وبلىس اكىمىنىڭ وكىمىمەن قازاقستان رەسپۋبليكاسى پرەزيدەنتى اكىمشىلىگى جانە قارماقشى اۋداندىق ءماسليحاتىنىڭ كەلىسىمدەرى بويىنشا قارماقشى اۋدانىنىڭ اكىمى لاۋازىمىنا جاندوس ەركىنبەك تاعايىندالدى.
ايماق باسشىسى جاندوس ەركىنبەك ۇلىن قۇتتىقتاپ, جاڭا قىزمەتىندە ساتتىلىك تىلەدى.
سونداي-اق وبلىس اكىمى وسى ۋاقىتقا دەيىن قارماقشى اۋدانىنىڭ اكىمى قىزمەتىن اتقارعان ادىلبەك ەرسۇلتانوۆتى باسقا قىزمەتكە اۋىسۋىمەن قۇتتىقتاپ, وعان اۋداننىڭ الەۋمەتتىك-ەكونوميكالىق دامۋىنا, قوعامدىق-ساياسي احۋالدىڭ تۇراقتى بولۋىنا سۇبەلى ۇلەسىن قوسقانى ءۇشىن العىس ءبىلدىردى.
جيىندا اۋداندىق ارداگەرلەر كەڭەسىنىڭ توراعاسى اسقار مەرەكوۆ اۋدان جۇرتشىلىعىنىڭ اتىنان ءسوز سويلەپ, جاڭا اۋدان اكىمىن وسى لاۋازىمعا تاعايىندالۋىمەن قۇتتىقتادى جانە بۇرىنعى اكىم ادىلبەك ەرسۇلتانوۆقا ريزاشىلىعىن ءبىلدىردى.
ەركىنبەك جاندوس ەركىنبەك ۇلى 1983 جىلى قارماقشى اۋدانىندا دۇنيەگە كەلگەن.
2004 جىلى قازاقستان ۇلتتىق قاۋىپسىزدىك كوميتەتىنىڭ اسكەري ينستيتۋتىن «بولىمشەلەردىڭ قىزمەتتىك-جاۋىنگەرلىك ءىس-قيمىلىن باسقارۋ» جانە 2008 جىلى قازاق گۋمانيتارلىق زاڭ ۋنيۆەرسيتەتىن «قۇقىقتانۋ» ماماندىقتارى بويىنشا بىتىرگەن.
ەڭبەك جولىن 2004 جىلى اسكەري قىزمەتتەن باستاپ, 2013 جىلعا دەيىن اتقارعان.
2013-2018 جىلدارى بىرقاتار كومپانيادا ءتۇرلى دەڭگەيدەگى جاۋاپتى باسشىلىق قىزمەتتەردە بولعان.
2019-2021 جىلدارى قىزىلوردا وبلىسىنىڭ جۇمىلدىرۋ دايىندىعى باسقارماسىنىڭ ءبولىم باسشىسى, 2021-2022 جىلدارى قارماقشى اۋدانى اكىمىنىڭ ورىنباسارى قىزمەتتەرىن اتقارعان.
2022 جىلدىڭ مامىر ايىنان باستاپ وسى كەزگە دەيىن قىزىلوردا وبلىسى اكىمى اپپاراتى باسشىسىنىڭ ورىنباسارى قىزمەتىن ابىرويمەن اتقارىپ كەلدى.
