ۇشەم 3 قاڭتار كۇنى ساعات 20.00-دە ارالارىنا ءبىر مينۋت سالىپ ومىرگە كەلگەن ەكەن. سول ساتتەگى سالماعى – 2279, 2240 جانە 2700 گرامم بولعان. ورال قالاسىندا تۇراتىن تالاپ بورانعاليەۆ پەن جادىرانىڭ بۇعان دەيىن دە ءۇش بالاسى بولعان. ءبىر كۇندە كوپبالالى وتباسى, كۇمىس القا يەگەرى اتانعان 39 جاستاعى جادىرانىڭ دا, كىشكەنتاي سابيلەردىڭ دە جاعدايى جاقسى.
كەلىنشەكتىڭ تولعاعى مەرزىمىنەن بۇرىن باستالعاندىقتان, سابيلەر كەسار تىلىگى ارقىلى وتا جاسالىپ الىنعان. ۇشەمنىڭ سالماعى قالىپتى دەڭگەيگە جەتكەنشە وبلىستىق پەريناتالدىق ورتالىقتا دارىگەر باقىلاۋىندا بولىپتى.
«2022 جىلى باتىس قازاقستان وبلىسىندا جالپى سانى 6116 ءسابي دۇنيەگە كەلدى. سونىڭ ىشىندەگى شالا تۋعاندار سانى 507 بولدى. ءبىزدىڭ دارىگەرلەر 700 گرامم سالماقپەن تۋعان شارانانىڭ دا ءومىرىن ساقتاپ قالا الدى. بۇگىن ءبىزدىڭ بولىمشەدەن شىعىپ جاتقان ۇشەم مەن اناسىنىڭ دا جاعدايى قالىپقا كەلدى. ەندى ولار قالاداعى №6 پەرزەنتحانانىڭ قامقورلىعىندا بولادى», دەيدى باتىس قازاقستان وبلىستىق پەريناتالدىق ورتالىعى نارەستەلەر پاتولوگياسى بولىمشەسىنىڭ مەڭگەرۋشىسى اسەل نىعمەتوۆا.
باتىس قازاقستان وبلىسى
