ستۋدەنتتىك جىلداردان باستاپ-اق كينوستۋدياعا جاقىن بولىپ, الدىمەن دۋبلياج جاساۋعا قاتىسىپ, ودان كەيىن رولدەردە ويناعان اكتەردىڭ ارمانى اسقاق, بولاشاققا دەگەن ۇمتىلىسى بولەك ەدى. جوعارى وقۋ ورنىن بىتىرەر جىلى «قازاقفيلم» كينوستۋدياسىندا م.بەگالين قويعان «جەرگە قايتىپ ورالۋ» اتتى فيلمدە ەكى باستى ءرولدى وينادى. ولاردىڭ ءبىرىنشىسى – قويشى بالا ەرمەك تە, ەكىنشىسى – ءارتىس اسقار اليەۆ. كينو ءتۇسىرۋ اياقتالعاننان كەيىن «قازاقفيلم» ستۋدياسىنا اكتەر بولىپ جۇمىسقا تۇرىپ, ونەر جولىن باستادى. اكتەر ءوز ەستەلىگىندە: «تۇركىستاننىڭ بۇگىنى مەن ەرتەڭىن ويلاعاندا كوڭىلىمدە ءبىر تۇيتكىل تۇردى. تۇركىستاننىڭ رۋحىن كوتەرۋ ءۇشىن ەڭ اۋەلى سول جەردىڭ رۋحاني يگىلىكتەرىن جاساۋىمىز قاجەت. ءوزىم ۇزاق جىلدار قىزمەت ەتكەن ونەر سالاسىنىڭ بيىگىنەن قاراسام, تۇركىستانعا تەاتر كەرەك. ەلىمىز ەگەمەندىك الدى, تۇركىستان قايتا تۇلەيتىن بولادى دەپ, جاستايىمنان باۋىر باسىپ قالعان الماتىنى, اتاق-ابىرويىنا يە بولعان ونەر ورداسىن تاستاپ, تۋعان جەرگە تارتىپ كەتۋىمنىڭ باستى سەبەبى دە سول بولاتىن. وسىندا جيناقتالعان تاجىريبەمدى, ازدى-كوپتى ونەرىمدى سوندا الىپ بارايىن دەپ شەشتىم. تۇركىستان قايتا تۇلەپ, ىرگەسىن كەڭىتىپ جاتقاندا سونىڭ ءبىر شەگەسى بولىپ قالعىم كەلدى…» دەپ جازادى. ال ونىڭ تەاتر ونەرىنە قوسقان ۇلەسى تۋرالى زامانداستارى دا جاقسى كوزقاراسقا يە. «...ەلىمىز امان بولسا, جەرىمىز ءبۇتىن بولسا, ساحنا ونەرىنىڭ تۋى جىعىلماسا, وندا رايىمبەكتىڭ رومانتيكاسى مەن ەپيكاسى, سەزىمى مەن سىرى, پاراساتى مەن پايىمى ەش كومەسكى تارتپاستان, ساحنانى كيە تۇتار تالاي ۇرپاقتىڭ جولىنا نۇر ساۋلەسىن ءتۇسىرىپ, تاڭ جۇلدىزىنداي ونەر اسپانىندا ءاماندا جارقىراپ تۇراتىن بولادى», دەپ جازادى اكادەميك اقسەلەۋ سەيدىمبەك.
ءبىز بۇگىن مۇحتار اۋەزوۆتىڭ «الۋا» پەساسى جانە ونى ساحنالاعان رايىمبەك سەيتمەتوۆ تۋرالى سويلەمەكپىز. 1983 جىلى ع.مۇسىرەپوۆ اتىنداعى بالالار مەن جاسوسىپىرىمدەر تەاترىنا كوركەمدىك جەتەكشى بولىپ بارعان سەيتمەتوۆ قۇلدىراپ كەتكەن تەاتر, قوجىراعان ونەر ۇجىمىنا دۇرىس باسشىلىق كەرەك ەكەنىن بىردەن اڭداپ, تىڭ دۇنيەلەردى ساحنالاپ, كورەرمەننىڭ كوڭىلىن تابۋدى كوزدەيدى. ونىڭ باسشىلىعىمەن تەاتر ۇجىمى ەكى-ءۇش جىلدا قايتا ەڭسە تىكتەپ, جاڭا ناتيجەلەرگە قادام تاستايدى. رەجيسسەر وسى ساتتەرىن «جاڭا دۇنيە كەرەك بولعاسىن, م.اۋەزوۆتىڭ «الۋاسىن» ساحنالادىم. «الۋا» سپەكتاكلى – مەنىڭ شىعارماشىلىق ءومىرىمنىڭ ءبىر بەلەسى. بۇل م.اۋەزوۆتىڭ جازىلىپ, بىراق 30 جىل بويى قويىلماي تارتپادا جاتقان شىعارماسى بولاتىن. بۇل ءبىزدىڭ تەاترىمىز ءۇشىن دە, ۇلتتىق تەاتر ونەرى ءۇشىن دە ۇلكەن وقيعا بولدى», دەپ باياندايدى. ەڭبەكتىڭ جەمىسى وتەلىپ, «الۋا» سپەكتاكلى كورەرمەننىڭ كوڭىلىنەن شىعادى. سپەكتاكلدىڭ جوعارى دەڭگەيدە قويىلعانى ءۇشىن رەجيسسەر سەيتمەتوۆكە, الۋا ءرولىن سومداعان گۇلجامال قازاقباەۆاعا, ماكىل قۇلانباەۆ پەن مۇحتار باقتىگەرەەۆتەرگە قازاقستان رەسپۋبليكاسىنىڭ مەملەكەتتىك سىيلىعى بەرىلەدى. بىلايشا ايتقاندا, ءبىر قويىلىمعا قاتىسى بار ءتورت ونەر قايراتكەرى بىرگە ماراپاتتىڭ بيىك تورىنەن كورىنەدى. سول ءۇشىن دە ءبىز كەشىگىپ كورەرمەنىمەن جولىققان «الۋا» سپەكتاكلىن رەجيسسەر رايىمبەك سەيتمەتوۆتىڭ ءبىر تىنىسى دەر ەدىك.
