ء«ماسليحات دەپۋتاتتارىن سايلاۋ جونىندە ايتاتىن بولساق, ەلىمىزدە ءتۇرلى دەڭگەيدەگى 223 ءماسليحات بار. وسك قاۋلىسىمەن بارلىق دەڭگەيدەگى ءماسليحاتتاردا مانداتتار سانى – 3415 ەكەنى انىقتالدى. ولاردىڭ بارلىعى 19 ناۋرىزداعى سايلاۋعا قاتىسادى», دەدى قر وسك توراعاسىنىڭ ورىنباسارى كونستانتين پەتروۆ.
سپيكەردىڭ ايتۋىنشا, 20 جاسقا تولعان قازاقستان رەسپۋبليكاسىنىڭ ازاماتى ءماسليحات دەپۋتاتتىعىنا كانديدات بولا الادى. بۇل رەتتە وبلىستار, رەسپۋبليكالىق ماڭىزى بار قالالار, استانا ءماسليحاتتارىنىڭ دەپۋتاتتارى ارالاس سايلاۋ جۇيەسى بويىنشا سايلانادى.
«وبلىستاردىڭ, رەسپۋبليكالىق ماڭىزى بار قالالاردىڭ جانە ەلوردانىڭ ءماسليحاتتارىنا دەپۋتاتتاردىڭ 50%-ى ماجوريتارلىق جۇيە بويىنشا, 50%-ى پارتيالىق تىزىمدەر بويىنشا سايلانادى. اۋداندار مەن قالالاردىڭ ءماسليحاتتارىنا سايلاۋ تولىعىمەن ماجوريتارلىق جۇيەدە وتەتىنىن اتاپ ءوتۋ قاجەت. ەگەر ءماسليحاتتا 30 دەپۋتاتتىق ماندات بولسا, ونىڭ 15-ءى پارتيالىق ءتىزىم بويىنشا جانە 15-ءى اۋماقتاعى ءبىرمانداتتى اۋماقتىق وكرۋگتەر بويىنشا سايلانادى», دەپ ناقتىلادى كونستانتين پەتروۆ.
