سۋرەتتى تۇسىرگەن دميتري ەروفەەۆ
اقسۋ اۋداندىق جۇمىسپەن قامتۋ ورتالىعىندا جۇمىسسىز رەتىندە تىركەلگەن ايدوس جۇمانوۆ بىلتىر «بيزنەس-باستاۋ» باعدارلاماسى بويىنشا كاسىپكەرلىك نەگىزدەرىن مەڭگەرىپ, سەرتيفيكات الىپ شىعادى. سودان سوڭ ءوزىنىڭ دايىنداعان بيزنەس جوباسىن قورعاپ, سونىڭ ناتيجەسىندە 1,2 ملن تەڭگەدەن استام سوما قايتارىمسىز گرانتقا يە بولادى. ايەل زاتىنىڭ تىرلىگى دەپ سوگەرسىز, بىراق جاس كاسىپكەر بۇل قاراجاتقا نان پىسىرەتىن پەش, قامىر يلەيتىن ماشينا مەن نان قالىپتارىن ساتىپ الادى. ءسويتىپ 2022 جىلدىڭ مامىر ايىندا بەرەكەلى كاسىبىن باستاپ, قازىر اقسۋلىق اعايىندى بولكە نانعا تويدىرىپ وتىر. ەڭبەكتىڭ نانى ءتاتتى دەگەن – وسى.
ء«بىزدىڭ اۋىلعا نان دۇكەندەرگە سىرت جاقتان جەتكىزىلەدى. قىستىڭ اۋا رايى قولايسىز كۇندەرى نان اكەلىنبەي قالاتىن كۇندەر ءجيى بولادى. سوندىقتان اۋىلدا وسى ناۋبايشىلىق كاسىپ اشسام دەپ ويلادىم. ويىمدى وتباسىما ايتقاندا, ولار قۋانا قولدادى. ءسويتىپ «بيزنەس-باستاۋ» ارقىلى وقىپ, گرانت الىپ, كەرەكتى قۇرال-جابدىقتارعا قول جەتكىزدىم. مۇنى وتباسىلىق بيزنەس دەسەم دە بولادى. ۇيدە بولكە نان ءپىسىرۋدى انام, اعام, قارىنداسىم, ءبارىمىز بىرگە اتقارامىز. قازىرگى قىسقى مەرزىمدە ءونىمدى تەك اۋىلدىڭ ىشىندە وتكىزەمىز. ال جازعى ۋاقىتتاردا جانسۇگىروۆ, قاراشىلىك سياقتى جاقىن ماڭداعى اۋىلدارعا دا جەتكىزەمىز», دەيدى ا.جۇمانوۆ.
بۇگىندە شاعىن كاسىپ يەسى كۇنىنە ورتا ەسەپپەن 150 بولكە نان ءپىسىرىپ ساتادى. ال جازعى ۋاقىتتا تاپسىرىس كولەمى ۇلعايادى. بۇل رەتتە ايانباي ەڭبەك ەتۋ كەرەك. قاراجات اينالىمىن ارتتىرعاننان كەيىن ايدوستىڭ نان ءونىمى تۇرلەرىن كوبەيتپەك ويى بار. جاس جىگىتتىڭ ەڭبەكقورلىعىنا ءسۇيسىنىپ قايتتىق.
جالپى, جەتىسۋ وبلىسىندا كاسىپكە ءۇيىر جاستاردىڭ قاتارى كوپ. ماسەلەن, ەسكەلدى اۋدانىنىڭ تۇرعىنى كاۋسار نۇردانعازى دا مەملەكەتتىك باعدارلامانىڭ يگىلىگىن كورىپ, ومارتا شارۋاشىلىعىمەن اينالىسىپ وتىر. وسىدان 4 جىل بۇرىن ءىستى العاش 10 ۇيامەن باستاعان كاسىپ يەسى بىلتىر 1 ملن 225 مىڭ تەڭگەنىڭ گرانتىنا تاعى 21 ارا ۇياسىن ساتىپ العان. از ۋاقىتتىڭ ىشىندە ارا ۇياسىنىڭ سانىن 80-گە جەتكىزگەن. گرانتقا يە بولعاننان كەيىن كاسىبىنە دەگەن سەنىمى ەسەلەنىپ, ونىمدەرىن «جامبو» برەندىمەن شىعارا باستاپتى. بۇگىندە بال ونىمدەرىن وتباسىنا عانا ەمەس, ءوزى تۇراتىن جەتىسۋ اۋىلىنىڭ تۇرعىندارىنا دا ۇسىنىپ وتىر.
جالپى, وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مالىمەتىنە قاراعاندا, 2022 جىلى مەملەكەتتىك گرانت ءۇشىن 840,9 ملن تەڭگە بولىنگەن. سونىڭ ناتيجەسىندە ءبىر جىلدا 617 ادام بيزنەس جوباسىن قورعاپ, گرانتقا يە بولدى, ياعني بۇل – جوسپاردىڭ 90 پايىزى. اتاپ وتسەك, مەملەكەتتىڭ وسىنداي كومەگىمەن شاعىن كاسىبىن باستاعانداردىڭ 212-ءسى – جاستار. دەمەك, جەتىسۋلىق جاس كاسىپكەرلەردىڭ ەڭبەگىن باعالاۋعا بولادى.
جەتىسۋ وبلىسى
