اسكەري انت – جاس ساربازدىڭ ومىرىندەگى اسا جاۋاپتى ءساتتىڭ ءبىرى. ۇلتتىق ۇلاننىڭ «باتىس» توبىنا قارايتىن 5517 اسكەري بولىمىنە كەلىپ تۇسكەن ساربازدار ءبىر اي بويى وقۋ پۋنكىتىندە شىنىعىپ, اسكەري ءومىردىڭ قىر-سىرىمەن تانىسىپ, ساپتىق دايىندىقتان وتكەن. كەڭ بايتاق وتانىمىزدىڭ ءار شەتىنەن – الماتى, اقتوبە, ماڭعىستاۋ, اتىراۋ, اقمولا وبلىستارىنان جينالعان جاۋىنگەرلەر مۇندا ءبىر ءۇيدىڭ بالاسىنداي بولىپ كەتتى. ويتكەنى ولاردىڭ ماقساتى ءبىر – ەلدىڭ قاۋىپسىزدىگى مەن اۋماقتىق تۇتاستىعىن قورعاۋ ءۇشىن ءمىنسىز قىزمەت ەتۋ. سالتاناتتى انت بەرۋ راسىمىنەن كەيىن جاس بۋىن بىردەن ەر جەتىپ, ەسەيىپ كەتكەندەي.
اسكەري ءبولىمنىڭ جاۋىنگەرلىك تۋى الاڭعا شىعارىلعان سوڭ ساربازدار ساپ تۇزەپ كەلىپ, اسكەري انت قابىلداۋعا كىرىسىپ تە كەتتى. سالتاناتتى جيىنعا قۇقىق قورعاۋ ورگاندارىنىڭ لاۋازىمدى تۇلعالارى, ۇلتتىق ۇلان ارداگەرلەرى قاتىسىپ, انت قابىلداعان جاۋىنگەرلەردى ەرەكشە جاۋاپتى ساتىمەن قۇتتىقتادى.
– ەلىمىزدى, وتانىمىزدى قورعاۋ – ءاربىر ازاماتتىڭ ەڭ قاسيەتتى بورىشى. ءوزىنىڭ تۋىپ وسكەن ەلىن, جەرىن قورعاپ, ناعىز سارباز بولۋ وڭاي ەمەس. ول ءۇشىن ءار سارباز وزىنە قويىلعان جاۋىنگەرلىك تاپسىرمانى ورىنداۋعا جان-جاقتى دايىن بولۋ كەرەك. ال اسكەري انت قابىلداۋ دەگەنىمىز – وتانىنا, حالقىنا جانە زاڭدى تۇردە سايلانعان پرەزيدەنتىنە اقتىق دەمى قالعانشا ادال قىزمەت ەتۋ دەگەن ءسوز. بۇگىننەن باستاپ سىزدەرگە جاۋاپكەرشىلىگى مول ماڭىزدى مىندەتتەر جۇكتەلگەلى تۇر. مەن وسى ءبولىمنىڭ كومانديرى رەتىندە سىزدەرگە جۇكتەلگەن جاۋىنگەرلىك تاپسىرمالاردى ادال دا ابىرويمەن اتقاراتىندارىڭىزعا تولىقتاي سەنەمىن, – دەدى 5517 اسكەري ءبولىم كومانديرى, پودپولكوۆنيك ساعىندىق القايداروۆ.
ءىس-شاراعا جاس ساربازداردىڭ اتا-انالارى دا ارنايى كەلگەن. قاتارداعى جاۋىنگەر تالعار نۇرقابدەننىڭ اكەسى ايتجان نۇرقابدەن ءسوز الىپ, جاۋىنگەرلەرگە «قابىلداعان اسكەري انتتارىڭىزعا بەرىك بولىپ, قىزمەتتەرىڭىزدى ابىرويمەن اتقارىڭىزدار. اتا-انالارىڭىز بەن باۋىرلارىڭىزدىڭ ورتاسىنا امان-ەسەن كەلۋلەرىڭىزگە تىلەكتەسپىن», دەگەن تىلەگىن ايتتى.
باتىس قازاقستان وبلىسى
