بۇل رەتتە قر ءىىم اپك باسقارما باستىعىنىڭ مىندەتىن اتقارۋشى ازامات قۇرىمباەۆ بالاعات سوزدەردى قولدانعاندارعا قاراستىرىلاتىن جازا تۇرلەرى جايىندا ايتىپ بەردى.
«قازاقستان زاڭناماسىندا بالاعات سوزدەر ءۇشىن جاۋاپكەرشىلىك بۇرىننان كوزدەلگەن. ماسەلەن, قورلاۋ, ياعني باسقا ادامنىڭ ار-نامىسى مەن قادىر-قاسيەتىن ادەپسىز تۇردە قورلاۋ – بۇل قىلمىستىق تەرىس قىلىق. ونى جاساعانى ءۇشىن جاۋاپكەرشىلىك 100 اەك-كە دەيىن ايىپپۇل تۇرىندە نەمەسە 120 ساعاتقا دەيىن تۇزەۋ, يا بولماسا قوعامدىق جۇمىستار تۇرىندە كوزدەلگەن. بۇدان ءارى قۇقىق بۇزۋشىمەن وتباسىلىق-تۇرمىستىق قاتىناستاردا تۇرعان ادامدارعا ايقىن قۇرمەتسىزدىك بىلدىرەتىن جانە قىلمىس قۇرامىن قامتىمايتىن بالاعات سوزدەر مەن باسقا دا ارەكەتتەر اكىمشىلىك قۇقىق بۇزۋشىلىق تۋرالى كودەكستىڭ 73-بابى بويىنشا اكىمشىلىك جاۋاپكەرشىلىككە اكەپ سوعادى. جازا سوت ارقىلى ەسكەرتۋ نەمەسە 5 تاۋلىككە دەيىن قاماققا الۋ تۇرىندە بولۋى مۇمكىن», دەدى ازامات قۇرىمباەۆ.
ونىڭ ايتۋىنشا, ۇساق بۇزاقىلىق ءۇشىن اكىمشىلىك جاۋاپكەرشىلىك قوعامدىق ورىنداردا, اينالاسىنداعىلارعا سىيلاماۋشىلىق ءبىلدىرۋ, سونداي-اق قوعامدىق ءتارتىپ پەن ازاماتتاردىڭ تىنىشتىعىن بۇزىپ, بالاعات سوزدەر ايتىلعان جاعدايدا عانا تۋىندايدى.
«وسى جىلدان باستاپ ۇساق بۇزاقىلىق جاساعانى ءۇشىن جازا كۇشەيتىلەدى. بۇل قوعامدىق ءتارتىپتى بۇزۋدىڭ جولىن كەسۋ ماقساتىندا جاسالدى. قازىر اۆتوبۋستا بىرەۋ بالالاردىڭ نەمەسە اعا بۋىن ادامداردىڭ كوزىنشە, ياعني قوعامدىق ورىندا, اينالاسىنداعىلارعا سىيلاماۋشىلىق ءبىلدىرىپ, قوعامدىق ءتارتىپتى بۇزىپ, بالاعات سوزدەر ايتقان جاعدايدا, بۇل ءۇشىن ايىپپۇل 17 250 تەڭگەنى قۇرايدى نەمەسە 10 تاۋلىككە دەيىن قاماۋعا الىنادى. 6 ناۋرىزدان باستاپ مۇنداي ارەكەتتەر ءۇشىن 20 اەك (69 مىڭ تەنگە تۇرىندەگى جازا) ايىپپۇل نەمەسە 5-تەن 15 تاۋلىككە دەيىن قاماۋعا الۋ كوزدەلگەن», دەپ ءتۇسىندىردى سپيكەر.
بۇل رەتتە, ادامدار ءبىر-بىرىنە جالعان ايىپ تاقپاۋى ءۇشىن شاعىمدانۋشى پوليتسيا قىزمەتكەرلەرىنە ناقتى دالەلدەمەلەر ۇسىنۋى قاجەت. بۇل - ازاماتتاردىڭ ءوتىنىشى, كۋاگەرلەردىڭ ايعاقتارى, سونداي-اق قۇقىق بۇزۋشىلىقتىڭ اۋديو نەمەسە بەينەتۇسىرىلىمى, قاجەت بولعان جاعدايدا ساراپشىنىڭ قورىتىندىسى. قۇقىقتىق باعانى سوت بەرەدى.
«الەۋمەتتىك جەلىلەردە بالاعات سوزدەر ايتقانى ءۇشىن, ەگەر بۇنداي ارەكەتتەر قوعامدىق ورىنداردا نەمەسە اينالاسىنداعىلارعا سىيلاماۋشىلىق تانىتىپ, ازاماتتاردىڭ تىنىشتىعىن بۇزسا, بۇل ۇساق بۇزاقىلىق بابىمەن قاراستىرىلادى. جالپى قاي تىلدە بولماسا دا بالاعات سوزدەر ايتقانى ءۇشىن جاۋاپكەرشىلىك قاراستىرىلادى», دەپ قورىتىندىلادى ازامات قۇرىمباەۆ.
