جەلتوقسان ايىنىڭ سوڭىندا بازار اۋماعىندا ءتورت ەر ادامعا ارنالعان باعدارلاۋ قاعازدارى ءىلىندى. ىلەسپە اقپاراتقا سايكەس, ولار ءىرى كولەمدەگى الاياقتىق جاسادى دەگەن كۇدىككە ىلىنگەن. قىلمىسكەرلەردى الماتى وبلىسى قاراساي اۋداندىق كريمينالدىق پوليتسيا ءبولىمى ىزدەستىرىپ جاتىر.
الماتى وبلىسىنىڭ پوليتسيا دەپارتامەنتى بۇل ادامداردىڭ ىزدەۋدە ەكەنىن راستادى. قىلمىسكەرلەردىڭ تورتەۋى دە حالىقارالىق ىزدەۋدە.
«كريمينالدىق پوليتسيا قىزمەتكەرلەرى 1982 جىلى تۋعان دانيار ابدىعاپاروۆقا حالىقارالىق ىزدەۋ جاريالادى. ول قىلمىستىق كودەكستىڭ 190-بابى, ياعني «الاياقتىق» بويىنشا قىلمىس جاسادى دەگەن كۇدىككە ءىلىندى, سونداي-اق كريمينالدىق پوليتسيا قىزمەتكەرلەرى 1982 جىلى تۋعان جۇمادين پاتوۆقا, 1984 جىلى تۋعان قانات جاقاەۆقا حالىقارالىق ىزدەۋ جاريالادى. ولار قىلمىستىق كودەكستىڭ 190-بابى, ياعني «الاياقتىق» بويىنشا قىلمىس جاسادى دەگەن كۇدىككە ءىلىندى», دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتىنەن.
الماتى وبلىسىنىڭ پروكۋراتۋراسى بۇل قىلمىستىق ءىس ءوز باقىلاۋىندا ەكەنىن قوستى.
«قازىرگى ۋاقىتتا جوعارىدا اتالعان تۇلعالاردى ۇستاپ, قاراساي اۋداندىق پوليتسيا ءبولىمىنىڭ ۋاقىتشا ۇستاۋ يزولياتورىنا ورنالاستىرۋعا باعىتتالعان جەدەل ىزدەستىرۋ شارالارى جۇرگىزىلىپ جاتىر. ناتيجەلەرى كەيىنىرەك حابارلانادى. سونىمەن بىرگە بۇل قىلمىستىق ءىس الماتى وبلىسى پروكۋراتۋراسىنىڭ باقىلاۋىندا», دەپ اتاپ ءوتتى قاداعالاۋ ورگانىنان.
