پارتيا توراعاسى ەرلان قوشانوۆ وڭىردەگى شارۋا قوجالىقتارىنىڭ وكىلدەرىمەن كەزدەسىپ, «اۋىل اماناتى» جوباسىنىڭ جاڭا كەزەڭىن جۇزەگە اسىرۋدى تالقىلادى. سونداي-اق «قارجىلىق ساۋاتتى ارتتىرۋ» جاڭا پارتيالىق جوباسىن ىسكە قوستى.
اقتوبە قالاسىندا اۋىل شارۋاشىلىعى ءمينيسترى ەربول قاراشوكەەۆ, وبلىس اكىمى ەرالى توعجانوۆ جانە مەملەكەتتىك ورگاندار وكىلدەرى, وڭىردەگى اۋىل شارۋاشىلىعى تاۋارىن وندىرۋشىلەردىڭ قاتىسۋىمەن «اۋىل اماناتى» جوباسىن ىسكە اسىرۋ ماسەلەلەرى بويىنشا كەڭەس ءوتتى. جيىنعا بارلىعى 200-دەن اسا ادام قاتىستى.
ە.قوشانوۆ پرەزيدەنت قاسىم-جومارت توقاەۆ سايلاۋالدى باعدارلاماسىندا اۋىل ماسەلەسىن ءبىرىنشى كەزەككە قويىپ وتىرعانىن اتاپ ءوتتى. جالپى, الداعى 7 جىلدا اۋىل تۇرعىندارىنىڭ تابىسىن ارتتىرۋعا 1 ترلن تەڭگە ءبولۋ جوسپارلانىپ وتىر. سونىڭ ناتيجەسىندە اۋىل شارۋاشىلىعىندا 350 مىڭنان اسا جۇمىس ورنى اشىلادى دەپ كۇتىلۋدە.
«اۋىل حالقىنىڭ تۇرمىسىن جاقسارتىپ, تابىسىن ارتتىرۋ, بارلىق الەۋمەتتىك ماسەلەلەردى شۇعىل شەشۋ ءۇشىن ۇكىمەت پارتيامەن بىرلەسىپ «اۋىل اماناتى» جوباسىن ىسكە اسىرىپ كەلەدى. بيىلدىڭ وزىندە ونى جۇزەگە اسىرۋعا 52 ملرد تەڭگە ءبولىندى. پارتيا جانىنان ادىسنامالىق سۇيەمەلدەۋدى, ازاماتتار مەن اكىمدەردى وقىتۋدى, وتىنىمدەردى قابىلداۋ جانە قاراجات ءبولۋ ۇدەرىسىنىڭ مونيتورينگىن قامتاماسىز ەتەتىن جوبالىق كەڭسە اشىلدى. بۇل – اۋىلداردى كوتەرۋگە مۇمكىندىك بەرەتىن ناقتى قادام», دەدى پارتيا توراعاسى.
ول جوبانىڭ قاناتقاقتى ۇلگىسى جامبىل وبلىسىندا جەمىستى جۇزەگە اسىرىلعانىن, ناتيجەسىندە, 11 اۋىلدىق وكرۋگتە ورتاشا ايلىق تابىس 1,7 ەسە وسكەنىن, اتاۋلى الەۋمەتتىك كومەك الۋشىلار سانى 3 ەسەگە ازايعانىن, جۇمىسسىزدار سانى 36% تومەندەگەنىن اتاپ ءوتتى. پارتيا مەن ۇكىمەتتىڭ مىندەتى – «اۋىل اماناتى» جوباسىن بارلىق وڭىرگە ەنگىزۋ. جوبانىڭ بارلىق ارتىقشىلىعى تۋرالى حالىقتى دۇرىس حاباردار ەتۋ دە ماڭىزدى.
«اۋىل اماناتى» جوباسى اياسىندا نەسيە الۋدىڭ ىڭعايلى ءارى جىلدام بولۋىنا ەرەكشە نازار اۋدارىلادى. ءوتىنىم ەتسق ارقىلى ارنايى تسيفرلىق پلاتفورمادا ونلاين بەرىلەدى. سونىمەن قاتار ەگەر بۇرىن نەسيەنى ماقۇلداۋ ءۇش اپتاعا سوزىلسا, قازىر ول ەڭ كوپ دەگەندە ءۇش ساعاتقا سوزىلۋى كەرەك. قاجەتتى مالىمەتتەر بارلىق قولجەتىمدى دەرەكقورلاردان اۆتوماتتى تۇردە جينالادى. قازىرگى ۋاقىتتا تسيفرلىق پلاتفورما قاناتقاقتى رەجىمدە جۇمىس ىستەيدى.
وسى كۇنى ەرلان قوشانوۆ مارتوك اۋدانىنىڭ تۇرعىندارىمەن, «اۋىل اماناتى» جوباسىنىڭ قاتىسۋشىلارىمەن كەزدەسىپ, جوبانىڭ نەگىزگى باعىتتارى تۋرالى ايتىپ, تۇرعىنداردىڭ سۇراقتارىنا جاۋاپ بەردى. پارتيا توراعاسىنىڭ قاتىسۋىمەن العاشقى قارىز رەسىمدەلدى – شارۋا قوجالىقتارىنىڭ ءبىرىنىڭ باسشىسى تاڭىربەرگەن اۋىلىنىڭ تۇرعىنىنا 4 ملن تەڭگەگە تاۋارلىق نەسيە بەردى.
سونداي-اق مارتوك اۋدانىندا اۋىل تۇرعىندارىنىڭ قارجىلىق ساۋاتىن ارتتىرۋعا باعىتتالعان «قارجىلىق ساۋاتتى ارتتىرۋ» پارتيالىق جوباسى باستالدى.
«بۇل اۋىل تۇرعىندارىن الاياقتاردىڭ ىقپالىنان, قارجى پيراميدالارىنا الدانىپ قالۋدان جانە باسقا دا كۇماندى قارجىلىق وپەراتسيالاردان قورعاۋعا كومەكتەسەدى. مۇنداي جاعدايلارعا تاپ بولعان ادامدارعا كونسۋلتاتسيالىق كومەك كورسەتىلەدى. الداعى ۋاقىتتا 166 قارجى ساراپشىسى 250 مىڭ ادامدى قامتي وتىرىپ, ەلىمىزدىڭ شالعايىنداعى بارلىق ەلدى مەكەندى ارالاپ شىعادى. وقىتۋدىڭ ءبىر كۋرسى 5 كۇنگە سوزىلادى», دەدى پارتيا توراعاسى.
