«پيلوتتىق جوبا 1 ناۋرىزدان باستاپ 5 مەملەكەتتىك ورگاندا, اتاپ ايتقاندا مەملەكەتتىك قىزمەت ىستەرى اگەنتتىگىندە, يندۋستريا جانە ينفراقۇرىلىمدىق دامۋ مينيسترلىگىندە, ساۋدا جانە ينتەگراتسيا مينيسترلىگىندە, اقمولا وبلىسى مەن شىمكەنت قالاسىنىڭ اكىمدىكتەرىندە وتەدى», دەدى اگەنتتىك توراعاسى دارحان جازىقباەۆ ۆەدومستۆونىڭ كەڭەيتىلگەن وتىرىسىندا.
ونىڭ ايتۋىنشا, «ە-قىزمەت» پورتالىندا مەملەكەتتىك قىزمەتكە ىرىكتەۋدىڭ جاڭا الگوريتمى ەنگىزىلگەن. كونكۋرستىق ءراسىمنىڭ جاڭا فورماتى ۇمىتكەرلەرگە كەز كەلگەن ۋاقىتتا جانە الەمنىڭ كەز كەلگەن نۇكتەسىنەن قاتىسۋعا مۇمكىندىك بەرەدى
- «ە-قىزمەت» جۇيەسى بارلىق نەگىزگى اقپاراتتىق جۇيەلەرمەن بىرىكتىرىلگەن. ۇمىتكەر تۋرالى وزگە اقپاراتتىق جۇيەلەردەن اقپارات الۋ, ونىڭ سوتتىلىعىن نەمەسە وزگە دە قۇقىق بۇزۋشىلىقتارعا قاتىستىلىعىن تەكسەرۋ, بىلىكتىلىك تالاپتارىنا سايكەستىگىن قاراۋ – مۇنىڭ ءبارىن جۇيە اۆتوماتتى تۇردە ءوزى جاسايدى. ءبىزدىڭ ماقساتىمىز – ىرىكتەۋدىڭ جاڭا جۇيەسىن پيلوتتىق رەجيمدە سىناقتان وتكىزۋ», - دەپ ءتۇسىندىردى دارحان جازىقباەۆ.
