قالالىق ءبىلىم باسقارماسى تاراتقان مالىمەتكە سايكەس جاڭا مەكتەپتەر مەملەكەت-جەكەمەنشىك ارىپتەستىگى اياسىندا سالىنادى. جان باسىنا قارجىلاندىرۋ باعدارلاماسى بويىنشا ءبىلىم بەرىلەدى. بۇل دەگەنىمىز – ءبىلىم ۇيالارى جەكەمەنشىك بولعانىمەن, بارلىق شىعىن بيۋدجەت ەسەبىنەن تولتىرىلادى. سوندىقتان اتا-انالار قالتالارىنان ءبىر تيىن دا شىعارماي, بالالارىن تەگىن وقىتادى. ءبىلىم وشاقتارىنىڭ قۇرىلىسىنا بايلانىستى وسى جوبانى جۇزەگە اسىرۋ ارقىلى الداعى ۋاقىتتا مەگاپوليستەگى ءۇش اۋىسىمدا ءبىلىم بەرەتىن مەكتەپتەردىڭ ماسەلەسى تۇبەگەيلى جويىلادى.
رەسمي مالىمەت بويىنشا, بىلتىر جان باسىنا قارجىلاندىرۋ باعدارلاماسىمەن جۇمىس ىستەيتىن مەملەكەت-جەكەمەنشىك ارىپتەستىگى جۇيەسىمەن سالىنعان 41 مەكتەپ پايدالانۋعا بەرىلگەن ەدى. وندا قازىر 24 مىڭنان استام بالا ءبىلىم الىپ جاتىر. بىلتىر عانا اشىلعان 41 ءبىلىم وشاعىنىڭ 34-ءى تازا قازاق تىلىندە وقىتاتىن مەكتەپ بولسا, قالعان جەتەۋى – ارالاس مەكتەپتەر.
بۇگىنگى تاڭدا شىمقالادا جالپى ورتا ءبىلىم بەرەتىن 246 مەكتەپ بار. ونىڭ 95-ءى – جەكەمەنشىك, قالعانى – مەملەكەتتىك ءبىلىم وشاقتارى. سونىمەن بىرگە مەگاپوليستە 579 مەكتەپكە دەيىنگى ءبىلىم بەرەتىن ۇيىمدار قىزمەت كورسەتەدى. وسى بوبەكجاي مەن بالاباقشالاردا 70 مىڭعا جۋىق شىمكەنتتىك بالدىرعاندار تاربيەلەنىپ جاتىر.
شىمكەنت
