باتىس قازاقستان وبلىسىندا قاڭتاردىڭ العاشقى اپتاسىنا دەيىن كۇن جىلى بولدى. تەك سوڭعى كۇندەرى عانا اۋا رايى كۇرت سۋىتىپ, اياز بىردەن 30 گرادۋسقا جەتتى. ورال قالاسىندا 9-11 قاڭتاردا 1-9 سىنىپتار كۇن سۋىتۋىنا بايلانىستى وقۋدان بوساتىلسا, 10 قاڭتار كۇنى بۇكىل مەكتەپ وقۋشىلارى تۇگەلىمەن ونلاين وقۋعا كوشتى.
مىنە, وسى كۇندەرى ەگىندىكول اۋىلىندا تۇراتىن ماحامبەت اۋىل ىرگەسىندەگى بۇلاق باسىندا جالعىز اققۋ جۇرگەنىن كورىپ قالادى. قۇس تورەسىنىڭ ءوز ۇيىرىنەن, جۇبىنان قالاي اداسىپ قالعانى بەلگىسىز. بۇلاق ماڭى قالىڭ قامىس پەن قوعا, ىق-پاناسى كوپ جەر. الايدا قاتتى ايازدا قۇستىڭ قاناتىنا مۇز قاتىپ, جاعدايى قيىنداي باستاعان. اققۋدى الىستان باقىلاپ, قورعان بولىپ جۇرگەن ورمانشى جىگىت قۇستىڭ مۇشكىل ءحالىن كورىپ, ۇستاپ الىپ ۇيىنە اكەلىپتى. جىلى جەردە قاتقان مۇزدى ەرىتىپ, تاماق-سۋىن بەرىپتى.
«اققۋدىڭ قيمىلى شيراق, كوڭىلى سەرگەك. ءبىر جاق توپشىسىندا ءسال ىسىك بايقالاتىن سياقتى, بىراق قاناتىن قاعىپ, ەركىن قيمىلداپ ءجۇر. قورادا جەم-سۋىن بەرىپ, ۋاقىتشا باعىپ وتىرمىن. بۇل قۇستىڭ ەندىگى تاعدىرى نە بولادى؟ وبلىس ورتالىعىنا جەتكىزۋىم كەرەك پە؟» دەپ ماحامبەت ورال قالاسىنداعى ەكوبەلسەندىلەرگە سۇراۋ سالعان ەكەن.
باتىس قازاقستان وبلىسىندا ەكولوگيالىق ماسەلەلەرمەن شۇعىلدانىپ, كوپتەگەن يگى ءىستىڭ باسىندا جۇرگەن «تەلەگەي» قوعامدىق بىرلەستىگىنىڭ مۇشەلەرى ءوزارا اقىلداسىپ, اققۋ قۇس سول ەگىندىكولدە, ورمانشىنىڭ ۇيىندە بولا بەرگەنى دۇرىس دەگەن قورىتىندىعا كەلدى. ءبارى ويداعىداي بولسا, جازعىتۇرى جىل قۇستارى كەلگەندە ەركىندىككە جىبەرىلەدى. وعان دەيىن ورالدىق بەلسەندىلەر ەگىندىكولگە جەم-ءدان جىبەرىپ, كومەكتەسىپ تۇرماقشى.
ماحامبەت راحمادەن ۇلى قاراعاش ورمان شارۋاشىلىعىندا 13 جىلدان بەرى قىزمەت ەتەدى. تابيعات اياسىنداعى جابايى جانۋارلاردى قورعاۋ – ونىڭ ءاۋ باستان تاڭداپ العان تاعدىرى دەۋگە بولادى. ونىڭ قورعاۋىنداعى ورمان القابىندا ەلىك, قابان سەكىلدى جانۋارلار كوبەيىپ ءوسىپ كەلەدى. الايدا ماحامبەت بۇعان دەيىن اققۋ باعىپ كورمەگەن ەكەن.
باتىس قازاقستان وبلىسى
