«تۇڭعىش پرەزيدەنت – ەلباسى تۋرالى» كونستيتۋتسيالىق زاڭنىڭ كۇشى جويىلدى دەپ تانۋ تۋرالى» كونستيتۋتسيالىق زاڭنىڭ جوباسىن ۇسىنا وتىرىپ, دەپۋتات ەرلان سايروۆ وتكەن جىلى بۇكىلحالىقتىق رەفەرەندۋم ناتيجەسىندە ەلدە جاڭا كونستيتۋتسيا قابىلدانعانىن ەسكە سالدى. جاڭا كونستيتۋتسياعا قازاقستان حالقىنىڭ 77%-ى داۋىس بەردى.
«كونستيتۋتسيالىق رەفورما - تاۋەلسىزدىكتىڭ 30-شى جىلىنداعى بيلىك تارماعىنىڭ ينستيتۋتتارىن نىعايتۋداعى جانە قوعامدا دەموكراتيانى قالىپتاستىرۋداعى ۇلكەن قادام. كونستيتۋتسياعا ەنگىزىلگەن وزگەرىستەرگە سايكەس تۇڭعىش پرەزيدەنت - ەلباسىنىڭ مارتەبەسى مەن وكىلەتتىكتەرى رەسپۋبليكا كونستيتۋتسياسىندا جانە كونستيتۋتسيالىق زاڭدا ايقىندالاتىنى تۋرالى نورمانى كوزدەيتىن كونستيتۋتسيانىڭ 46-بابىنىڭ 4-تارماعى الىنىپ تاستالدى. تەرەڭ ساياسي ترانسفورماتسيا كەزەڭىندە قازاقستان دەموكراتيا مەن ءپليۋراليزمدى ۇستانادى, جەكە تۇلعانىڭ بيلىكتى باسىپ الۋىنا ىقپال ەتەتىن قانداي دا ءبىر تەتىكتەردى الىپ تاستاۋ ماڭىزدى», دەپ اتاپ ءوتتى ەرلان سايروۆ.
ونىڭ ايتۋىنشا, ءماجىلىس دەپۋتاتتارىنىڭ توبى حالىقتىڭ باسىم كوپشىلىگىنىڭ پىكىرىن ەسكەرە وتىرىپ, وسى زاڭ جوباسىن ۇسىندى.
ءوز كەزەگىندە «جاڭا قازاقستان» دەپۋتاتتار توبى وسى ماسەلە بويىنشا كونستيتۋتسيالىق سوتقا جۇگىندى. كونستيتۋتسيالىق سوت «قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ مارتەبەسى تۋرالى» زاڭنىڭ ەلدىڭ جاڭا كونستيتۋتسياسىنا سايكەس كەلمەۋى تۋرالى شەشىم شىعاردى.
«بارلىق بيلىكتى ءوز قولىنا الۋعا تىرىسۋ, قازاقستاننىڭ ساياسي پروتسەسىندە ساياسي ينستيتۋتتاردى مونوپوليالاۋ, تاجىريبە كورسەتكەندەي, ساياسي قۇندىلىقتاردى قۇنسىزداندىرۋعا جانە مەملەكەتتىڭ دامۋىنا تەرىس اسەر ەتۋگە قابىلەتتى. سوندىقتان بولاشاقتا مۇنداي ولقىلىقتارعا قوعامدىق-ساياسي يممۋنيتەتتى قالىپتاستىرۋ وتە ماڭىزدى. جوعارىدا ايتىلعانداردى باسشىلىققا الا وتىرىپ, ساياسي, قۇقىقتىق نەگىزدىڭ جوقتىعىن ەسكەرە وتىرىپ, «قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ مارتەبەسى تۋرالى» كونستيتۋتسيالىق زاڭنىڭ كۇشى جويىلدى دەگەن كونستيتۋتسيالىق زاڭ جوباسى ۇسىنىلدى», دەپ ناقتىلادى ەرلان سايروۆ.
دەپۋتاتتار قۇجاتتى ەكى وقىلىمدا قارادى. تالقىلاۋدان كەيىن ولار ونى ءبىراۋىزدان قولدادى.
وسىلايشا, ەلباسى مارتەبەسىن جوعالتۋ تۋرالى زاڭ قابىلداندى دەپ ەسەپتەلەدى. الداعى ۋاقىتتا ول مەملەكەت باسشىسىنا قول قويۋعا جىبەرىلەدى.
