ولار:
- قىلمىستىق ىستەر بويىنشا قۇقىقتىق كومەك تۋرالى;
- قىلمىسكەرلەردى ۇستاپ بەرۋ تۋرالى;
- سوتتالعان ادامداردى بەرۋ تۋرالى.
سونىمەن قاتار قازاقستان قۇرامىنا سولتۇستىك جانە وڭتۇستىك امەريكانىڭ 27 ەلى كىرەتىن 3 امەريكاارالىق كونۆەنتسيالاردىڭ (ۇستاپ بەرۋ تۋرالى, قىلمىستىق ىستەر بويىنشا قۇقىقتىق كومەك تۋرالى, شەتەلدە قىلمىستىق جازاسىن وتەۋ تۋرالى) تولىق قاتىسۋشىسى بولىپ سانالادى.
قازىرگى ۋاقىتتا مەملەكەت باسشىسى قاسىم-جومارت توقاەۆتىڭ جارلىقتارىمەن پەرۋ رەسپۋبليكاسىمەن بارلىق شارتتار, مالايزيامەن ۇستاپ بەرۋ تۋرالى, مىسىرمەن قىلمىستىق ىستەر بويىنشا قۇقىقتىق كومەك تۋرالى جانە ۇستاپ بەرۋ تۋرالى شارتتار ماقۇلدانعان جانە قول قويۋعا دايىن.
پارلامەنتتە فرانتسيامەن قىلمىستىق ىستەر بويىنشا قۇقىقتىق كومەك تۋرالى جانە وزبەكستانمەن سوتتالعان ادامداردى بەرۋ تۋرالى شارتتاردى راتيفيكاتسيالاۋ تۋرالى زاڭ جوبالارى قارالىپ جاتىر.
مىسىر جانە يزرايلدىك ارىپتەستەرمەن سوتتالعانداردى بەرۋ, ارگەنتينامەن قىلمىستىق ىستەر بويىنشا قۇقىقتىق كومەك كورسەتۋ جانە ۇستاپ بەرۋ, پورتۋگاليا, سلوۆاكيا, لاتۆيا جانە يرانمەن قىلمىستىق ىستەر بويىنشا قۇقىقتىق كومەك كورسەتۋ تۋرالى, ال ماروككومەن بارلىق ءۇش كەلىسىمگە قول قويۋ جونىندە كەلىسسوزدەر جۇرگىزىلىپ جاتىر.
قول جەتكىزىلگەن قۇقىقتىق بازا جانە شەتەلدىك ارىپتەستەرمەن ورناتىلعان بايلانىستار قىلمىستىق-قۇقىقتىق سالادا تىعىز ىنتىماقتاسۋعا جانە قىلمىسكەرلەردى جازالاۋدىڭ بۇلتارتپاستىعىن قامتاماسىز ەتۋگە مۇمكىندىك بەردى.
2022 جىلى ىزدەۋدە جۇرگەن ادامداردى ۇستاپ بەرۋ تۋرالى 50 سۇراۋ سالۋ شەت مەملەكەتتەرمەن قاناعاتتاندىرىلعان.
«وتكەن جىلى باحرەين كورولدىگىنەن كامەلەتكە تولماعاندار ساۋداسىنا, اتاپ ايتقاندا, قىزداردى قازاقستاننان باحرەينگە جىنىستىق پايدالانۋعا جىبەرگەنى ءۇشىن كۇدىكتى ا.پيچۋگينا ۇستاپ بەرىلگەن. سول سياقتى «ربك بانكى» اق-نىڭ 15 ملن اقش دوللارىنان استام سوماسىن ۇرلادى دەگەن كۇدىكتى ۆ.ۆلاسوۆ, قارجى پيراميداسىن («Qi TRADE Kazakhstan», «ۆىگودنىە زايمى») قۇرعانى جانە باسشىلىق ەتكەنى ءۇشىن ىزدەۋدە جۇرگەن س.ابسامەتوۆا, ب.تومين جانە ە.شاريفۋللين, سونداي-اق قۇرامىندا 1 ملرد تەڭگەدەن استام سوماعا التىنى بار ماتەريالدى قىلمىستىق توپتىڭ قۇرامىندا ۇرلاعانى ءۇشىن ا.تيماكوۆ رەسەيمەن ۇستاپ بەرىلگەن. ترانسۇلتتىق ۇيىمداسقان توپتىڭ قۇرامىندا اسا ءىرى مولشەردە التىن مەن زەرگەرلىك بۇيىمداردىڭ ەكونوميكالىق كونترابانداسى ءۇشىن ىزدەۋدە جۇرگەن تاستان ەبۋبەكيردى ۇستاپ بەرۋ تۋرالى سۇرانىس قىرعىزستانمەن قاناعاتتاندىرىلعان. اتىس قارۋىن قولدانۋ ارقىلى اۋىرلاتاتىن ءمان-جايلاردا كىسى ولتىرگەنى ءۇشىن ىزدەۋدە جۇرگەن و.يسسالى مەن ب.يسابەكوۆ تاجىكستاننان ەكستراديتسيالانعان. الاياقتىق جولىمەن 288 ملن تەڭگەنى ۇرلىق جاساعانى ءۇشىن قازاقستاننىڭ قۇقىق قورعاۋ ورگاندارى ىزدەپ جۇرگەن ا.سمالباەۆانى وزبەكستان تاراپى ۇستاپ بەرگەن», دەلىنگەن باس پروكۋراتۋرا حابارلاماسىندا.
