قازىر كاسىپ قىلامىن, ەڭبەك ەتەمىن دەگەن ادامعا مۇمكىندىك بار. مەملەكەتتىك قولداۋدىڭ ءتۇرلى باعدارلاماسى قاراپ وتىرمايتىن كىسىگە كوپ كومەك. تىڭ يدەيالاردىڭ تولاعاي تابىسقا باستايتىنىن بۇقارا وسى كۇنى جەتە ءتۇسىندى. ءوزىن دە, وزگەنى دە جۇمىسپەن قامتىپ, ءتاۋىر تۇرمىس كەشىپ جاتقاندار سولايشا تاۋەكەلگە بەل بۋعاندار.
جانەركەنىڭ «ەركە» اتەلەسىنىڭ جۇمىس باستاعانىنا نەبارى جىل جارىم ۋاقىت بولدى. سودان بەرى تاپسىرىس بەرۋشىلەرى دە, ونىمدەرىنىڭ دە قاتارى مولايعان. وبلىس اكىمى گرانتىن جەڭىپ العان جانەركە قۇراق كورپە, ويۋ كورپە دەگەننەن باستاپ, قىز ۇزاتۋ, تۇساۋكەسەر تويىنا قاتىستى ءتۇرلى تاپسىرىس قابىلدايدى ەكەن.
– اتەلە اشىلعانىنا ءبىر جارىم جىل بولىپ قالدى. وسى ۋاقىتقا دەيىن تۇتىنۋشىلار ايتارلىقتاي كوبەيدى. گرانت ارقىلى ءىسىم ورگە ءجۇزدى. بۇل گرانت – ءىس باستايتىن جاستارعا زور قولداۋ. ازىرگە ءوزىم عانا جۇمىس ىستەپ وتىرمىن. الداعى ۋاقىتتا كومەكشى الۋ جوسپاردا بار. بۇگىندە مەنىڭ قولداۋشىم, ءارى تىرەگىم قۇداي قوسقان قوساعىم – ماديار ماقانوۆ پەن التىن ەنەم. وسى شاڭىراقتىڭ تابالدىرىعىن كەلىن رەتىندە اتتاعالى كومەكتەرىن ايانىپ قالعان كەزى جوق. ءتىپتى تاپسىرىستاردى ۇلگەرمەي قالاتىنداي جاعداي تۋسا, تۇنىمەن بىرگە جۇمىس ىستەپ, كومەك قولىن سوزادى. كەلىن بولىپ تۇسكەندە, ءوز ءىسىمدى باستاعىم كەلدى. باستاماما ەنەم قولداۋ كورسەتتى. التىن ەنەم ءىس تىگەتىن ماشينكا الىپ بەردى. ەڭ العاشقى تاپسىرىس كارانتين كەزىندە ءتۇستى. بەتپەردە تىگۋگە تاپسىرىس بەرىلدى. ءبىر تۇندە 100-دەن اسا ماسكا تىككەن ەدىك. كەيىن گرانت ۇتىپ العان سوڭ ءىس ماشينانىڭ قۋاتتىسىن الۋعا مۇمكىندىك تۋدى, – دەيدى جانەركە.
وسى كۇنى جانەركەنىڭ تۇتىنۋشىلارىنىڭ قاتارى مول. ءتىپتى تاۋلىك بويى ءوتىنىش ايتقانداردىڭ تاپسىرىسىن تاپجىلماي وتىرىپ, تىگەتىن ەرىك-جىگەر جەتكىلىكتى.
«بيزنەس باستاعاندا تانىستار, تۋىستار كليەنت-ءتىن. كەيىن جارناماعا «24/7» بەلگىسىن قويىپ ەدىم, تاپسىرىس بەرۋشىلەر سانى ارتتى. تۇندە دە تاپسىرىس قابىلدايمىن. بايقاسام, قاراعاندى بويىنشا تۇنىمەن تاپسىرىس قابىلدايتىن مەن عانا ەكەنمىن», دەيدى جانەركە.
بۇل كۇنى جاس كاسىپكەر مەكەمەلەردەن دە تاپسىرىس الىپ وتىر. مەكەمەلەردىڭ ارنايى كيىمى, پەردەلەر, اكت زالىن بەزەندىرۋ سەكىلدى جۇمىستارعا سۇرانىس ءجيى تۇسەدى. سونىمەن قاتار قازاقتىڭ توي-تومالاعىنا قاتىستى بارلىق قاجەتتى بۇيىمدار جاسايتىن قابىلەت-قارىمى جەتكىلىكتى. وعان دا سۇرانىس اجەپتاۋىر كورىنەدى. ايتەۋىر, ەڭبەكتەن قاشقان كەزى جوق.
«ەلىمىزدە ەڭبەكقور ادام, كاسىبي مامان ەڭ سىيلى ادام بولۋعا ءتيىس. وسىنداي ازاماتتار مەملەكەتىمىزدى دامىتادى. مەن ۇلتتىق قۇرىلتايدا جانە «جاستار رۋحىنىڭ» سەزىندە بۇعان ارنايى توقتالدىم. ءبىز قاراپايىم ەڭبەك ادامىنا قۇرمەت كورسەتۋىمىز كەرەك. قانداي كاسىپپەن اينالىسساڭ دا, ونى ساپالى اتقارۋ ماڭىزدى», دەگەن بولاتىن مەملەكەت باسشىسى قاسىم-جومارت توقاەۆ.
ەڭبەكتىڭ ۇلكەن-كىشىسى جوق, ءاماندا. قانداي ەڭبەك بولسا دا, قۇرمەتكە لايىق. ويتكەنى ول ەڭبەكتىڭ ارقايسىسىنا ماڭداي تەر سىڭگەن. ماڭداي تەرمەن كەلگەننىڭ قادىرى ەرەن بولۋعا ءتيىس ەندەشە. جاس شەبەر جانەركەنىڭ ەڭبەگى دە ءدال سونداي.
قاراعاندى وبلىسى
