينالىپتى. قالادا تاكسي بولىپ اۋپىرىمدەپ ناپاقا تاۋىپ, كۇنىن ارەڭ كورىپ جۇرگەندەر بار. ولار قالاي ايىپپۇل تولەمەك؟» دەيدى تاراز قالاسىنىڭ تۇرعىنى كۇمىسبەك وڭلاباەۆ ءوز ويىمەن ءبولىسىپ.
جەرگىلىكتى كولىك جۇرگىزۋشىلەر اۋىل-ايماقتان كەلەتىن تۋىستارى قالانى دۇرىس بىلمەيتىندىكتەن «سەرگەك» اپپاراتتىق باعدارلامالىق كەشەنىن ءالى تالاي ۋاقىت بويى ايىپپۇلمەن جارىلقايتىنىن ايتىپ كۇيىنىپ وتىر. ايتكەنمەن, بەينەباقىلاۋ جۇيەسى رەسمي تۇردە ىسكە قوسىلدى. ەندى كولىك جۇرگىزۋشىلەر ساۋىسقانداي ساق بولماسا, ايىپپۇل تولەگەنى تولەگەن. ويتكەنى قالانىڭ 48 جەرىندە ورنالاسقان بەينەباقىلاۋ جۇيەسى ءاربىر زاڭسىزدىقتى قالت جىبەرمەيدى.
جامبىل وبلىسى
